Luka 22
22
Yesu Nwunsʋ Kɩklɩ
(Mateo 26:1-5; Marko 14:1-2; Yohane 11:45-53)
1Israelfɔ Bodobodo Mátuhɛ Nkɛ, igyi amʋ́sʋ Katsʋn Nkɛ amʋ gyi ɩba bɔfʋn. 2Bulu igyi ahapʋ dɛhɛn pʋ́ Mose mbla asunapʋ amʋ bodunka ɔkpa ánɩ́ bɔ́tsʋn mʋ́sʋ kɩta Yesu ŋaintɔ, mɔ mʋ, tsufɛ bʋdɛ aha amʋ ifu nya.
Yuda Iskariot Lotsula Ánɩ́ Ɔbɛ́lɛ Yesu Ha
(Mateo 26:14-16; Marko 14:10-11)
3Ɩnʋ Ɔbʋnsam lowie Yuda Iskariot, ogyi Yesu akasɩpʋ duanyɔ amʋtɔ ɔkʋlɛtɔ. 4Mʋ́ sʋ ɔlɔyɔ Bulu igyi ahapʋ dɛhɛn pʋ́ Bulu ɔtswɛkpa agyopʋ dɛhɛn wa, bɛkɩta agywɩɩn alɩá ɔbɛ́lɛ Yesu ha amʋ́. 5Ansɩ legyi amʋ́. Mʋ́ sʋ botsula ánɩ́ bɛ́ka mʋ ɩkɔ. 6Yuda lotsula. Mʋ́ sʋ olodunka ɔkpa ánɩ́ ɔbɔ́tsʋn mʋ́sʋ hɩɛɛ lɛ Yesu ha amʋ́, brɛá aha tsɔtsɔɔtsɔ amʋ bʋma ɩnʋ.
Katsʋn Atogyihɛ Gyi
(Mateo 26:17-19; Marko 14:12-21; Yohane 13:21-30)
7 Bodobodo Mátuhɛ Nkɛ amʋtɔ ɛkɛá bʋtɔmɔ Israelfɔsʋ Katsʋn Nkɛ akufa lɔfʋn. 8Yesu lɔwa Petro mʋa Yohane ɔbɛɛ, bʋyɛbwɛ Israelfɔsʋ Katsʋn atogyihɛ amʋ yaɩ ha amʋ́.
9Petro mʋa Yohane bɛfɩtɛ mʋ bɛɛ, “Anɩ Wie, nkʋnʋ ayɛbwɛ mʋ́ yaɩ?”
10Mʋʋ ɔlɛbla amʋ́ ɔbɛɛ, “Nɩ mlowie wulu ɔnɔ a, mléfia oyin ɔkʋá ɔsʋ ntsu-ɔlɔ. Mlɩbuo mʋ yɔ woyitɔ. 11Mlowie a, mlɩfɩtɛ woyi mʋ wie amʋ mlɩaa, ‘Osunapʋ ɔbɛɛ, afɩtɛ fʋ. Nkʋnʋ afɔɔ ɔswɩɩkpa bʋ, ánɩ́ mɩa mɩ akasɩpʋ abɛ́ba begyi Katsʋn atogyihɛ amʋ?> 12Obósuna mlɩ abansrʋ yile kʋá bala mʋ́tɔ yaɩ. Mlɩbwɛ atɔ amʋ yaɩ ɩnʋ.”
13Petro mʋa Yohane bɔpʋ ɔkpa. Boyowun togyitɔ alɩ amʋʋ Yesu lɛbla amʋ́ amʋ pɛpɛɛpɛ, bɔbwɛ Katsʋn atogyihɛ amʋ yaɩ ɩnʋ.
Yesu Ntʋpwɛ Atogyihɛ Trahɛ
(Mateo 26:26-30; Marko 14:22-26; 1 Korintofɔ 11:23-25)
14Atɔ amʋ gyibɩ lɔfʋn, Yesu mʋa mʋ sumbi ayɔpʋ bɛba betsia ɔpʋnʋ amʋ asɩ. 15Yesu lɛbla amʋ́ ɔbɛɛ, “Nhɩɛ ndekle mbɛɛ, mɩa mlɩnyɔ abégyi Katsʋn Nkɛtɔ atogyihɛ anfɩ asa mɩ anwun ɩwɩɔsɩn. 16Tsufɛ ndɛ mlɩ bla mbɛɛ, mmɛ́ɛtra gyi mʋ́ ɛkɛkɛɛkɛ yɔfʋn ɛkɛá ɩtɔ amʋʋ atogyihɛ anfɩ ɩlɩɩ ha amʋ laba mʋ́tɔ Bulu iwiegyi amʋtɔ.”
