Luka 7
7
Romafɔ Ɩsa Akɔpʋ Ɔhandɛ Osumpʋ Ɔkʋ Ɩlɔ Tsa
(Mateo 8:5-13; Yohane 4:43-54)
1Brɛá Yesu lɛbla aha amʋ asʋn anfɩ fɛ́ɛ́ ta a, ɔlɔyɔ Kapernaum wulutɔ. 2Romafɔ ɩsa akɔpʋ ɔhandɛ ɔkʋ bʋ ɩnʋ. Ɔbʋ osumpʋ ɔkʋá ɔtɛhɩɛ kle mʋ asʋn. Osumpʋ amʋ dɛlɔ, odekle owu. 3Brɛá ɩsa akɔpʋ ɔhandɛ amʋ lonu Yesu nka a, ɔlɔwa Yudafɔ ahandɛ akʋ sɩsɩ Yesu ɔbɛɛ, bʋyokokoli mʋ ɔbɛ́tsa mʋ osumpʋ amʋ ɩlɔ ha mʋ. 4Ahandɛ amʋ bɛhɩɛ kokoli Yesu bɛɛ, “Abwii ɩpa, nɩ ɔkʋ lehian fʋ mbʋa a, mʋmʋ oyin anfɩ nɩ! 5Tsufɛ ɔtɔdwɛ anɩ pɩ. Mʋleyi anɩ ofiakpa kʋraa ha anɩ nɩ.”
6Mʋ́ sʋ Yesu mʋa amʋ́nyɔ bɔpʋ ɔkpa. Brɛá bɛta woyi amʋtɔ wie ta a, ɩsa akɔpʋ ɔhandɛ amʋ lɔwa mʋ anyawie ɔbɛɛ bʋyefia Yesu, abʋbla mʋ bɛɛ, mbɛɛ, “Owie! Máhan fʋ ɩwɩ, tsufɛ mmɔfʋn ánɩ́ fɛ́ba mɩ woyitɔ. 7Nawun ánɩ́ mɩ ɛ mmɔfʋn ánɩ́ nɛ́ba fʋ wa. Fʋ mʋ́ blɩ asʋankʋ, ɩwɩ bɔ́wa mɩ osumpʋ amʋ ɔnlɩn. 8Tsufɛ mɩ ɛ mbʋ ahandɛ akʋ asɩ. Ɩsa akɔpʋ akʋ ɛ bʋbʋ mɩ asɩ. Nɛlɛ ɔnɔ mbɛɛ amʋ́tɔ ɔkʋ ɔnatɩ a, ɔtɛnatɩ. Nɩ mbɛɛ ɔba ɛ a, ɔtɛba. Togyitɔá nɛbla mɩ osumpʋ mbɛɛ ɔbwɛ a, ɔtɔbwɛ.”
9Brɛá Yesu lonu asʋn anfɩ a, ɔnɔ lobwie mʋ, ɔlɛdamli bla ɔdɔm amʋʋ bʋbuo mʋ amʋ ɔbɛɛ, “Ɔnɔkwalɩ asʋn ndɛ mlɩ bla, mmɔkʋwun ɔha ánɩ́ ɔbʋ hogyi kpɔnkpɔntɩ anfɩ odu Israelfɔtɔ kʋraa kɩ!”
10Brɛá abɔpʋ amʋʋ ɩsa akɔpʋ ɔhandɛ amʋ lɔwa amʋ beyinki yɔ woyitɔ a, bowun ánɩ́ osumpʋ amʋ ɩwɩ lawa mʋ ɔnlɩn.
