EZEQUIEL 1
1
Diospac sumaimana achictaEzequiel ricushcamanta
1Quimsa chunga huata, chuscu quilla, pichca punzha cacpimi ñucaca prezu rishcacunahuan Quebar yacu patapi carcani. Chaipi cashpami, jahua pacha pascaricpi, Dios ricuchishcata muscuipi shina ricurcani. 2Jatun mandac Joaquinta prezu apashcaca ñami pichca huata, pichca quilla tucurca. 3Chaipimi Mandac Diosca caldeocunapac llactapi cac Quebar yacu patapi ñucaman huillarca. Ñucaca Buzipac churi Ezequielmi cani. Chaipimi Mandac Diosca ñucata rimarca.
4Ñucaca jahua ladomanta acapana huaira shamucucta, achca puyu jahuata nina pillurishca shamucuctami ricurcani. Cutin chai chaupipica sumaimana achiclla bronceman riccha jagan nicuctami ricurcani. 5Chai chaupipica causaita chariccunami chuscu ricurirca. Paicunaca genteman ricchami carca. 6Cada shucmi chuscu ñahuita, chuscu alasta charirca. 7Paicunapac chaquica rectomi carca. Chaquica becipac chaqui shina, bronce jagan nicuc shinami carca. 8Paicunapac alas ucupica chuscu ladomanmi gente maquita charirca. Chuscu ladomanmi ñahuitapish, alastapish charirca. 9Alascunaca caishucpac, chaishucpac alascunahuanmi tupanacushca carca. Maijan ladoman ringapacpish, mana chicanyarishpami ñaupaman purirca.
10Paicunapac ñahuicunaca cashnami carca: Ñaupa ladomanca gentepac ñahui shina, alli ladomanca leonpac ñahui shina, lluqui ladomanca huagrapac ñahui shina, huasha ladomanca aguilapac ñahui shinami carca. 11Chashnami paicunapac ñahuica carca. Paicunapac ishcai alastaca jahuata chutashcami carca. Alaspura tupanacushcami carca. Chaishuc ishcai alascunahuanca paicunapac cuerpotami tapashca carca. 12Tucui paicunami ñaupallaman purircacuna. Paicunaca maijan ladoman espíritu pushacpica, mana muyushpami purircacuna.
13Causaita chariccunaca carboncuna jagan nicuc shinami carca. Paicunapac chaupipica mechacuna rupacuc shinami, caiman chaiman cuyuricurca. Chai ninaca yallitami achicyachicurca, shinallatac relampa jagan nicucmi llucshicurca. 14Causaita chariccunaca relampa shinami, caiman chaiman volashpa puricurca.
15Ñuca ricushpaca, chai causaita chariccunapac chuscu ladoman ruedacuna allpa jahuapi cactami ricurcani. 16Chai ruedacunaca crisólito rumi shinami carca. Tucui chai chuscu ruedacunami chashnallatac carca. Chaupi ruedapi shuc ruedata quingraiman ruhuashca shinami carca.
17Chai ruedacuna purishpaca, mana chicanyarishpami chuscu ladoman purirca. 18Chai rueda arocunaca yallita mancharinami carca. Tucui chai chuscu ruedacunami muyundita ñahuicuna junda carca. 19Causaita chariccuna puricpica, ruedacunapish purircami. Cutin jahuata jataricpica, chai ruedacunapish jatarircami. 20Maiman espíritu pushacpica, chai ruedacunapish rircallami. Causaita chariccunapi cac espiritullatacmi ruedacunapipish carca. 21Causaita chariccuna puricpica, ruedacunapish purircami. Paicuna shayaricpica, ruedacunapish shayarircami. Cutin jahuata jataricpica, ruedacunapish jatarircami. Causaita chariccunapac espirituca ruedacunapimi carca.
22Causaita chariccunapac uma jahuapica sumaimana cristalman riccha pambami ricurirca. 23Chai pamba ucupica, paicunapac alascunataca caishuc-huan chaishuc-huan tupanacuchishcami carca. Shinallatac tucui paicunami ishcai alas-huan paicunapac cuerpota tapashca carca. 24Paicuna puri callaricpi, alascunaca achca yacu huaj nicuc shina, Tucuita Ruhuac rimashca shina, achca runacuna puricuc shina, soldadocuna puricuc shinami uyarirca. Paicuna shayarishpaca, uraimanmi alascunataca churarca.
25Chashna alascunata uraiman churacpica, paicunapac uma jahuapi cac pambamanta rimashcami uyarirca. 26Chai pamba jahuapica, zafiro rumimanta ruhuashca mandangapac tiyarina tiyacuctami ricurcani. Chai tiyarinapica genteman ricchami tiyacurca. 27Chai genteman ricchaca, bronce jagan nicuc shinami carca. Paipac chaupipish, paipac muyundipipish nina jagan nicuc shinami carca. Cinturamanta huichaimanpish, urimampish nina rupacuc shinami, tucui muyundita carca. 28Tamya punzhacunapi cuichi puyupi ricuric shinami muyundi sumaimana achicta ricurcani. Mandac Dios sumac cashcami muscuipi shina ricurirca. Chaita ricushpaca, allpacaman cumurircanimi. Chaipica shuc rimashcatami cungailla uyarcani.
Currently Selected:
EZEQUIEL 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.