17Ɩnʋ olotsu nta-ɛwɛ, da Bulu ɩpan, ɔlɛbla amʋ́ ɔbɛɛ, “Mlɩhɔ amlɩnun ha aba. 18Tsufɛ ndɛ mlɩ bla mbɛɛ, mmɛ́ɛtra nun waɩn-abi nta anfɩ ɛkɛkɛɛkɛ yɔfʋn brɛá Bulu iwiegyi amʋ ɩbɛ́ba.”
19Ɩnʋ ɔlɛlɛ bodobodo ipin, ɔlɛda Bulu ɩpan, biabia mʋ́tɔ pʋha amʋ́, blɩ ɔbɛɛ, “Mɩ ɔyʋlʋá mlɩ sʋ nasi ha nɩ. Mlɩtsia bwɛ ɩnɩ pʋkaɩn mɩsʋ.” 20Alɩ kɛn, brɛá begyi atɔ amʋ ta a, olotsu nta-ɛwɛ amʋ ha amʋ́, blɩ ɔbɛɛ, “Nta-ɛwɛ anfɩ gyi Bulu ntam pɔpwɛá nɛ́tsɛɩ mɩ obugya wʋlɩ pʋsi mʋ́sʋ ha mlɩ nɩ.
21“Ɩnɩá ndɛblɩ a, mɩa ɔha amʋʋ ɔbɛ́lɛ mɩ ha amʋ ɩbɩ da ɔlɛpɛ ɔkʋlɛtɔ. 22Mɩ, Nyankpʋsa-Mʋ-Bi anfɩ nówu fɛ alɩá Bulu lɛhɩɛ yaɩ, tamɛ ɔha amʋʋ ɔbɛ́lɛ mɩ ha amʋ ɔgyɔwɩ nɩ.”
23Ɩnʋ befi asɩ bʋdɛ aba fɩtɛ bɛɛ, “Ngya anɩtɔ ma ɔbɔ́bwɛ ɩnɩ?”
Ma Ɔbɔ́bwɛ Ɔhandɛ?
24Nwɛngyi lɛba sumbi ayɔpʋ amʋtɔ, amʋ́tɔ ɔmʋá ɔbɔ́bwɛ ɔhandɛ sʋ. 25Yesu lɛbla amʋ́ ɔbɛɛ, “Ɔmátɔfɔ awie bʋbʋ tumi amʋ́ ahasʋ. Aha amʋ bʋtɛtɩ amʋ́ ahandɛ bɛɛ, ‘Bʋalɛ agyipʋ.> 26Tamɛ mlɩtɔ mʋ́ a, ɩmába alɩ. Ɔha ánɩ́ odekleá ɔbɔ́bwɛ mlɩtɔ ɔhandɛ ɔbwɛ mʋ ɩwɩ ɔtrahɛ. Ɔha ánɩ́ odekle ɔbɛɛ, mɔ́bwɛ mlɩ nkpa ogyapʋ ɛ ɔbwɛ mʋ ɩwɩ fɛ osumpʋ. 27Ma dʋn mʋ ba? Ɔha ánɩ́ otsie ɔpʋnʋasɩ loo, ntɛ ɔha ánɩ́ odesum ɔpʋnʋ amʋ asɩ? Megyi ɔha amʋʋ otsie mʋ́ asɩ amʋ dʋn? Tamɛ mbʋ mlɩtɔ fɛ osumpʋ.
28“Mlɩlɔwa klʋn buo mɩ mɩ ɩsɔkɩ fɛ́ɛ́tɔ nɩ. 29Alɩ amʋʋ mɩ Sɩ layaɩ mɩ owie amʋ a, alɩ mɩ ɛ ndɛ mlɩ yaɩ nɩ. 30Mɛnɩ mlétsia mɩ ɔpʋnʋasɩ, gyi atɔ, nun nta mɩ iwie ogyikpa ɩnʋ. Mlétsia awie mbiasʋ, gyi Israel abusuan duanyɔ amʋ asʋn.”
Petro Ɔbɔ́swɩɩ Ɔbɛɛ Mʋmeyin Yesu
(Mateo 26:31-35; Marko 14:27-31; Yohane 13:36-38)
31Yesu lɛbla Simon Petro ɔbɛɛ, “Simon, Simon! Kɩ, Ɔbʋnsam dɛ ɔkpa kʋlɩ ɔbɛɛ, obófuni mlɩ fɛ ayo. 32Tamɛ nakokoli Bulu ha fʋ mbɛɛ, fʋmádɩda hogyitɔ. Nɩ feyinki ba mɩ wa a, wa fʋ aba amʋ ɛ ɔwʋnlɩn.”
33Petro lɛbla mʋ ɔbɛɛ, “Mɩ Wie natsula. Nɩ obu igyi kʋraa mɩa fʋnyɔ abɛ́dɩ. Nɩ lowu igyi ɛ a, mɩa fʋnyɔ abówu.”
34Yesu lɛbla mʋ ɔbɛɛ, “Petro, ndɛ fʋ bla mbɛɛ, ndɛ, asa batɛ ɔbɛ́lɛ ɔnɔ a, fɔ́swɩɩ pʋ ɩbɩ wa ogya tse sa fɛɛ fʋmeyin mɩ.”
Ɩwɩklɩá Ɩbɛ́ba Ɛkɛkʋ
35Ɩnʋ Yesu lɛfɩtɛ akasɩpʋ amʋ ɔbɛɛ, “Brɛá nɔwa mlɩ sumbi, mlɩmɛdɛ sika akɛntɛ, mlɩmɛdɛ akpankogyo ntɛ ntʋkʋta nyɔsɩ a, tɔkʋ lehian mlɩ?”
Bɛlɛ mʋ́ ɔnɔ bɛɛ, “Ɛkɛkɛɛkɛ! Tɔtɔ mehian anɩ.”
36Mʋʋ ɔlɛbla amʋ́ ɔbɛɛ, “Tamɛ sei mʋ́ a, fʋá fʋbʋ sika kɛntɛ, ntɛ akpankogyo a, tsu kɩta. Nɩ mlɩtɔ ɔkʋ má ɔdayi ɩya anyɔ a, ɔfɛ mʋ tati pʋhɔ kʋ! 37Tsufɛ ilehian ánɩ́ mɩ ɩwɩ asʋn amʋʋ ɩbʋ Bulu asʋn wanlɩnhɛtɔ amʋ ɩbɛ́ba mʋ́tɔ. Bɔwanlɩn bɛɛ, ‘Bɛkla mʋ wa lakpan abwɛpʋtɔ.> Tsufɛ asʋn amʋʋ bɔwanlɩn tsu mɩ ɩwɩ amʋ ɩba lafʋn ta.”
38Akasɩpʋ amʋ bɛbla mʋ bɛɛ, “Anɩ Wie kɩ, ndayi anyɔ nɩ.”
Mʋʋ Yesu lɛbla amʋ́ ɔbɛɛ, “Ɩtsɔ.”
Mpaɩbɔ Olif Ɩbʋsʋ
(Mateo 26:36-46; Marko 14:32-42)
39Yesu lɛdalɩ wulutɔ yɔ Olif ɩbʋ amʋsʋ, fɛ alɩá otetsia yɔ ɩnʋ yaɩ. Mʋ akasɩpʋ ɛ bobuo mʋ. 40Brɛá bowie ɩnʋ a, ɔlɛbla amʋ́ ɔbɛɛ, “Mlɩkokoli Bulu, mɛnɩ mlɩmóowie ɩsɔkɩtɔ.”
