Marko 2
2
Tsukʋlɛ Osinpʋ Tsa
(Mateo 9:1-8; Luka 5:17-26)
1Nkɛ kpalobi kʋ ɔma a, Yesu leyinki yɔ Kapernaum wulutɔ. Aha bonu ánɩ́ alaba woyi. 2Mʋ́ sʋ aha tsɔtsɔɔtsɔ bɛba bɔbʋla woyi amʋ. Ɔkpa kʋraa ɩtra ma ɩnʋá fɔ́tsʋn wie mʋ́tɔ. Yesu lɛda Bulu asʋn amʋ ɔkan suna amʋ́. 3Aha abana akʋ bɔsʋra tsukʋlɛ osinpʋ akpasʋ ba mʋ. 4Ɔdɔm amʋ sʋ bʋmenya ɔkpa pʋ mʋ wie Yesu wa. Ɩnɩ sʋ bɔyɔdʋ obu amʋ awunsʋ, da mʋ́ ɔtɩnɛkʋ tii. Bɛkplɩa akpa amʋ tsʋn ɔbɔ amʋtɔ, pʋ mʋ tswɩ Yesu ansɩtɔ. 5Brɛá Yesu lowun ánɩ́ bahɔ mʋ gyi a, ɔlɛbla tsukʋlɛ osinpʋ amʋ ɔbɛɛ, “Mɩ bi, nasi fʋ lakpan kie fʋ.”
6Ɩnʋ Mose mbla asunapʋ akʋá bʋtsie ɩnʋ, bɛblɩ wa nwuntɔ bɛɛ, 7“Ntɔ asʋn oyin anfɩ dɛblɩ alɩ? Megyi mbusuo alabɔ a? Ma ɛ ɔbɛ́talɩ si lakpan kie aha dʋn Bulu nkʋlɛ?”
8Yesu lɛbɩá bʋdɛ nwɛn gyi amʋ́ nwuntɔ. Mʋ́ sʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛ ɩnɩ odu gywɩɩn? 9Mɔmʋ ɩbɔ́wa ablɩlɛ ánɩ́ nɛ́bla tsukʋlɛ osinpʋ anfɩ? ‘Nasi fʋ lakpan kie fʋ> ntɛ ‘Kʋsʋ tsu fʋ akpa afʋnatɩ?> 10Tamɛ ndekleá mlɩbɩá mɩ, Nyankpʋsa-Mʋ-Bi anfɩ mbʋ tumi ɔyɩ anfɩtɔ si aha lakpan kie amʋ́.” Ɩnʋ ɔlɛbla tsukʋlɛ osinpʋ amʋ ɔbɛɛ, 11“Ndɛ fʋ bla mbɛɛ, kʋsʋ! Tsu fʋ akpa afʋnatɩ yɔ woyitɔ!”
12Ɩnʋnʋʋnʋ ɔlɔkʋsʋ tsu mʋ akpa, natɩ amʋ́ ansɩtɔ ɩnʋ. Ɩnɩ lɔwa amʋ́ fɛ́ɛ́ wanwan, bɛkanfʋ Bulu blɩ bɛɛ, “Anɩmɔkʋwun ofula anfɩ odu kɩ.”
Lewi Tɩ
(Mateo 9:9-13; Luka 5:27-32)
13Yesu lɛtra yɔ Galilea ɔpʋ ɔnɔ. Ɔdɔm kpɔnkpɔɔnkpɔntɩ bɛba mʋ wa, olosuna amʋ́ atɔ. 14Brɛá ɔlɔpʋ ɔyɔ a, olowun Alfeo mʋ bi Lewi tsie mʋ lampoo ɔhɔkpa. Mʋʋ ɔlɛbla mʋ ɔbɛɛ, “Bobuo mɩ.” Ɩnʋnʋ ɔlɔkʋsʋ buo mʋ.
15Mʋ́ ɔma a, Lewi lɛtɩ Yesu mʋa mʋ akasɩpʋ atɔ ogyikpa mʋ woyitɔ. Lampoo ahɔpʋ pʋ́ lakpan abwɛpʋ tsɔtsɔɔtsɔ ɛ bobuo mʋ ba atɔ amʋ ogyikpa. 16Brɛá Mose mbla asunapʋ amʋtɔ akʋá bʋgyi Farisifɔ bowun ánɩ́ Yesu mʋa lakpan abwɛpʋ pʋ́ lampoo ahɔpʋ bʋdɛ atɔ gyi a, bɛfɩtɛ mʋ akasɩpʋ bɛɛ, “Ntogyi sʋ mʋa lakpan abwɛpʋ pʋ́ lampoo ahɔpʋ bʋdɛ ɩbɩ wa gyi atɔ?”
17Yesu lonu asʋn anfɩ, ɔlɛbla amʋ́ ɔbɛɛ, “Alɔpʋ lehian ɩlɔ ɔtsapʋ, megyi aha ánɩ́ ɩwɩ bʋ amʋ́ ɔnlɩn. Mmɛba aha wanklaan ɔtɩkpa, mboun lakpan abwɛpʋ ɔtɩkpa nɛba.”
Ɔnɔklɩ Ɩwɩ Asʋn Fɩtɛhɛ
(Mateo 9:14-17; Luka 5:33-39)
18Asu Ɔbɔpʋ Yohane akasɩpʋ pʋ́ Farisifɔ bʋtetsia klɩ ɔnɔ. Ɛkɛ ɔkʋ akʋ bɛba bɛfɩtɛ Yesu bɛɛ, “Ntogyi sʋ Yohane akasɩpʋ pʋ́ Farisifɔ akasɩpʋ bʋtɛklɩ ɔnɔ, tamɛ fʋ akasɩpʋ mʋ́ bʋtamaklɩ ɔnɔ?”
19Yesu lɛlɛ mʋ́ ɔnɔ ɔbɛɛ, “Nɩ ɔtsɩ ɔkpaɩnpʋ bʋ mʋ anyawie wa a, bɛ́klɩ ɔnɔ? Ɛkɛkɛɛkɛ! Ɩnɩá ɔbʋ amʋ́ wa anfɩ mʋ́ a, bʋmɛ́ɛklɩ ɔnɔ. 20Tamɛ ɛkɛ kʋ bɛ́ba ánɩ́ bɛ́kpa ɔka otsiapʋ amʋ natɩ si amʋ́. Alɩ nkɛ amʋtɔ bɛ́klɩ ɔnɔ nɩ.
21“Ɔhaa tamapʋ tati pɔpwɛ tan tati dada. Tsufɛ tati pɔpwɛ amʋ ɩbɛ́kpɩkpɩ tsii dada amʋ ɩkʋ lɛ, ha ɔtankpa ɩnʋ bɛ́latɛɩ tsɩa. 22Alɩ kɛn bʋtamapʋ nta pɔpwɛ wa ɔwʋlʋ-kpakpa kɛntɛ wuhɛtɔ nɩ. Nta pɔpwɛ amʋ ibófu fa kɛntɛ amʋ tsitsa, yinta kɛntɛ amʋ ɛ. Ɩnɩ sʋ ɔwʋlʋ-kpakpa kɛntɛ pɔpwɛtɔ bʋtɔpʋ nta pɔpwɛ wa.”
Ɔkpʋnʋ Ɔdakɛ Mʋ Wie
(Mateo 12:1-8; Luka 6:1-5)
23Yesu mʋa mʋ akasɩpʋ bɔtsʋn ayo ndɔ kʋtɔ ɔkpʋnʋ ɔdakɛ, mʋ akasɩpʋ bɔpʋsa ayo amʋ kʋ wɩ. 24Farisifɔ akʋ bowun amʋ́, bɛfɩtɛ Yesu bɛɛ, “Kɩ, ntogyi sʋ bʋdɛ tɔá anɩ mbla mɛha ɔkpa bwɛ ɔkpʋnʋ ɔdakɛ?”
25Yesu lɛfɩtɛ amʋ́ ɔbɛɛ, “Mlɩmɔkʋkla nu tɔá Owie Dawid lɔbwɛ brɛá akʋn dɛ mʋa mʋ abuopʋ, bʋma tɔtɔá bégyi? 26Olebitiwie Bulu osumkpa yotsu bodobodoá bapʋha Bulu igyi ba, mʋa mʋ abuopʋ amʋ begyi, Bulu igyi ɔhapʋ dɛhɛn Abiatar bɩsʋ. Bulu igyi ahapʋ nkʋlɛ bɛlɛ ɔkpa bʋtegyi alɩ bodobodo amʋ.”
27Mʋʋ ɔlɛtra bla amʋ́ ɔbɛɛ, “Nyankpʋsa sʋ Bulu lɔbwɛ ɔkpʋnʋ ɔdakɛ amʋ. Megyi ɔkpʋnʋ ɔdakɛ amʋ sʋ Bulu lɔbwɛ nyankpʋsa. 28Mʋ́ sʋ mɩ, Nyankpʋsa-Mʋ-Bi anfɩ gyi ɔkpʋnʋ ɔdakɛ mʋ wie!”
Currently Selected:
Marko 2: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation