JOHANESE 12
12
Jesu o tlotšwa motseng wa Bethania
(Mat. 26:6-13; Mar. 14:3-9)
1E rile ge go šetše matšatši a a selelago gore Monyanya wa Paseka o fihle, Jesu a ya Bethania, motsaneng wa gaboLasarose yola Jesu a bego a mo tsošitše bahung. 2Gona moo ba mo apeela dijo, gomme Marta a solela baeng. Lasarose e be e le yo mongwe wa bao ba bego ba dutše le Jesu dijong. 3 Ke ge Maria a ntšha sedibelo sa senkgabose se se sego sa tswakwa sa theko ye kgolo sa narete, a tšhela Jesu maoto ka sona, a mo phumola ka moriri. Ntlo yohle ya tlala monkgo wa senkgabose seo. 4Yo mongwe wa barutiwa ba Jesu yo ba rego ke Judase Iskariote, yena yola a bego a eya go mo eka, a re: 5“Ke eng senkgabose se se sa ka sa rekišwa dipapetlana tše makgolo a mararo tša silibera, gomme tšhelete ya gona ya fiwa badiidi?” 6Etse ge a realo e be e se gore badiidi o na le taba nabo, e be e le ka lebaka la ge e le lehodu. Sekhwama sa tšhelete se be se swarwa ke yena, gomme a fela a iša seatla ka go sona.
7Jesu a re: “Mo tlogele! Senkgabose se e be e le sa go tlo ntlotša mohla ke bolokwa. 8 Gobane badiidi le na le bona ka mehla; nnaena le ka se be le nna ka mehla.”
Lasarose o a lakanwa
9Bajuda ba bantši ba ile ba kwa gore Jesu o Bethania, gomme ba ya gona, e sego ka lebaka la Jesu fela, eupša le gore ba bone Lasarose yo Jesu a bego a mo tsošitše bahung. 10Ka gona baprista ba bagolo ba lakana gore ba tle ba bolaye le Lasarose, 11ka gobane Bajuda ba bantši ba be ba šetše ba ba tlogela, ba dumela go Jesu.
Jesu o a thabelwa ge a tsena Jerusalema
(Mat. 21:1-11; Mar. 11:1-11; Luk. 19:28-40)
12Ka tšatši le le latelago lešaba le lentši le le bego le tlile Monyanyeng wa Paseka la kwa gore Jesu o tla mono Jerusalema. 13 Ke moka ba rema makala a mepalema ba ya go mo gahlanetša, ba phepela ba re: “A go tumišwe Modimo! A go retwe yo a tlago a romilwe ke Morena! A go retwe yena Kgoši ya Israele!”
14Jesu a re go bona pokolwana a e namela, bjalo ka ge go ngwadilwe ka Mangwalong a Makgethwa gwa thwe:
15 “Se boife, wena motse wa Sione!
Bona kgoši ya gago,
e tla e nametše pokolwana!”
16Ka nako yeo barutiwa ba gagwe taba tše ba be ba sa di kwešiše; fela e rile ge a seno tsoga bahung a rotogetše legodimong, ya ba gona ba elelwago gore se batho ba mo diretšego sona ke se se ngwadilwego ka Mangwalong a Makgethwa.
17Batho bale ba bego ba na le Jesu ge a goelela Lasarose ka lebitleng a mo tsoša a hwile ba be ba ile ba bega taba ye. 18Ke ka lebaka leo lešaba le mo gahlaneditšego, e le ge le kwele gore o dirile mohlolo woo. 19Ke moka Bafarisei ba botšana ba re: “Gape le ka se mo kgone. Bonang, batho ka moka ba mo šetše morago!”
Tša Bagerike ba ba bego ba nyaka go bona Jesu
20Mo go ba ba bego ba tlile Jerusalema go khunamela Modimo ka nako ya monyanya go be go na le Bagerike ba bangwenyana. 21Bona bao ba ya go Filipi wa go dula Betsaida kua Galilea, ba mo kgopela ba re: “Morena, re nyaka go bona Jesu.”
22Filipi a ya go botša Andrease, gomme Andrease le Filipi ba ya go botša Jesu. 23Ke ge Jesu a ba fetola a re: “Bjale nako ya gore letago la Morwamotho le bonagale e fihlile. 24Ruri, ruri, ke le botša gore ge thoro ya lebele e ka se re go lahlelwa ka mobung ya hwa, e tla no šima e le tee. Fela ge e ka hwa e tla tšwa dithoro tše dintši. 25 Yo a ithatago go feta ka mo a ratago nna, o tla lahlega; eupša yo a sa ithatego mo lefaseng go feta ka mo a ratago nna, yena o tla ba le bophelo bjo bo sa felego. 26Yo a ratago go ntlhankela, a ntatele, gomme ka ge e le mohlanka wa ka, mo ke lego gona le yena o tla ba gona. Ge motho a ntlhankela Tate o tla mo godiša.”
