1 REYES 1
1
Abisag soltera Davidta servishcamanta
1Jatun mandac David ña achca huatacunata charishcamanta yallita yuyac cacpica, catacunahuanmi pilluchircacuna, shina pilluchicpipish, manatac cunuricchu carca. 2Chaimantami paita serviccunaca: «Jatun mandacta servishpa paipac ladopi sueñushpa, paita cunuchichunca carihuan manarac chayarishca, cunan huiñai shuc solteratami mashcana can» nircacuna. 3Shina nicpimi, tucui Israel llactata mashcashpa rishpa, sunamitapuramanta Abisag shuti sumac solterata jatun mandacpacman pushamurca. 4Chai solteraca sumacmi carca. Paimi jatun mandactaca cuidashpa, servishpa causacurca. Shina cacpipish, jatun mandacca paipica mana chayarircachu.
Adonías jatun mandac tucunata munashcamanta
5Chai shina cacpimi, Haguit huarmipac cari huahua Adoniasca: «Ñucami mandana cani» nishpa jatun tucushpa puricurca. Shina nishpami carretacunata ruhuachishpa, caballocunatapish randishpa, paita cuidachunca pichca chunga soldadocunatapish tandachirca. 6Shina cacpipish, paipac taita Davidca pai ima mana allita ruhuacpipish: «¿Ima nishpatac chashna ruhuacungui?» nishpaca, mana rimacchu carca. Adoniasca alajami carca. Paica Absalonpac quipami huacharirca. 7Paica Sarviapac cari huahua Joabhuan, Abiatar curahuanmi apanacuc carca. Paicunami ayudaccuna carca. 8Shina cacpipish, Sadoc curapish, Joiadapac churi Benaiaspish, Dios ima nishcata huillac Natán, Simei, Rei shuti mandaccuna shinallatac Davidhuan cac tucui jatun mandaccunapish Adoniastaca mana catircacunachu. 9Ashtahuanpish Adoniasca Rogel yacu ladopi tiyac Zohelet rumi quingrai ladopimi ovejacunata, huagracunata ashtahuan huira shuctac animalcunatapish, huañuchishpa jatun mandacpac churi paipac huauquicunata, jatun mandacta servic Judá gentecunatapish cayarca. 10Shina cayashpapish, Dios ima nishcata huillac Natanta, Benaiasta, Davidhuan cac jatun mandaccunata, shinallatac paipac huauqui Salomontapish mana cayarcachu.
11Shina cacpimi, Natanca Salomonpac mama Betsabetaca:
—Ñucanchic amo David mana yachacpi, Haguit huarmipac cari huahua Adonías mandacuctaca, ¿manachu yachangui? 12Riqui, cunanca cantapish, cambac cari huahua Salomontapish ama huañuchichunca, ñuca yuyaita cushcata uyai. 13Jatun mandac Davidpacman rishpa: “Ñuca amo jatun mandaclla, ¿manachu canta servic ñucataca: ‘Ñucapac quipataca cambac huahua Salomonmi jatun mandac tucunga? Paimi ñuca mandashpa tiyarinapica tiyaringa’ nircangui. Shina cashpaca, ¿ima nishpatac Adonías mandacunyari?” ningui. 14Jatun mandac-huan can chashna parlacucpimi, ñucapish canta catishpa yaicusha. Chaipimi, can ima shina nicushcataca chashna cashcata huillasha— nirca.
15Shina nicpimi, Betsabeca jatun mandac Davidpac ucuman yaicurca. Jatun mandacca ña yuyacmi carca. Shina cacpimi, sunamitapuramanta Abisag solteraca servishpa causacurca. 16Betsabeca mandacpac ñaupapimi pambacaman cumurirca. Chaimantami jatun mandacca:
—¿Imatatac ningui?— nishpa tapurca.
