Matius 2
2
Toratu jio mai kadellekan la ssompa Puang Isa
2:1-12
1Ia tonna jajimo Puang Isa jio kota Betlehem, ratumi jao kota Yerusalem to ba'tu pira-pira tomacca ngkita bintuin jio mai kadellekan. Ia to kota Betlehem mesa' kota jio tana Yudea, to naparenta Raja Herodes. 2Namekutana to tau nakua, “Umbora nanii jaji to pea la menjaji rajana to-Yahudi? Kikita to bintuin-Na jao langi' jio kadellekan, na la ratukan ssuju'i.” 3Gaja sabakanmi to Raja Herodes sola tobuda jio kota Yerusalem tonna sa'dingngi to apa napau tee topakita bintuin. 4Nasuami Raja Herodes to kapala imang sola guru agama sirempun. Nakutanaimi nakua, “Umbora la nanii jaji to Raja Mangpasalama', to pura napau jolomo Puang Allataala?” 5Pada nakuamo mebali, “Jio kota Betlehem, jio tana Yudea, nasaba' susimo joo to mangka nauki' nabi tonna anu',
6‘Ee, kamu' to-Betlehem, jio tana Yehuda,#2:6 Ia to disanga tana Yudea jolona disanga tana Yehuda
te'da kumua kotamimo biccukkuna,
nasaba' lan mai tangnga-tangngami la den to menjaji
tolamparenta umma'-Ku' to-Israel.’ ”#Mikha 5:1
7Ia tonna issenmi Raja Herodes umbo nanii la jaji Raja Mangpasalama', napangpetambaian bunimi tee topakita bintuin, nakutanaii la ngkanassai kumua, “Umbora wattu mikitai joo bintuin?” 8Ia tonna mangkamo mpauanni, nasuami male lako kota Betlehem, napasanni kumua, “Malemo kamu' nnangah meloi joo pea. Na ia ammiampa'mi, pauanna', kumale toda ssuju'i.”
9-10Ia tonna mangkamo ssa'ding kadanna raja tee topakita bintuin, mpatarruhmi kalingkanna. Gaja parannu penawanna, nasaba' nakita pole' omi to bintuin to mangka nakita jio kampongna. Ia joo bintuin njoloanni, namane' torro jao sipatunna to bola nanii torro joo pea. 11Mentamami bola tee topakita bintuin, nakitai joo pea sola Maryam indona, anna suju' ssompai. Nabukaimi to sepu' ewanan nabawanni tee pea, napangngoloi to bulawan, kamanynyang sola mur#2:11 Ia to kamanynyang mesa' lite kaju digaraga na gaja bunangnguk. Ia to mur lite kaju makasemo to bunangngu' na gaja suli' too.. 12Ia tonna polemo lako kampongna, lalan leko'mo naola, nasaba' napangngingaranni Puang Allataala lan tindona nakua, “Danggi'mo mimale ssikitan pole' Raja Herodes.”
Yusuf mpalaian Isa sola indona lako tana Mesir
2:13-15
13Mangkai joo too, nakitami Yusuf to malaeka'-Na Puang Allataala lan tindona ngkuanni kumua, “Mi'cokko, palaianni tuu pea sola indona lako tana Mesir, nasaba' naangahhi Raja Herodes la nabuno! Torroko jio, na kupauanpoko, mumane' pole jio mai!” 14Ta'pa mi'cokmi to Yusuf joo bongi, namale mpalaianni to Puang Isa sola indona do' tana Mesir. 15Torromi jio ratu lako matena Raja Herodes.
Susimi joo najaji to kadan-Na Puang Allataala mangka napau nabi tonna anu' kumua, “Jio mai tana Mesir kutambaii to Anak-Ku'.”#Hosea 11:1
Pea'-pea' muane dibuno jio kota Betlehem
2:16-18
16Mabirihmi to Raja Herodes tonna issenmi kumua nauragai tee topakita bintuin, nasaba' lalan leko'mi naola. Napangparentanmi kumua la dibuno ngasan to pea muane to te'dapa natallung taun umuru'na jio kota Betlehem na mengguririkkina. Nasaba' sipatumo to wattu napauanni topakita bintuin.
17Susimi joo najaji to kadan-Na Puang Allataala to mangka napau Nabi Yeremia tonna anu' kumua,
18“Jio kampong Rama#2:18 Ia to kota Betlehem mentama tanana Benyamin. Rahel, iamo indona Benyamin, dilamun jio Rama. Jaji kumarrak tee Rahel, nasaba' dibuno bati'na jio kota Betlehem. den sarro na karrak nasa'ding tau.
Rahel mbatingngi bati'na.
Na cia'mi dipakatana to masse penawanna,
nasaba' te'damo bati'na.”#Yeremia 31:15
Yusuf ssolan Isa sola indona jio mai tana Mesir
2:19-23
19Ia tonna matemo Raja Herodes, nakita pole' omi Yusuf jio tana Mesir to malaeka'-Na Puang Allataala lan tindona, ngkuanni kumua, 20“Mi'cokmoko, mumale ssolanni tuu pea sola indona lako tana Israel, nasaba' mate ngasanmi to tolambunoi.” 21Mi'cokmi, namale ssolanni to Puang Isa sola indona lako tana Israel. 22Apa malaja'i Yusuf pole lako tana Yudea, sanga nasa'dingngi kumua ia to Arkhelaus anakkana Raja Herodes ssulle ambe'na mangparenta jio tana Yudea. Napatujui Puang Allataala lan tindona anna male re' tana Galilea. 23Ia tonna ratumo re', torro jiomi mesa' kota disanga Nazaret.
Susimi joo najaji to kadan-Na Puang Allataala mangka napau ba'tu pira-pira nabinna tonna anu' kumua, “La disanga to-Nazaret to Raja Mangpasalama'.”
Currently Selected:
Matius 2: mvpAD
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.