MATEU 14
14
Go bolawa ga Johanese Mokolobetši
(Mar. 6:14-29; Luk. 9:7-9)
1Ka nako yeo Kgoši Heroda a kwa ka ga Jesu. 2A botša bahlankedi ba gagwe a re: “Ruri, yo ke Johanese Mokolobetši, o tsogile bahung. Ke ka lebaka leo a nago le maatla a go dira mehlolo.”
3 Gape Heroda o be a ile a laela gore Johanese a swarwe, a tlengwe, a lahlelwe kgolegong. Taba yeo o be a e dirile ka lebaka la Herodiase, mosadi wa Filipi, morwarragwe, 4 ka ge Johanese a be a mo kgadile a re: “Ga se tshwanelo gore o tšee Herodiase!” 5Le ge Heroda a be a rata go bolaya Johanese o be a boifa Bajuda, ka ge ba be ba re ke moprofeta.
6Fela mohla go binwa monyanya wa matswalo a Heroda, morwedi wa Herodiase a bina pele ga baeng. A kgahla Heroda 7moo Heroda a ilego a mo enela gore o tla mo fa se a ka mo kgopelago sona.
8Ngwanenyana, ka ge a be a hlohleleditšwe ke mmagwe, a re: “Ntlišetše hlogo ya Johanese Mokolobetši ka sebjana gonabjale.”
9Kgoši a nyama, eupša ka lebaka la ge a be a enne pele ga baeng, a laela gore go phethwe ka moo ngwanenyana a kgopelago ka gona. 10Ka fao a roma motho a yo kgaola Johanese hlogo ka kgolegong. 11Hlogo yeo ya gagwe ya tlišwa go ngwanenyana ka sebjana. Yena a e tšea a e iša go mmagwe. 12Barutiwa ba Johanese ba tla ba tšea setopo sa gagwe, ba yo se boloka; ke moka ba tloga ba yo botša Jesu se se diregilego.
Jesu o fa batho ba bantši dijo
(Mar. 6:30-44; Luk. 9:10-17; Joh. 6:1-14)
13Ge Jesu a ekwa tše di hlagetšego Johanese, a tloga fao ka leselawatle a nnoši a ikela felo mo gongwenyana mo go se nago batho. Batho ba kwa gore o ile kae, mme ba tloga metseng ya bona ba mo latela ba sepela ka maoto. 14Jesu ge a etšwa ka leselawatleng a bona lešaba le legolo, a le šokela, gomme a fodiša balwetši ba bona.
15Mantšiboeng ao barutiwa ba gagwe ba tla go yena ba re: “Felo mo go kgole le metse, le gona nako e šetše e ile. Botša batho gore ba ye metseng ba ithekele dijo.”
16Jesu a ba fetola a re: “Ga ba swanela go tloga. Lena ba feng tša go ja.”
17Bona ba mo fetola ba re: “Rena mo re swere fela dinkgwa tše tlhano le dihlapi tše pedi.”
18Jesu a re: “Di tlišeng mo.” 19A laela batho gore ba dule fase bjanyeng; ke moka a tšea dinkgwa tšela tše tlhano le dihlapi tšela tše pedi, a lebelela legodimong, a reta Modimo, a mo leboga. A ngwathaganya dinkgwa tšela, a di neela barutiwa ba gagwe, gomme barutiwa ba di fa batho. 20Bohle ba ja ba khora. Ba kgoboketša marathana a a šetšego, mme a tlala diroto tše lesome le metšo ye mebedi. 21Ba ba llego e be e ka ba banna ba dikete tše tlhano, go sa balwe basadi le bana.
Jesu o sepela godimo ga meetse
(Mar. 6:45-52; Joh. 6:15-21)
22E sa le semeetseng Jesu a laela barutiwa ba gagwe gore ba namele leselawatle, ba mo ete pele ba tshelele ka mošola wa letsha, mola yena a sa botša batho gore ba boele magae. 23Ge a seno ba phatlalatša, a namela thaba a nnoši gore a yo rapela. Ya ba ya ba mantšiboa a le moo a nnoši; 24gomme ka nako yeo leselawatle le be le šetše le le garegare ka letsheng, le akgaakgwa ke maphoto ka gobane ba be ba lebane le phefo ye e tšubutlago.
25Ya re letšatši le sešo la hlaba Jesu a tla go barutiwa ba gagwe a sepela godimo ga meetse a letsha. 26Ge ba mmona a sepela godimo ga meetse ba tšhoga kudu ba re: “Ke seriti!” Gomme ba hlaba mokgoši.
27Jesu a akgofa a bolela le bona a re: “Betang dipelo! Ke nna – le se ke la boifa!”
28Petrose a re: “Morena, ge eba ke wena, ntaele gore ke tle go wena ke sepela godimo ga meetse.”
29Jesu a mo fetola a re: “Tlaa!” Ka gona Petrose a tšwa ka leselawatleng a sepela godimo ga meetse a lebile Jesu. 30Eupša ya re ge a bona gore phefo e tšubutla kudu, a boifa, gomme a thoma go sobela ka meetseng. A goa a re: “Morena, mphološe!”
31Gateetee Jesu a obeletša letsogo, a mo swara, a re go yena: “Wena wa tumelo ye nnyane, o reng o belaela?”
32Ya re ge ba tsene ka leselawatleng phefo ya homola. 33Ke moka barutiwa bale ba ka leselawatleng ba khunamela Jesu ba re: “Ruri, ke wena Morwa wa Modimo!”
Jesu o fodiša balwetši Genesarete
(Mar. 6:53-56)
34Ba tshela letsha ba fihla Genesarete 35moo batho ba gona ba ilego ba lemoga gore ke Jesu. Ka gona ba roma batseta tikologong ka moka ya moo go yo botša batho gore ba tliše balwetši go Jesu. 36Ba mo kgopela gore balwetši ba upše ba no kgwatha morumo wa seaparo sa gagwe, gomme bohle ba ba o kgwathago ba fola.
Currently Selected:
MATEU 14: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.