Ɔsʋrapʋ Ɔkʋ Mʋ Bi Tsinki
11Ɩmɔwa ɔpá kʋkʋ Yesu lɔyɔ Nain wulutɔ. Ɔdɔm bʋbuo mʋa mʋ akasɩpʋ. 12Brɛá olowie wulu ɔnɔ a, ɔlɔtʋ akʋ bʋsʋn fuli akpasʋ bɛba. Obi yinhɛ ɔkʋlɛ pɛ ogyi ha ɔsʋrapʋ ɔkʋ. Ɔdɔm kpɔnkpɔɔnkpɔntɩá botsu wulu amʋtɔ ɛ bʋbuo ɔtsɩ amʋ. 13Brɛá anɩ Wie lowun ɔtsɩ amʋ a, mʋ asʋn lɔwa mʋ nwɛ, ɔlɛbla mʋ ɔbɛɛ, “Másu!” 14Mʋʋ ɔlɔyɔpʋ ɩbɩ da akpa amʋ, asʋrapʋ amʋ besi lɩɩ. Ɩnʋ ɔlɛbla fuli amʋ ɔbɛɛ, “Ɔyasubi, ndɛ fʋ bla mbɛɛ, kʋsʋ!” 15Ɩnʋ fuli amʋ lɔkʋsʋ tsia, wa tɔɩ bɩ. Yesu lɔpʋ mʋ wa mʋ yin ɩbɩtɔ.
16Ifu lɛkɩta aha amʋ fɛ́ɛ́, bɛkanfʋ Bulu bɛɛ, “Bulu labɔbʋa mʋ aha! Mʋ ɔnɔsʋ ɔtɔɩpʋ kpɔnkpɔntɩ ɔkʋ lalɩn anɩtɔ!”
17Yesu ɩwɩ asʋn anfɩ lɛklɛɩ wa Yudea ɔmá pʋ́ awuluá ɩbʋ nsɩnɛ ɩnʋ fɛ́ɛ́tɔ.
Yesu Mʋa Asu Ɔbɔpʋ Yohane
(Mateo 11:2-19)
18Asu Ɔbɔpʋ Yohane akasɩpʋ bɛyɛbla mʋ asʋn anfɩ fɛ́ɛ́. Mʋ́ sʋ ɔlɔwa amʋ́tɔ abanyɔ sɩsɩ Yesu ɔbɛɛ, 19bʋyɛfɩtɛ mʋ bɛɛ, “Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?”
20Brɛá aha amʋ bɛba bowie Yesu wa a, bɛbla mʋ bɛɛ, “Asu Ɔbɔpʋ Yohane ɔbɛɛ abɛ́fɩtɛ fʋ anɩaa, ‘Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?> ”
21Yesu lɛtsa alɔpʋ pʋ́ aha ánɩ́ ɩwɩ dɛ amʋ́ ɔsɩn tsɔtsɔɔtsɔ alɩ brɛ amʋtɔ. Olegya ɔŋɛ lalahɛ lɛ ahatɔ, bwii ansibi abwiepʋ tsɔtsɔɔtsɔ ɛ ansibi. 22Ɩnʋ ɔlɛlɛ Yohane akasɩpʋ asʋn amʋ ɔnɔ ɔbɛɛ, “Mlɩyinki yɛbla Yohane tɔá mlɩlabowun pʋ́ mʋ́á mlɩlabonu. Mlɩlabowun ánɩ́ ansibi abwiepʋ bʋdɛ atɔ wun, abɔ bʋna. Ɩlɔ pɛpɛ alɔpʋ ɩwɩ dɛplɩ, ɩsʋ atinpʋ bʋdɛ asʋn nu. Afuli bʋdetsinki, ahianfɔ ɛ bʋdɛ asʋn wanklaan amʋ nu. 23Bulu obóyula ɔha ánɩ́ mɩ bwɛhɛ mɔkʋsʋ lɩɩ mʋsʋ.”
24Brɛá abi amʋʋ Yohane lɔwa sumbi amʋ beyinki bɔyɔ a, Yesu lɔwa tɔɩ tsu Yohane ɩwɩ suna ɔdɔm amʋ bɩ. Ɔbɛɛ, “Brɛá mlɩlɛdalɩ yɔ ɔsʋlʋkpansʋ ɩnʋ a, ntɔ ɔkɩkpa mlɩlɔyɔ? Fɩta ánɩ́ afu dɛ mʋ́ tsʋn loo? Ɛkɛkɛɛkɛ! 25Nɩ megyi mʋ́ a, ntɔ koun ɔkɩkpa mlɩlɔyɔ? Ɔha ánɩ́ ɔdɩdɩ ntsrim. Ɛkɛkɛɛkɛ! Aha ánɩ́ bʋtɛdɩda tati amʋ odu gyi ɔdwɛ a, awie woyi bʋtetsia. 26Mlɩbla mɩ! Bulu ɔnɔsʋ ɔtɔɩpʋ mlɩlɛdalɩ yɛkɩ? Ee, Yohane nɩ. Ɔdʋn Bulu ɔnɔsʋ ɔtɔɩpʋ. 27Mʋ ɩwɩ asʋn Bulu lɛblɩ bɔwanlɩn mʋ́ tswɩ bɛɛ, ‘Kɩ, ndɛ obi wa gya fʋ nkpa. Mʋ ɔbɛ́la ɔkpa ha fʋ nɩ.> ” 28Yesu lɔyɔ mʋ asʋnsʋ ɔbɛɛ, “Ndɛ mlɩ bla mbɛɛ, ɔhagyiɔha ánɩ́ ɔha tsɩhɛ lakɛn kwɩɩ mɔfʋn mʋ, tamɛ mʋ ɛ ɔmɔfʋn Bulu iwiegyi amʋtɔ ɔkʋsʋ kʋraa.”
29Aha ánɩ́ bonu Yesu asʋn anfɩ pʋ́ lampoo ahɔpʋ kʋraa bowun ánɩ́ Bulu asʋn da ɔkpa. Botsula ha Asu Ɔbɔpʋ Yohane lɔbɔ amʋ́ asu. 30Tamɛ Farisifɔ pʋ́ Mose mbla asunapʋ amʋ mʋ́ bʋmɛha Yohane ɔbɔ amʋ́ asu. Bekina tɔá Bulu lɛhɩhɩɛ ha amʋ́ bwɛ.
31Yesu lɔyɔ mʋ asʋnsʋ ɔbɛɛ, “Sei anfɩ a, amɛndɩ nɔ́pʋkapʋ ndɛmba-abi anfɩ? Ntɔ bɛlɩan? 32Bʋgyi fɛ nyebiá bʋtsie dɩnsʋ bʋdɛ aba kpoli blɩ bɛɛ, ‘Anɩlaplei ansigyisʋ, mlɩmɛtsa. Mʋ́ sʋ anɩlawa awɩrɛhɔ ɩlʋ, tamɛ mlɩmosu.> 33Mlɩgyi fɛ nyebi anfɩ, tsufɛ Yohane lɛba a, oletsia klɩ ɔnɔ, omonun nta, tamɛ mlɩaa, ‘Ɔŋɛ lalahɛ bʋ mʋtɔ!> 34Mɩ, Nyankpʋsa-Mʋ-Bi anfɩ mʋ́ naba ndɛ atɔ gyi, ndɛ nta nun. Mʋ́ ɛ mlɩaa, ‘Mlɩkɩ opotsuapʋ pʋ́ nta ɔbʋpʋ. Lakpan abwɛpʋ pʋ́ lampoo ahɔpʋ onyawie.> 35Tamɛ ɔha ánɩ́ ɔbʋ Bulu nyansa a, mʋ tsiatɔ tɛlɛ mʋ́ ɔwan.”
Ɔtsɩ Lakpan Ɔbwɛpʋ Ɔkʋ
36Farisiyin ɔkʋ lɛtɩ Yesu atɔ ogyikpa mʋ woyitɔ. Brɛá Yesu tsie ɔpʋnʋ amʋ asɩ a, 37ɔtsɩ ɔkʋá ɔbʋ wulu amʋtɔ, ogyi lakpan ɔbwɛpʋ lonu Yesu nka ánɩ́ batswɩ ɔpʋnʋ ha mʋ Farisiyin amʋ woyitɔ. Ɩnʋ olotsu mʋ ofobi fanfan ánɩ́ ɩbʋ bia prɛntʋa wanklaan ɔbɔ ba ɩnʋ. 38Ɔlɛbɛda akpawunu Yesu ayabiasɩ, ɔlɛkpa isu yi woo. Ɔlɔpʋ mʋ ntsú fwɩ Yesu ayabiasɩ, pʋ mʋ nwunsʋ-imi tsitsi mʋ́. Ɔlɔkʋla Yesu ayabi puta, tsɛɩ ofobi fanfan amʋ wʋlɩ mʋ ayabisʋ. 39Brɛá Farisiyin amʋʋ ɔlɛtɩ Yesu amʋ lowun ɩnɩ a, ɔlɛblɩ wa nwuntɔ ɔbɛɛ, “Nɩ Bulu ɔnɔsʋ ɔtɔɩpʋ oyin anfɩ gyi lɛlɛ a, tɛkɩ alawun ɔha oduá ɔtsɩ anfɩ gyi asa ɔdɛpʋ ɩbɩ da mʋ, tsufɛ lakpan ɔbwɛpʋ ogyi.”
40Yesu lɛbla oyin amʋ ɔbɛɛ, “Simon, mbʋ asʋankʋ bla fʋ.”
Simon lɛfɩtɛ mʋ ɔbɛɛ, “Osunapʋ, amansʋ igyi? Bla mɩ.”
41Yesu lɛbla mʋ ɔbɛɛ, “Aha abanyɔ akʋ bɛpan sika oyin ɔkʋ wa. Ɔkʋlɛ lɛpan blɩba-anu (5,000,000), ɔkʋlɛ ɛ lɛpan mpɩm lafanu (500,000)#7:41 Sika anfɩ igyi sika fututu lafanu (500) mʋ́a aduenu (50), igyi ɔha nkɛ lafanu (500) mʋ́a aduenu (50) ɩkɔka. 42Bʋmenya kɔba amʋ ka. Mʋ́ sʋ oyin amʋ lesikie amʋ́ abanyɔ fɛ́ɛ́. Bla mɩ, amʋ́tɔ ɔmɔmʋ ɔbɔ́dwɛ oyin amʋ dʋn?”
43Simon lɛbla mʋ ɔbɛɛ, “Nahogyiá ɔmʋamʋʋ mʋ ɩkɔ tsɔ dʋn amʋ.”
Yesu lɛbla mʋ ɔbɛɛ, “Ɔnɔkwalɩ igyi.” 44Ɩnʋ Yesu leyinki kɩ ɔtsɩ amʋ, ɔlɛbla Simon ɔbɛɛ, “Fawun ɔtsɩ anfɩ? Nɛba fʋ woyitɔ a, fʋmɛha mɩ ntsu anfwɩ ayabiasɩ. Tamɛ ɔtsɩ anfɩ mʋ́ lapʋ mʋ ntsú fwɩ mɩ ayabiasɩ, pʋ mʋ nwunsʋ-imi tsitsi mʋ́. 45Fʋmɛlata mɩ puta, tamɛ tsu brɛá nɛba nfɩ ɔpá a, ɔtsɩ anfɩ mɔkʋsi mɩ ayabi kʋla puta. 46Fʋmɛtsɛɩ ofobi wʋlɩ mɩ nwuntɔ, tamɛ mʋ mʋ́ alatsɛɩ ofobi fanfan wʋlɩ mɩ ayabisʋ. 47Mʋ́ sʋ ndɛ fʋ bla mbɛɛ, ɔdwɛ tsɔtsɔɔtsɔ anfɩ alalɛ suna mɩ anfɩ idesuna ánɩ́ Bulu lasi mʋ lakpan tsɔtsɔɔtsɔ amʋ fɛ́ɛ́ kie mʋ. Tamɛ ɔha ánɩ́ Bulu osi lakpan kpalobi kie mʋ a, ɔdwɛ kpalobi ɔtɛlɛ suna.”
48Ɩnʋ Yesu lɛbla ɔtsɩ amʋ ɔbɛɛ, “Nasi fʋ lakpan fɛ́ɛ́ kie fʋ.”
49Aha amʋʋ amʋ́a Yesu bʋtsie ɔpʋnʋasɩ amʋ bɛblɩ wa nwuntɔ bɛɛ, “Ma gyi oyin anfɩ ɔbɛɛ, mʋna mʋdɛ aha lakpan sikie amʋ́.”
50Mʋʋ Yesu lɛbla ɔtsɩ amʋ ɔbɛɛ, “Fʋ hogyi lahɔ fʋ nkpa. Natɩ iwilwiitɔ.”
Currently Selected:
Luka 7: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation