JUECES 4
4
Deborahuan Barac-huan Sisarata mishashcamanta
1Aod huañushca quipaca israelcunaca cutinllatacmi Mandac Diospac ñaupapi mana allita ruhuai callarirca. 2Chaimantami Mandac Diosca Canaán llactata jatun mandac Jabinpac maquipi churarca. Paica Hazor pueblopimi mandacurca. Paipac macanacuc runacunata mandacca Sisarami carca. Paica Haroset-goim pueblopimi causarca.
3Jatun mandac Jabinca iscun patsac fierro carretatami charirca. Shinallatac ishcai chunga huatatami yallita llaquichirca. Chaimantami israelcunaca Mandac Diosta caparishpa mañarcacuna.
4Chai punzhacunapica Lapidotpac huarmi Deborami israelcunataca mandacurca. Paica Dios ima nishcata huillacmi carca. 5Deboraca paipac palma yura ucupimi tiyac carca. Chai yuraca Efrainpac urcupi cac Ramá, Bet-el pueblocuna tupanacuipimi carca. Chaimanmi israelcunaca imapish llaquita allichichun ric carcacuna.
6Débora Neftalí aillucunapac Cedes pueblopi causac Abinoampac churi Baracta cayac cachashpaca:
—Israelcunata Mandac Diosca: “Neftalipac, Zabulonpac aillucunamanta chunga huaranga macanacuc runacunata Tabor urcupi tandachi. 7Ñucaca Cisón huaicumanmi Jabinpac macanacuc runacunata, mandac Sisarata carretacunandi apamushpa, cancunapac maquipi churasha” ninmi— nirca.
8Chaipimi Baracca:
—Can ñucahuan risha nicpica, rishami, can mana risha nicpica, ñucapish mana rishachu— nirca.
9Shina nicpimi Deboraca:
—Ari, ñucaca rishami. Can rishpa macanacuita atishpapish mana canchu alli nishca cangui, ashtahuanpish Mandac Diosca shuc huarmipac maquipi churashpami Sisarataca tucuchinga— nirca.
Shina nishpaca, Deboraca Barac-huanmi Cedesman rirca. 10Shina rishpami Baracca Zabulonpac aillumantapish, Neftalipac aillumantapish chunga huaranga macanacuc runacunata Cedespi tandachirca. Deborapish paihuanmi rirca.
11Ceneocunapuramanta Heberca Moisespac suegro Hobabpac huahua huahuacunaca caishuc ceneocunapuramanta raquirinacushca Cedes pueblo ladopi cac Zaanaim pambapi tiyac encina yura cuchupimi carpa huasita shayachishpa tiyacurca.
Sisarapac soldadocunata mishashcamanta
12Sisaraca Habinoampac churi Barac Tabor urcuman rishcatami yacharca. 13Chaimantami Sisaraca paipac iscun patsac fierro carretacunata, tucui paihuan cac gentecunatapish Haroset-goim pueblomanta Cisón yacucaman tandachirca.
14Chaimantami Deboraca Baractaca:
«¡Jatari, cunan punzhami Mandac Diosca Sisarata cambac maquipi churagrin. Mandac Diosca cambac macanacuc runacunapac ñaupatami ricun!» nirca.
Baracca chunga huaranga macanacuc runacunata catichishpami, Tabor urcumanta shamurca. 15Chaipica Mandac Diosmi Baracpac ñaupapi Sisarataca carretacunandi, paipac macanacuc runacunandi espadahuan chugrichishpa tucuchirca. Chaipimi Sisaraca carretamanta uricushpa chaquillahuan miticushpa callparca. 16Chashna callpacpimi, Baracca Haroset-goimcaman cati rishpa, Sisarapac carretacunatapish, macanacuc runacunatapish shucllatapish mana saquishpa tucui tucuchirca.
Sisarata huañuchishcamanta
17Sísara chaquillahuan rishpaca, ceneocunapuramanta Heberpac huarmi Jaelpac carpa huasipimi miticugrirca. Chai punzhapica Hazor pueblota jatun mandac Jabinhuan ceneopuramanta Heberhuanca alli apanacucmi carca. Chaimantami Jaelpac huasipi miticugrirca. 18Shina chayacpimi, Heberpac huarmi Jael tupangapac llucshishpaca:
—Amito, caita yaicumui, ñucapacman cuchuyai, ama manchaichu— nirca.
Chashna Sisarata yaicuchishpami catachishpa samachirca. 19Shina ruhuacpimi paica:
—Yacunayaihuanmi cani, asha yacuta carai— nirca.
Shina nicpimi, cara capachuta pascashpa ashata ubiachishpa, cutinllatac catachirca. 20Sisaraca:
—Canca, cai carpa huasi pungullapi shuyai. Maijan shamushpa: “¿Maijan cai ucupichu?” nicpica: “Pi mana caipichu” ningui— nirca.
21Sísara shaicushca cashcamanta yallita sueñucucpimi, Heberpac huarmi Jaelca carpa huasi shayachina ishtacata apashpa, ringri ladopi churashpa allpacaman pasacta ishtacarca. Chashnami Sisarataca huañuchirca.
22Barac Sisarata catishpa chayacpica, Jael huarmi llucshishpaca:
—Shamui, can mashcacushca runata ricuchisha— nirca.
Shina nicpi, Barac paihuan yaicushpaca Sisarataca umapi allpacaman ishtacashca huañushca siricuctami ricurca. 23Chashnami Mandac Diosca Canaán llactata jatun mandac Jabintaca israelcunapac ñaupapi llaquichirca. 24Israelcunaca Canaán llactata jatun mandactaca tucuchingacamanmi ashtahuan ashtahuan llaquichirca.
Currently Selected:
JUECES 4: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.