Jesu o bolela ka lehu la gagwe
27“Bjale ke ikwa ke huduegile moyeng; fela ke ge nka reng? Kgane nka re: ‘Tate, mphološe mo nakong ye’? Fela a ke se realo, ka gobane ke sona se ke se tletšego – go hlokofatšwa ka yona nako ye. 28Tate, bonagatša letago la gago!”
Gwa nama gwa kwagala lentšu le etšwa legodimong le re: “Ke le bonagaditše, ebile ke sa tlilo le bonagatša.”
29Lešaba la batho ba ba bego ba eme moo ge le ekwa lentšu leo la re: “E a duma!” Ba bangwe ba re: “Ke morongwa o bolela le yena!”
30Jesu a re go bona: “Ga se ka lebaka la ka ge lentšu le le kwagala, ke ka lebaka la lena. 31Bjale ke nako ya go ahlolwa ga batho ba lefase; bjale mmuši wa lefase le o tlilo rakwa. 32Ge ke phagamišwa mo lefaseng, ke tla gogela batho bohle go nna.” 33Ge a realo o be a šupa lehu le a yago go le hwa.
34 Lešaba la mo fetola la re: “Rena mo melaong ya Moshe re kwa gore Mesia o tla phela go ya go ile. Bjale wena o reng o re Morwamotho o swanetše go phagamišwa? Kgane Morwamotho yo ke mang?”
35Jesu a ba fetola ka go re: “Le sa tlilo ba le seetša sebakanyana. Ka gona, phelang go sona se sa le mo go lena, gore le se tlo welwa ke leswiswi, gobane mophatšaleswiswi ga a tsebe mo a yago gona. 36Ka fao, dumelang go Mohlolaseetša a sa le mo go lena, gore le be batho ba ba phelago seetšeng.”
Go se dumele ga Bajuda
Jesu ge a seno realo a tloga a yo iphihlela bona.
37Le ge a be a dirile mehlolo ye mekaaka ba mo lebeletše, ba ile ba no se dumele go yena; 38 e le gore go phethege tše di boletšwego ke moprofeta Jesaya mola a re:
“Morena,
ke mang yo a dumetšego tše re mmoditšego tšona?
Ke mang yo o mo utolletšego maatla a gago?”
39Ke ka lebaka leo ba paletšwego ke go dumela, gobane Jesaya o boletše le go re:
40 “Modimo o ba foufaditše,
a ba a ba thatafatša,
gore ka mahlo ba se bone,
le ka megopolo ba se kwešiše ba sokologa,
gomme a ba fodiša.”
41Jesaya ge a realo e be e le ka ge a bona letago la Jesu mme a bolela ka yena.
42Le ge go le bjalo, batho ba bantši, ešita le mo go baetapele ba Bajuda, ba be ba dumela go Jesu, fela ka lebaka la Bafarisei ba be ba sa ipege, gore ba se rakwe ka sinagogeng. 43Ba be ba kganyoga go kgahla batho go feta go kgahla Modimo.
Motho o tla ahlolwa ka mantšu a Jesu
44Jesu a bolelela godimo a re: “Yo a dumelago go nna ga se gore o dumela go nna, o dumela go yo a nthomilego. 45Yo a bonago nna o bona yo a nthomilego. 46Ke tlile mo lefaseng ke le seetša, gore mang le mang yo a dumelago go nna a se ke a dula leswiswing. 47Ge motho a ka re a kwele tše ke di boletšego a se di phethe, nna nka se mo tšwe, gobane ga se ka tlela go tšwa batho ba lefase, ke tletše go ba phološa. 48Yo a nkganago, a ganago le tše ke di bolelago, o šetše a na le se se tlago mo tšwa: tše ke di boletšego ke tšona tše di tlago mo tšwa ka tšatši la mafelelo. 49Gobane ga se ka bolela tše ke ithometšego tšona, eupša ke boletše tše ke di laetšwego ke Tate yo a nthomilego. 50Gomme ke a tseba gore tše a di laetšego di fa motho bophelo bjo bo sa felego. Ka gona tše ke di bolelago ke tše ke di laetšwego ke Tate.”
Currently Selected:
JOHANESE 12: NSO00
Highlight
Share
Copy
Want to have your highlights saved across all your devices? Sign up or sign in
Bible in Sepedi 2000 translation © Bible Society of South Africa 2000. Digital Version © Bible Society of South Africa 2012. All rights reserved. www.biblesa.co.za.