17Shina tapucpimi Betsabeca:
—Ñucata mandaclla, canta Mandac Diospac shutipica: “Cambac huahua Salomonmi ñuca huañushca quipaca mandanga. Paimi ñuca mandashpa tiyarinapica tiyaringa” nircanguimi. 18Riqui, cunanca Adoniasmi mandacun. Chaitaca, ñuca amo can jatun mandacca cunancaman manarac yachanguica. 19Paica huirayashca huagracunatapish, shuctac animalcunatapish, achca ovejacunatapish huañuchishpami, shuc jatun micunata ruhuashca. Chai micuimanmi can jatun mandacpac caishuc churicunatapish, Abiatar curatapish, soldadocunata mandac Joabtapish cayashca. Ashtahuanpish, canta servic Salomontaca mana cayashcachu 20Ñuca amo, jatun mandaclla tucui israelcunamari can jatun mandacpac randi, jatun mandac cachunca canllatac acllashpa saquichun shuyacuncuna. 21Can mana chashna ruhuacpica, ñuca amo can jatun mandac huañushpa cambac ñaupa taitacunahuan tandanacugrishca quipaca ñucapish, ñuca huahua Salomonpish juchanchishcami cashun— nirca. 22Betsabé jatun mandac-huan chashna parlacucpimi, Dios ima nishcata huillac Natanca chayarca. 23Pai ña chayamucpica: «Riqui, Dios ima nishcata huillac Natanmi shamushca» nishpami, jatun mandacman huillarcacuna.
Pai yaicushpaca, jatun mandacpac ñaupapimi allpacaman, 24cumurishpaca:
—Ñuca amo jatun mandaclla, ¿canchu: “Ñucapac quipataca Adoniasmi jatun mandac tucunga. Paimi ñuca mandashpa tiyarinapica tiyaringa” nircangui? 25Cunanmi paica huirayashca huagracunata, shuctac animalcunata, achca ovejacunatapish huañuchishpa, jatun micuita ruhuangapac urai rishca. Chai micuimanmi can jatun mandacpac tucui caishuc churicunata, soldadocunata mandaccunata, shinallatac Abiatar curatapish cayashca. Riqui, paicunaca paipac ñaupapimi micushpa ubiashpaca: “¡Jatun mandac Adoniasca causacuchunlla!” nishpa caparicun. 26Shina cashpapish canta servic ñucata, Sadoc curata, Joiadapac churi Benaiasta, canta servic Salomontaca mana cayashcachu. 27Chashna ruhuachunca, can jatun mandac ñuca amollatac mandashca canataca mana crinchicchu, can jatun mandac ñuca amopac jatun tiyarinapi cambac randi maijan tiyarishpa mandana cashcataca canta serviccunamanca, ¿maitatac mana huillanguiman carcayari?— nirca.
Davidca Salomonta jatun mandac cachun churashcamanta
28Shina nicpimi, jatun mandac Davidca: «Betsabeta cayamuichic» nirca. Shina cayacpimi, paica ucuman yaicushpa jatun mandacpac ñaupapi shayarirca. 29Chaipimi jatun mandac Davidca:
—¡Mandac Diospac shutipimi nini!: Tucui llaquimanta ñuca almata quishpichishcami. 30Ñucaca israelcunata Mandac Diospac ñaupapimi: “Ñucapac randica Salomonmi jatun mandac tucunga. Paimi, ñuca mandashpa tiyarinapica tiyaringa” nircani. Chashna nishca shinallatacmi, cunanca pactachigrini— nirca.
31Shina nicpimi, Betsabeca pambacaman cumurishpa jatun mandacpac ñaupapi cungurishpaca:
—Ñuca amo jatun mandac Davidca huiñaita causacuchunlla— nirca.
32Chai quipami jatun mandac Davidca Sadoc curatapish, Dios ima nishcata huillac Natantapish, shinallatac Joiadapac churi Benaiastapish cayachirca. Paicuna mandacpac ñaupaman ña yaicucpimi, 33jatun mandacca:
—Cunanca, cancunapac amo ñucata serviccunata tandachishpa, ñuca churi Salomontaca ñuca tiyarina mulapi tiyachishpa, Gihón yacu junduman pushaichic. 34Chaipimi Sadoc curapish, Dios ima nishcata huillac Natanpish Salomontaca israelcunata jatun mandac cachun aceitehuan cahuinga. Chai quipaca trompetapi tocachishpaca: “¡Jatun mandac Salomón causachun!” nishpa caparinguichic. 35Chai quipaca, paita cuidashpa paipac huashata shamunguichic. Pai shamushpami, ñuca mandashpa tiyarinapi tiyarishpa, ñucapac randi mandanga. Paitami Israel llactata shinallatac Judá llactata mandac cachun acllarcani— nirca.
36Shina nicpimi, Joiadapac churi Benaiasca jatun mandactaca:
—Chashna cachun. Ñuca amo jatun mandacpac Mandac Diosca chashna ruhuachun. 37Mandac Diosca ima shinami ñuca amo jatun mandac-huan carca, chashnallatac Salomonhuanpish cachun. Pai mandanataca ñuca amo can jatun mandac David mandacushcatapish ashtahuan jatunta ruhuashca cachun— nirca.
