Tito 2
2
Atosunahɛ Wanklaan
1Tamɛ fʋ mʋ́ a, suna amʋ́ tɔá ɩlɛkana atosunahɛ wanklaan amʋ. 2Suna ayin dɛhɛn amʋ abʋgyi ɩwɩsʋ, abʋbwɛ aha ánɩ́ obú bʋ amʋ́sʋ, bʋtegyi ɩwɩsʋ. Bʋhɩɛ kɩta amʋ́ hogyitɔ kinkiinkin. Bʋdwɛ aha wanklaan, abʋhɩɛ tomi. 3Suna atsɩ dɛhɛn ɛ abʋtsia tsiatɔá ɩlɛkana Bulu osumpʋ. Bʋmábwɛ aha ɩwɩ asʋn ablɩpʋ, ntɛ ntakpan anunpʋ. Mboun bʋsuna tɔá ɩbʋ alɛ. 4Amʋ́ atosunahɛ ɩha mbitebi amʋ abʋdwɛ amʋ́ aklu pʋ́ amʋ́ abi. 5Bʋgyi ɩwɩsʋ, abʋha amʋ́ ɩwɩ ɩtɩn. Bʋbwɛ atsɩá bʋtɛkɩ amʋ́ woyisʋ wanklaan, bʋtɔbwɛ yile, bʋtobu amʋ́ aklu, mɛnɩ ɔhaa mɔ́ɔkpɔɩ Bulu asʋn amʋ.
6Tɔɩ kpla nyasubi ɛ abʋgyi ɩwɩsʋ togyitɔá bɔ́bwɛtɔ. 7Fʋ onuto ɛ bɔ mbɔdɩ afʋlɛ tsiatɔ wanklaan suna, fʋ bwɛhɛ kugyikʋtɔ. Ha fʋ ansɩ ɩpɛ, afʋsuna ɔnɔkwalɩ asʋn amʋ tsu fʋ klʋntɔ. 8Suna ɔnɔkwalɩ amʋ, mɛnɩ ɔhaa mɛ́ɛtalɩ kʋsʋ lɩɩ fʋ atosunahɛsʋ. Fówun pɛlɩ bɛ́kɩta fʋ alupʋ, nɩ bʋmenya ɔlala blɩ tsu anɩ ɩwɩ.
9Suna nkpábi ɛ abʋbu amʋ́ awie ɔkpagyiɔkpasʋ. Bʋbwɛ togyitɔ igyi amʋ́ awie amʋ ansɩ. Bʋmátsia lɛ amʋ́ asʋn ɔnɔ. 10Bʋmáwi amʋ́ awie, mboun bʋwa ɔnɔkwalɩ ha amʋ́ togyitɔtɔ, mɛnɩ amʋ́ bwɛhɛ bɛ́ha aha ansɩ bégyi anɩ nkpa Ɔhɔpʋ Bulu atosunahɛ amʋ ɩwɩ.
11Tsufɛ Bulu lalɛ mʋ awɩtɔlɛ ɔwan. Mʋ́gyi, odekleá ɔbɔ́hɔ anyankpʋsa fɛ́ɛ́ nkpa. 12Mʋ awɩtɔlɛ amʋ ɩlasuna ánɩ́ ilehian ánɩ́ abési lalahɛ bwɛ, si anɩ ɔwɔlɩ lalahɛ ɔmagya, gyi ɩwɩsʋ, bwɛ yile, anɩ asʋn igyi mʋ ansɩ ɔyɩ anfɩtɔ. 13Brɛ anfɩ anɩdɛ ɔkpa kɩ ha ɛkɛ yile amʋʋ Bulu Ɔkpɔnkpɔntɩ, ogyi anɩ Ɔhɔpʋ Yesu Kristo ɔbɛ́lɛ mʋ numnyam ɔwan anfɩ. 14Mʋlotsula bɔmɔ mʋ anɩ sʋ, mɛnɩ ɔbɛ́lɛ anɩ tsu lakpan kugyikʋtɔ. Ɔtɩn anɩ ɩwɩ, pʋ anɩ bwɛ mʋ onuto aha, anɩ ansɩ ɩpɛ yilebwɛsʋ.
15Suna ɩnɩ aná, afʋtɔɩ kpla amʋ́ abʋgyi mʋ́sʋ. Fʋbʋ ɔkpa wa ɩyɩn wa amʋ́, nɩ bʋmɛdɛbɩ bwɛ. Máha ɔhaa ɔkɩ fʋ ansɩtɔ kotikoti.
Currently Selected:
Tito 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation