HECHOS 1
1
Diospac Espirituta cachanamanta
1Cuyashca Teófilo, punta quillcashcapimi Jesús imacunata ruhuashcatapish, yachachishcatapish callarimanta pacha quillcashpa cacharcani. 2Chaica, Diospac Espíritu apostolcunata poderhuan mandashca quipa, Apunchic Jesusta jahua pachaman pushashca punzhacaman ima tucushcatami quillcani. 3Jesús huañushpa causarishca quipaca, chuscu chunga punzhacamanmi tauca cutin apostolcunaman ricurishpa, pai causacushcata allita ricuchirca. Chashnami Dios mandacucmantapish paicunaman yachachirca.
4Paicunahuan cashpa, Jesús paicunata mandashpaca:
—Ñuca huillashca shina, ñuca Taita cusha nishca Espíritu shamungacaman, Jerusalén pueblomanta maiman mana rishpa, chaipi shuyacunguichic. 5Juanca yacullahuanmi bautizarca, ashtahuanpish asha punzhacuna quipaca, Diospac Espirituhuanmi bautizashca canguichic— nirca.
Jahua pachaman Jesús rishcamanta
6Apostolcuna tandanacushpa, Jesusta tapushpaca:
—Apunchic Jesús, ¿cunanllatacchu Israel llactata mandanata cutin allichigringui?— nirca.
7Chashna nicpimi Jesusca:
—Chaitaca ñuca Taitallami yachan. Cancunaca ima punzha, ima hora chashna tucunataca mana yachai pudinguichicchu. 8Diospac Espíritu cancunapacman shamucpimi, poderta chasquinguichic. Chaimantami Jerusalén pueblopipish, tucui Judea llactapipish, Samaria llactapipish, tucui llactacunapipish ñucamanta huillanguichic— nirca.
9Chaita nishca quipami, paicuna ricucucpi, Jesusca jahua pachaman apashca carca. Paita puyu pacacpica, ña mana ricurcacunachu. 10Jesús huichai ricucta paicuna ricuracucpimi, ñapish ishcai yuranlla churarishca runacuna paicunapac cuchupi ricurirca. 11Chashna ricurishpaca:
—Galilea llacta runacuna, ¿ima nishpatac huichailla ricucunguichic? Cai cancunapacmanta jahua pachaman pushashca Jesusllatacmi, cutin shamunga. Ima shinami pai ricta ricurcanguichic, chashnallatacmi cutimunga— nirca.
Matiasta Judaspac randi acllashcamanta
12Chai quipami, apostolcunaca Olivos urcumantaca Jerusalén puebloman cutimurca. Chai urcuca Jerusalenmanta shuc kilómetro shinapimi carca. 13Jerusalenman chayashpaca, paicuna pozacushca huasi altomanmi huichicurca. Chaipimi Pedropish, Jacobopish, Juanpish, Andrespish, Felipepish, Tomaspish, Bartolomepish, Mateopish, Alfeopac churi Jacobopish, Celote nishca Simonpish, Jacobopac huauqui Judaspish carca. 14Tucui paicunami shuc yuyailla Diosta mañacurca. Jesuspac huauquicunapish, paipac mama Mariapish, caishuc huarmicunapishmi chaipi carca.
15Chai punzhacunapica, patsac ishcai chunga criccunami tandanacushca carcacuna. Paicunapac ñaupapi Pedro shayarishpaca: 16«Huauquicuna, Jesusta Judas japichina cashcataca, ñaupamanmi Diospac Espíritu yuyaita cucpi, Davidca quillcachishca. Chaica pactanami carca. 17Judasca ñucanchicpuramantami carca. Paipish ñucanchic shinallatac shuc ruhuaita ruhuachun acllashcami carca. 18Judasca millaita ruhuashcamanta japishca cullquihuanca allpatami randirca. Chai allpallapitacmi jahuamanta urai singa urmashpa, huicsa tucyashpa, chunzhulli tallirishpa huañurca. 19Chashna tucushcataca tucui Jerusalenpi causaccunami yachac chayarca. Chaimantami chai allpataca quiquin rimaipi “Aceldamata” shutichirca. “Acéldama” nishpaca, “Yahuar Allpa” nisha ninmi. 20Salmos libropica:
“Paipac huasica
shitashca saquirichun,
chai huasipica
pipish ama causachun” nicunmi.
Chashnallatac:
“Pai ruhuanataca,
shuc runa ruhuachun” nicunmi.
21Apunchic Jesus-huan ñucanchic puricucpi, punzhanta ñucanchic-huan puric runacunaca tiyanmi. 22Paicunaca Juan bautizacui punzhamanta pacha, Jesús jahua pachaman ringacamanmi ñucanchic-huan puric carca. Paimanta shucta Jesús causarishcata ñucanchic-huan huillachun acllashunchic» nirca.
23Pedro chashna nicpimi, ishcai runata chicanyachirca. Shucca Justo nishca José Barsabasmi carca. Cutin caishucca Matiasmi carca. 24Chaimanta Diosta mañashpaca: «Mandac Dioslla, canmi tucuipac shunguta ricsingui. Cunanca, cai ishcai runacunamanta, maijan can acllashcata ricuchiyari. 25Maijan can acllashcataca Judaspac randi ñucanchic-huan canmanta huillachunmi munanchic. Judasca millaita ruhuashcamantami canmanta huillanata saquishpa huañushpa, llaqui tucurca» nirca.
26Chashna mañashpami suerteta ruhuacpica, Matiasman urmarca. Chaimantami Matiasca chunga shuc apostolcunahuan tandanacurca.
Currently Selected:
HECHOS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.