JUECES 2
2
Mandac Diospac ángel Boquim pueblopi ricurishcamanta
1Mandac Diospac ángel Gilgal pueblomanta Boquim puebloman rishpami israelcunataca:
«Ñucami Egipto llactamanta llucchishpa, cancunapac ñaupa taitacunaman cungapac ari nishca llactaman pushamurcani. Paicunamanmi ñucaca: “Ñuca cancunahuan ari nishcataca pactachishatacmi. 2Cancunapish cai llactapi causaccunahuan ama imata ari ninacunguichicchu. Paicunapac dioscunapac altarcunatapish tucui urmachinguichic” nircani. Shina cacpipish, cancunaca ñuca nishcataca mana cazushcanguichicchu. ¿Ima nishpatac chashna ruhuarcanguichic? 3Chaimanta ñucapish: “Cai gentecunataca cancunapac chaupimanta mana llucchishpa cachashachu. Ashtahuanpish paicunaca cancunata piñaccunami canga. Paicunapac dioscunapish cancunataca mitcachic shinami pandachinga” nircani» nirca.
4Mandac Diospac ángel chashna nicpica, tucui israelcunami caparishpa huacai callarirca. 5Chaimantami chai llactataca Boquim nishpa shutichirca. Chaipimi Mandac Diosman animalcunata cushpa huañuchirca.
Josuepac aillucuna tucurishcamanta
(Jos 24.29-31)
6Josué caya minchacaman nishpa raquiricpica, israelcunapish tucuimi japina cashca allpata japingapac rirca. 7Israelcunaca Josué causacui punzhacunapipish, Josuepac randi yuyac taitacuna mandacui punzhacunapipish Mandac Diostaca servishpami causarca. Paicunami israelcunaman Mandac Dios jatun mancharinacunata ruhuashcata ricurca.
8Mandac Diosta servic Nunpac churi Josueca patsac chunga huatayuc cashpami huañurca. 9Paitaca Timnat-sera nishca Gaas urcumanta jahuaman cac Efraín urcupimi paipac allpapi enterrarcacuna. 10Tucui chai quipa mirai israelcunapish huañushpaca paicunapac taitacunahuanmi tandarigrirca. Chai quipaca Mandac Diostapish, israelcunaman imata Mandac Dios ruhuashcata mana ricsic gentecunami mirarirca.
Israelcuna Mandac Diosmanta caruyashcamanta
11Chai quipaca Mandac Diospac ñaupapi mana allita ruhuashpami israelcunaca Baal dioscunata servishpa causai callarirca. 12Paicunapac ñaupa taitacunata Egipto llactamanta llucchic Mandac Diosta saquishpami manapish diosta catishpa, chai muyundi pueblocunapi tiyac dioscunata servishpa Mandac Diosta piñachircacuna. 13Mandac Diosta saquishpami Baal diosta, Astarot diosta servircacuna. 14Chaimantami Mandac Diosca nina japiric shina piñarishpa israelcunataca imatapish shuhuashpa puriccunapac maquipi churarca. Shinallatac chai muyundipi causac paicunata piñac gentecunapac maquipi churacpimi, israelcunaca paicunataca mana ati pudirca. 15Mandac Dios nishca shinami, paicuna maiman ricpipish Mandac Diosca paipac maquihuan llaquichicurca. Mandac Dios pactachingapac ari nishca shinami israelcunaca mai llaquita apacurca.
Mandaccuna acllarishcamanta
16Shina cashpapish Mandac Diosca imatapish shuhuashpa puriccunapac maquimanta quishpichichunmi juezcunata churarca. 17Shina cacpipish, israelcunaca juezcunata mana uyasha nishpami shuctac dioscunata catishpa adorarcacuna. Paicunaca mana ñaupa taitacuna shina Mandac Dios mandashcata cazushpa causarcacunachu, ashtahuanpish Mandac Diosmanta anchurishpami shuctac causaita causarca. 18Juezcunata churashpaca Mandac Diosca paicunahuanmi carca. Chaimantami tucui juezcuna causacui punzhapica paicunata piñaccunapac maquimanta quishpichirca. Mandac Diosca paicunata llaquichicpi, cuyaillata huacacpimi, israelcunataca quishpichirca. 19Shina cacpipish, juezcuna huañucpica shucta dioscunata adorangapac rishpami paicunapac ñaupa taitacunata atishpa ashtahuan millai tucurca. Chashna mana allita ruhuanapi yacharishca cashcamantami millaita ruhuanata manatac saquirca.
Israelcunata llaquichichun saquishca gentecunamanta
20Chaimantami Mandac Dios israelcunahuan nina japiric shina piñarishpaca: «Cai gentecunaca paicunapac ñaupa taitacunaman pactachingapac ari nishcataca mana cazushcacunachu. Ñuca nishcataca mana uyasha nincunachu. 21Cunanca ñucapish Josué huañushpa saquishca gentecunataca mana llucchishpa cachashachu. 22Israelcuna paicunapac ñaupa taitacuna Mandac Diosta cazushca shina cazucta, mana cazucta ricungapacmi chai llactapi causaccunataca mana llucchishpa cachasha» nirca.
23Chaimantami Mandac Diosca chai llacta gentecunataca mana llucchishpa cacharca. Shinallatac Josuepac maquipipish mana churarca.
Currently Selected:
JUECES 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.