38Chai quipami, Sadoc curapish Dios ima nishcata huillac Natanpish, Joiadapac churi Benaiaspish, cereteo, peleteo runacunapish, urai rishpa Salomontaca jatun mandac David tiyarina mulapi tiyachishpa, Gihón yacu junduman pusharcacuna. 39Sadoc curaca Dios-huan tupana huasiman yaicushpa, gachupi aceiteta tallishpa apashpami, Salomontaca aceitehuan cahuirca. Chai quipaca trompetapi tocashpaca: “¡Jatun mandac Salomón causachun!” nishpa, tucui caparirca.
40Chai quipaca tucui mashnami cantashpa, flautacunapi tocashpa, yallita cushicushpa, Salomonta catishpa, huichai rircacuna. Allpa cuyurictami yallita caparirca.
41Adoniaspish, jatun micuiman pai cayashcacunapish ña micushca quipaca trompetapi tocashcatami uyarcacuna. Shina uyashpami Joabca: «¿Ima nishpatac pueblopica yallita caparicun?» nirca.
42Pai shina nicucllapitacmi Abiatar curapac churi Jonatán chayarca. Pai chayacpimi Adoniasca:
—Yaicumuilla, canca imatapish mana manchac runami cangui. Canca alli huillanatami apamucungui— nirca.
43Shina nicpimi, Jonatanca Adoniastaca:
—Mana, ñucanchicpac amo jatun mandac Davidca Salomontami jatun mandac cachun churashca. Chaitami huillac shamuni. 44Pai jatun mandacca Sadoc curata, Dios ima nishcata huillac Natanta, Joiadapac churi Benaiasta, cereteo, peleteo runacunatami, Salomonhuanca cachashca. Paicunami Salomontaca jatun mandacpac mulapi tiyachishca. 45Shinallatac Sadoc curahuan, Dios ima nishcata huillac Natanhuanca Gihón jundu yacu ladopimi, Salomontaca, jatun mandac cachun aceitehuan cahuishcacuna. Quipataca yallita cushicushpami, paicunaca huichai shamushpa, pueblopipish yallita caparin. Chaica, chaitami canca uyashcangui. 46Chaipac jahuapica, ñami Salomonca mandashpa tiyarinapi tiyacun. 47Chashnallatac jatun mandacta serviccunapish, ñucanchic amo jatun mandac Davidta bendiciangapac rishpaca: “Diosca Salomonpac shutitaca cambac shutitapish yalli ashtahuan alli ricsichun, shinallatac Salomón mandanaca can mandacushcata yalli jatun cachun” nircacuna. Chaimantami jatun mandac Davidca paipac camallapitac Diosta alli nirca. 48Jatun mandacca: “Israelcunata Mandac Diosca alli nishca cachun. Cunanca paimi ñuca mandashpa tiyacushcapi tiyarichun, ñuca causacucpirac ñuca ñahuihuan ricuchun churashca” nircami— nirca.
49Chashna huillacpimi, Adoniaspac micuiman cayashcacunaca mancharishpa chucchurcacuna. Paicunaca chaimanta jatarishpami, paicunapac ñanta japishpa rircacuna. 50Ashtahuanpish Adoniasca Salomonta manchashpami, Diospac carpa huasiman rishpa, chaipi tiyac altar gachucunapi japirishpa carca. 51Chai quipami Salomontaca:
—Adoniasca can jatun mandac Salomonta manchashpami, altar gachucunapi charishpa chayacun. Paica, can Jatun mandac Salomontaca: “Cunanllata canta servic ñucata ama huañuchingapac ari niyari” nicunmi— nirca.
52Shina huillacpimi Salomonca:
—Pai allita ruhuac runa cacpica, paipac umamantaca shuc acchallapish mana urmangachu. Ashtahuanpish, pai ima mana allita ruhuashca ricuricpica, huañuchishcami canga— nirca.
53Jatun mandac Salomonca Adoniasta altarmanta uricuchishpa pushamuchunmi cacharca. Pai chayamushpaca, jatun mandac Salomonpac ñaupapimi cumurirca. Chashna cumuricpimi, Salomonca:
—Cambac huasiman rilla— nishpa cacharca.
Currently Selected:
1 REYES 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.