1 CORINTIOS 1
1
Corinto pueblopi causac criccunaman Pablo quillcashcamanta
1Dios munashcamanta, Jesucristopac apóstol cachun cayashca Pablomi huauqui Sostenes-huan 2Corinto pueblopi cac Diospaclla tandanacushca criccunaman, caitaca quillcani. Cancunaca Cristo Jesus-huan shuclla tucushcamanta, Diospaclla tucushpa, shuctac llactacunapi Apunchic Jesucristoman tucui mañaccunahuan pacta, pai Diospaclla cachun acllashpa cayashcacunami canguichic. Apunchic Jesucristoca shuctac llactapi causaccunapacpish, ñucanchicpacpish Mandacmi. 3Ñucanchic Diospish Apunchic Jesucristopish cancunata cuyashpa, sumac causaita cushca cachun.
Apunchic Jesucristomanta allicunata chasquina cashcamanta
4Cristo Jesusmanta Dios cancunata cuyashcamantaca, punzhantami Diostaca pagui nicuni. 5Cristomantami cancunaca yallita yachaccunapish, allita rimaccunapish canguichic. 6Cristomanta cancunaman huillashcataca, shungupimi chasquishcanguichic. 7Shina cacpimi, Apunchic Jesucristo cutimunata cancuna shuyacuccunamanca, Dios cushcacunaca imapish mana illanga. 8Shinallatac Pai cutimui punzhapi ama pi juchanchichunmi, tucuri punzhacaman sinchi cricta ruhuashpa charinga. 9Pai nishcataca pactachic Diosmi paipac Churi ñucanchic Apunchic Jesucristohuan shuclla tucushpa causachun cayarca.
Tandanacushca criccunapura chicanyarinacui tiyashcamanta
10Cuyashca criccuna, Apunchic Jesucristopac shutipimi ama chicanyarinacushpa, tucui imapipish shuc yuyailla, shuc shinalla yuyarishpa, cuyanacushpa causaichic nini. 11Cuyashca criccuna, chaica Cloé aillupuramanta shucmi cancunapura chicanyashcata huillarca. 12Cancunapuramanta maijanca: «Ñucaca Pablota caticmi cani», maijanca: «Ñucaca Apolosta caticmi cani», maijanca: «Ñucaca Cefasta caticmi cani», cutin maijanca: «Ñucaca Cristota caticmi cani» nicuctami uyani. 13¿Cristoca chaupirishcachu? ¿Pablochu cancunamanta cruzpi chacatarirca? Mana cashpaca, ¿Pablopac shutipichu bautizarircanguichic? 14Cancunapuramantaca maijantapish mana bautizarcanichu, ashtahuanpish Crispota, shinallatac Gayollatami bautizarcani. Chaimantaca Diostami pagui nini. 15Chaimantaca Pablopac shutipimi bautizarircani nishpaca, pipish mana ningachu. 16Estéfanas aillutapish bautizarcanimi. Chaimanta pi shuccunata bautizashcataca mana yuyarinichu. 17Cristoca mana bautizachunchu ñucataca cacharca, ashtahuanpish alli huillaita huillachunmi cacharca. Cristo cruzpi huañushcata yangapi mana churangapacmi, mana jatun yachac tucushpa huillacuni.
Cristoca, Diospac poderhuan shinallatac yachac cashcamanta
18Cristo cruzpi huañushcata huillashcaca, pucllashca shinami chingarinaman riccunamanca ricurin. Ashtahuanpish ñucanchic quishpirinaman riccunamanca, Diosca poderyuc cashcatami ricuchin. 19Dios quillcachishcapica:
«Jatun yachaccuna yachashcataca
chingachishami.
Shinallatac
alli yuyaita chariccunapac,
yuyaitapish
anchuchishami» ninmi.
20Shinaca, ¿maipitac chai yachaisapaca? ¿Maipitac chai yachachicca? ¿Maipitac cai pacha yachaimanta ricuchicca? Cai pachamanta yachaitaca Diosmi pucllaita shina ruhuashca.
21Diosca, cai pachapi causaccuna paicuna yachashcahuan paita ricsichunca mana saquinchu. Alli huillai paicunaman pucllashca shina cacpipish, Diosca maijanpish paita criccunatami cuyashpa quishpichisha nicun. 22Judiocunaca milagrotami ruhuachun nincuna. Cutin griegocunaca imatapish yachanatami munancuna. 23Shina cacpipish, ñucanchicca Cristo cruzpi huañushcatami huillacunchic. Cai huillashcaca judiocunataca nanachic shinami, cutin mana judiocunamanca pucllashca shinami ricurin. 24Ashtahuanpish Dios cayashcacunamanca, judiocunaman cashpa, griegocunaman cashpa, Cristomanta huillashcaca Dios imatapish ruhuaclla, shinallatac yachac cashcatami ricuchin. 25Cai pachapi causaccunapac Dios huillashca pucllashca shina cashpapish, tucui cai pachapi cac yachachishcacunamanta yallimi. Shinallatac Dios ruhuashcaca imapac mana valic shina cashpapish, tucui cai pachapi ruhuashcacunamanta yalli valishcami.
26Cuyashca criccuna, gentecuna yuyashca shina ashacunalla yachaccuna cacpipish, ashacunalla mandaccuna cacpipish, ashacunalla alli nishca aillucuna cacpipish, Diosca cancunata cayashcami. Chaitami yuyarina canguichic. 27Yachaccunata pingaichingapacmi, imata mana yachac nishcacunata Diosca acllashca. Shinallatac valishca gentecunata pingaichingapacmi, imapacpish mana valichishcata acllashca. 28Jatun yachaccunata yangapi churangapacmi, cai pachapi mana alli nishca, imapacpish mana valichishca yangalla gentecunata Diosca acllashca. 29Chaimantami Diospac ñaupapica pipish mana jatun tucunga. 30Ashtahuanpish Diosllatacmi cancunataca Cristo Jesus-huan shucllata ruhuarca. Diosmi Cristomantaca jatun yachacta, cashcata ruhuacta, jucha illacta ruhuashpa quishpichirca. 31Shina cacpimi Dios quillcachishcapica: «Maijanpish jatun tucusha nishpaca, Mandac Diosmanta jatun tucuchun» nicun.
Currently Selected:
1 CORINTIOS 1: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.