1 TESALONICENSES 1
1
Saludashcamanta
1Cai quillcataca ñuca Pablomi Silvanohuan, Timoteohuan Tesalónica pueblo tandanacushca criccunaman cachanchic. Cancunaca Dios-huanpish, Apunchic Jesucristohuanpish shuc shinallami canguichic. Dios mai cuyashpa, sumac causaita cushca cachun ninchicmi.
Tesalónica pueblo criccuna alli crishcata ricuchishcamanta
2Ñucanchic mañacushpa, tucui cancunata yuyarishpaca, Diosta pagui nishpami mañacunchiclla. 3Cancuna tucui shunguhuan crishpa, Diosta cuyashpa, paipacta ruhuacushcamanta, llaquita apacushpapish mana manchashpa, Apunchic Jesús cutimunata shuyacushcamantami ñucanchic Diosta mañacushpaca, pagui nicunchiclla. 4Cuyashca criccuna, Diosllatac cancunata cuyashpa acllashca cashcataca yachanchicmi. 5Ñucanchic cancunaman alli huillaita huillacushpaca, mana rimaillahuanchu yachachircanchic, ashtahuanpish Diospac poderhuan, Espirituhuan, allita yachashpami, cancunapac allipac yachachircanchic.
6Cancuna llaquihuan cashpapish, Diospac espíritu cushichicpi, cushilla caticushpaca, ñucanchic catic shinallatacmi Apunchic Jesusta caticunguichic. 7Chashna catishpami, cancunaca Macedonia llacta, Acaya llacta tucui criccunamanca allita catinata ricuchircanguichic. 8Chaica, cancuna crishcataca mana Macedonia llactallapi, mana Acaya llactallapichu yachac chayashcacuna, ashtahuanpish tucui llactacunapimi cancunamanta uyashpaca, Diosmanta alli huillaita yachac chayashcacuna. Chaimantami cancuna alli crishcataca ña mana huillana canchic. 9Chaipac randica, paicunallatacmi ñucanchicta cancuna ima shina chasquishcata, ruhuashcalla dioscunata saquishpa, causac Diostatac servi callarishcata parlancuna. 10Shinallatac huañushcacunapuramanta Dios causachishca quishpichic Jesucristo jahua pachamanta shamunata shuyacushcatapish, Dios piñarishpa llaquichimanta pai quishpichic cashcatapish parlancunami.
Currently Selected:
1 TESALONICENSES 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.