41Mʋʋ ɔlɛdalɩ amʋ́tɔ yɔ nkpa kpalobi fɛ nfɩ mʋ́a nfɩ, yɛda akpawunu bɔ mpaɩ ɔbɛɛ, 42“Mɩ Sɩ, nɩ fótsula a, ha nta-ɛwɛ anfɩ#22:42 Nta-ɛwɛ anfɩ igyi ɩwɩɔsɩn ánɩ́ Yesu obówun. ɩtsʋn mɩsʋ. Tamɛ megyi tɔá ndekle, mʋ́á fʋdekle ɩba mʋ́tɔ.” 43Ɩnʋ Bulu-ɔbɔpʋ lotsu ɔsʋsʋ ba bɛlɛ ɩwɩ ɔwan suna mʋ, wa mʋ ɔwʋnlɩn. 44Asʋn ɩhɩɛ dɛ mʋ han. Mʋ́ sʋ ɔlɔbɔ mpaɩ kinkiinkin. Ɩlɛha mʋ apipi lemli fɛ obugya, ɩdɛtɩn da ɔsʋlʋtɔ ta-ta-ta.
45Brɛá ɔlɔkʋsʋ tsu mpaɩ amʋ ɔbɔkpa, yinki ba akasɩpʋ amʋ wa a, olowun ánɩ́ bʋdɛdɩdɩ. Awɩrɛhɔ dɛ amʋ́. Mʋ́ sʋ ɩwɩ lawu amʋ́. 46Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛdɩdɩ? Mlɩkʋsʋ amlɩkokoli Bulu, mɛnɩ mlɩmóowie ɩsɔkɩtɔ.”
Yesu Kɩta
(Mateo 26:47-56; Marko 14:43-50; Yohane 18:1-11)
47Yesu ɔnɔ mesi, ɔdɔm bowotii amʋ́sʋ. Akasɩpʋ duanyɔ amʋtɔ ɔkʋlɛá bʋtɛtɩ mʋ Yuda gya amʋ́ nkpa. Ɩnʋ ɔlɛnatɩ tʋ Yesu ɔbɛɛ, amʋlata mʋ puta, 48tamɛ Yesu lɛfɩtɛ mʋ ɔbɛɛ, “Yuda, lata fɛ́lata mɩ, Nyankpʋsa-Mʋ-Bi anfɩ puta, pʋlɛ mɩ ha?”
49Akasɩpʋ amʋʋ bʋbʋ Yesu wa amʋ bowun tɔá ɩba. Mʋ́ sʋ bɛfɩtɛ Yesu bɛɛ, “Akɔ amʋ́? Anɩbʋ ndayi.” 50Ɩnʋ amʋ́tɔ ɔkʋlɛ lɔtswɩ mʋ ɔdayi kpa Bulu igyi ɔhapʋ dɛhɛn osumpʋ ɔkʋ gyɔpɩ-ɩsʋ lɛ.
51Yesu lɛbla ɔkasɩpʋ amʋ ɔbɛɛ, “Mábwɛ! Isi mlɩ ɔka!” Ɩnʋ ɔlɔpʋ ɩbɩ da osumpʋ amʋ ɩsʋ amʋ, ileyinki tsa.
52Mʋʋ Yesu lɛfɩtɛ Bulu igyi ahapʋ dɛhɛn, Bulu ɔtswɛkpa agyopʋ ahandɛ pʋ́ Yudafɔ ahandɛ amʋʋ bɛba mʋ ɔkɩtakpa amʋ ɔbɛɛ, “Ogyo otswapʋ ngyi, sʋ mlɩlatsu nkpoti pʋ́ ndayi mlɛba mɩ ɔkɩtakpa? 53Ntsie mlɩ wa Bulu ɔtswɛkpa wunsɩnɛsʋ ekekegyiɛkɛ, mlɩmɔpʋ ɩbɩ da mɩ ɛkɛkɛɛkɛ. Tamɛ mlɩ brɛ nɩ. Oklun tumi dɛ iwie gyi.”
Petro Lɔswɩɩ Ɔbɛɛ Mʋmeyin Yesu
(Mateo 26:57-58, 69-75; Marko 14:53-54, 66-72; Yohane 18:12-18, 25-27)
54Ɩnʋ aha amʋ bɛkɩta Yesu, kpa mʋ ya Bulu igyi ɔhapʋ dɛhɛn woyitɔ. Petro lɛpɛtɩ obuo amʋ́ ɔma tsutsuutsu. 55Tamɛ brɛá bosun agyabi wunsɩnɛsʋ ɩnʋ, bʋtsie mʋ́ asɩ a, Petro leyetsia amʋ́ wa. 56Otsibi ɔkʋá ogyi osumpʋ ɩnʋ lowun ánɩ́ Petro tsie ogya amʋ asɩ, ɔlɛkɩ mʋ diin, blɩ ɔbɛɛ, “Oyin anfɩ ɛ buo Yesu!”
57Tamɛ Petro lɔpʋ ɔnɔlɩ blɩ ɔbɛɛ, “Ɔtsɩ, mmeyin mʋ ɔtɩnɛtɩnɛ!”
58Ɩlɔbwɛ kpalobi a, ɔha ɔkʋ ɛ lowun Petro, ɔlɛbla mʋ ɔbɛɛ, “Fʋ ɛ fʋbʋ amʋ́tɔ.”
Tamɛ Petro lɛbla mʋ ɔbɛɛ, “Owie, megyi mɩ nɩ!”
59Fɛ dɔnhwɩrɩ kʋlɛ ɔma a, ɔha bamba ɛ lɛba botsula mʋ́sʋ ɔbɛɛ, “Lɛlɛ, oyin anfɩ ɛ letsia mʋ wa, tsufɛ Galileayin ogyi.”
60Tamɛ Petro lɛlɛ mʋ́ ɔnɔ ɔbɛɛ, “Agya! Kɩ, mmeyin asʋn anfɩ ɩwɩ kʋkʋ.”
Petro ɔnɔ mesi, batɛ lɔbɔn. 61Anɩ Wie Yesu lɛdamli kɩ Petro. Ɩnʋ Petro lɛkaɩn asʋn amʋʋ anɩ Wie lɛbla mʋ ɔbɛɛ, “Fɔ́swɩɩ tse sa fɛɛ, fʋmeyin mɩ asa batɛ ɔbɛ́lɛ ɔnɔ onyenɩ.” amʋsʋ. 62Ɩnʋ ɔlɛdalɩ yɔ kpankpa hɩɛ yesu.
Yesu Ahinla Bwɛ
(Mateo 26:67-68; Marko 14:65)
63Yesusʋ akɩpʋ befi asɩ bʋdɛ mʋ ahinla bwɛ, bʋdɛ mʋ da. 64Bɔpʋ atɔ klɩ mʋ ansibi, fɩtɛ mʋ bɛɛ, “Bulu ɔnɔsʋ ɔtɔɩpʋ, ma lada fʋ? Bla anɩ.” 65Bɛkpa mʋ asiabi, bla mʋ nyanyala.
Yudafɔ Asʋn Agyipʋ Ansɩtɔ Lɩɩ
(Mateo 26:59-66; Marko 14:55-64; Yohane 18:19-24)
66Yudafɔ ahandɛ, Bulu igyi ahapʋ dɛhɛn pʋ́ Mose mbla asunapʋ amʋ befia ɔyɩkɛhɛ nyankɩ-nyankɩ, bɛbɩtɩa Yesu bɛlɩɩ amʋ́ ansɩtɔ. 67Bɛbla Yesu bɛɛ, “Nɩ fʋgyi Kristo, (ɔha amʋʋ Bulu lada mʋ ofuli amʋ) a, bla anɩ.”
Yesu lɛbla amʋ́ ɔbɛɛ, “Nɩ nɛbla mlɩ kʋraa a, mlɩmóohogyi. 68Nɩ nɛfɩtɛ mlɩ asʋankʋ ɛ a, mlɩmɛ́ɛlɛ mʋ́ ɔnɔ. 69Tamɛ tsu sei pʋya a, mɩ, Nyankpʋsa-Mʋ-Bi anfɩ nétsia Bulu Otumipʋ amʋ gyɔpɩsʋ.”
70Amʋ́ fɛ́ɛ́ bɛfɩtɛ Yesu bɛɛ, “Mʋ́ sʋ fʋgyi Bulu mʋ Bi amʋ nɩ?”
Yesu lɛbla amʋ́ ɔbɛɛ, “Ee, ɔnɔkwalɩ amʋ mlɩlablɩ a.”
71Ɩnʋ bɛfɩtɛ aba bɛɛ, “Ntogyi sʋ abɛ́tra dunka adansɩfɔ bamba? Mʋ́ anɩlanu tsu mʋ onuto ɔnɔ a.”
Currently Selected:
Luka 22: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation