Luka 19
19
Yesu Mʋa Sakeo
1Yesu dɛka tsʋn Yeriko wulutɔ. 2Lampoo ahɔpʋ ɔhandɛ ɔkʋá ɔbʋ kɔba bʋ wulu amʋtɔ, bʋtɛtɩ mʋ Sakeo. 3Oyin anfɩ dekleá ɔbɔ́pʋ ansibi wun Yesu, tamɛ ɔma ɩswɩ, aha ɛ bɔdʋbɩ. 4Mʋ́ sʋ ɔlɛsrɩ yɔdʋ pɔntɔ-oyi kʋá Yesu ɔbɔ́tsʋn mʋ́ asɩ, mɛnɩ obówun mʋ. 5Brɛá Yesu lowie oyi amʋ asɩ a, olotsu ansɩ fʋa, wun Sakeo, ɔlɛbla mʋ ɔbɛɛ, “Sakeo, wa ɔsa kplɩ ba. Ndɛ, fʋ woyi nɔ́swɩɩ nɩ.”
6Sakeo lɔwa ɔsa kplɩ, pʋ ansigyi kpa mʋ ya woyitɔ. 7Aha ánɩ́ bowun mʋ́ fɛ́ɛ́ bowunti bɛɛ, “Oyin anfɩ layɔswɩɩ lakpan ɔbwɛpʋ woyitɔ.”
8Sakeo lɔkʋsʋ lɩɩ woyitɔ ɩnʋ, bla anɩ Wie Yesu ɔbɛɛ, “Mɩ Wie, kɩ, néye mɩ atɔtɔ anyɔ, pʋ ɩfʋn kie ahianfɔ. Nɩ nasisi ɔkʋ ɛ a, nɛ́laha mʋ mʋ́ aku-ana.”
9Yesu lɛbla mʋ ɔbɛɛ, “Ndɛ Bulu lahɔ woyi anfɩ nkpa, tsufɛ Abraham mʋ na ɔ́nɩ anfɩ ɛ gyi. 10Aha ánɩ́ bafwɩ odunkakpa mɩ, Nyankpʋsa-Mʋ-Bi anfɩ nɛba, anhɔ amʋ́ nkpa.”
Asumpʋ Kɔba Ha
(Mateo 25:14-30)
11Aha amʋ bʋdɛ asʋn amʋʋ Yesu dɛblɩ amʋ nu. Alɩ brɛ amʋtɔ a, Yesu lata Yerusalem wie ta. Mʋ́ sʋ ɔlɛha amʋ́ yebi pʋtswii amʋ́, tsufɛ bʋdesusuá Bulu iwiegyi béfi asɩ ɩnʋnʋ. 12Ɔlɛha yebi amʋ ɔbɛɛ, “Ɩwɩ onyapʋ ɔkʋ lɔbwɛ agywɩɩn ɔbɛɛ, mótu ɔkpa yɔ amʋ́ owie dɛhɛn wa, ɔyaɩ mʋ owie, oyinki begyi iwie mʋ ɔmátɔ. 13Asa ɔbɔ́yɔ a, ɔlɛtɩ mʋ asumpʋ idu, oleye pɔɔnʋ kʋlɛkʋlɛ ha amʋ́ fɛ́ɛ́. Ɔlɛbla amʋ́ ɔbɛɛ bʋpʋyɔ agyʋma yɔfʋn ɛkɛá mɛ́ba. 14Tamɛ mʋ wulutɔ aha bolu mʋ, wa abi buo mʋ bɛɛ, bʋmedekleá ɔbwɛ amʋ́ owie.
15“Tamɛ mʋ́ o a, owie dɛhɛn amʋ lɛyaɩ mʋ iwie amʋ, ɔlɛsanki ba woyi. Olenya wie pɛ ɔlɛha bɛtɩ mʋ asumpʋ amʋ, ɔkɩ tɔá banya dɩnka kɔba amʋsʋ. 16Ogyankpapʋ lɛba bɛbla mʋ ɔbɛɛ, ‘Mɩ wie, nanya pɔɔnʋ du tsɩa fʋ klɛ amʋtɔ.> 17Mʋʋ ɔlɛbla osumpʋ amʋ ɔbɛɛ, ‘Fabwɛ atɔ. Osumpʋ wanklaan fʋgyi. Ɩnɩá fawa ɔnɔkwalɩ ɩtɔ tukuriibi anfɩ ɩwɩ sʋ a, nɔ́pʋ awulu idu wa fʋ ɩbɩtɔ, fɛ́kɩ mʋ́sʋ.> 18Onyɔsɩ lɛba bɛbla mʋ ɔbɛɛ, ‘Mɩ wie, nanya pɔɔnʋ anu tsɩa fʋ klɛ amʋtɔ.> 19Owie amʋ lɛbla mʋ ɔbɛɛ, ‘Fʋ ɛ fɛ́kɩ awulu anusʋ.>
20“Ɔbamba ɛ lɛba bɛbla mʋ ɔbɛɛ, ‘Mɩ wie, fʋ sika amʋ nɩ. Nɛda mʋ́ wa dukubi ɔnɔ yaɩ. 21Nyin fʋ. Ndɛ fʋ ifu nya, tsufɛ fʋ asʋn bʋ ɔnlɩn. Fʋtotsu atɔ ɔtɩnɛá fʋmɔpʋ tɔtɔ yaɩ, fʋtɔkpɔtɩ atɔ ɛ ɔtɩnɛá fʋmodu tɔtɔ.> 22Mʋ wie amʋ lɛbla mʋ ɔbɛɛ, ‘Osumpʋ lalahɛ. Fʋ ɔnɔtɔ asʋn nɔ́pʋgyi fʋ asʋn. Yɛ fʋyin ánɩ́ mɩ asʋn ɩhɩɛ bʋ ɔnlɩn, ntotsu atɔ ɔtɩnɛá mmɔpʋ tɔtɔ tswɩ, kpɔtɩ atɔ ɔtɩnɛá mmodu tɔtɔ a? 23Mʋ́ ntogyi sʋ fʋmɔpʋ mɩ kɔba amʋ yɔtswɩ sika ɔyaɩkpa. Fɛ́kɩ nɩ neyinki ba a, nɔ́yɛhɔ mʋ́a mʋ́sʋ abi?>
24“Ɩnʋ owie amʋ lɛbla aha ánɩ́ bʋbʋ ɩnʋ ɔbɛɛ, ‘Mlɩswɩɩ osumpʋ anfɩ kɔba amʋ ha ɔmʋamʋʋ olenya idu amʋ.> 25Tamɛ aha amʋ bɛbla mʋ bɛɛ, ‘Nanain, ɔbʋ pɔɔnʋ du dodo o!> 26Owie amʋ lɛbla amʋ́ ɔbɛɛ, ‘Ndɛ mlɩ bla mbɛɛ, ɔha ánɩ́ odekleá obónu mɩ atosunahɛ amʋ asɩ a, Bulu ɔbɔ́pʋ ɩkʋ tsɩa mʋ́tɔ ha mʋ. Tamɛ ɔha ánɩ́ omedekleá obónu mʋ́ asɩ a, Bulu ɔbɔ́swɩɩ mʋ kpalobi amʋʋ alabɩ amʋ kʋraa. 27Sei a, mlɩkpa aha amʋʋ bɔkʋsʋ lɩɩ mɩsʋ bɛɛ mmágyi iwie amʋ ba, amlɩbɔmɔmɔ amʋ́ mɩ ansɩtɔ nfɩ!> ”
Bɔhɔ Yesu Fɛ Owie Yerusalem
(Mateo 21:1-11; Marko 11:1-11; Yohane 12:12-19)
28Yesu lɛha amʋ́ yebi anfɩ ta a, ɔlɔtsʋn gyankpa pʋ ɔyɔ Yerusalem. 29Ɔlɛta Betfage mʋ́a Betania awuluá ɩdɩn Olif ɩbʋ amʋsʋ wie ta a, ɔlɔwa mʋ akasɩpʋ abanyɔ gyankpa, 30bla amʋ́ ɔbɛɛ, “Mlɩyɔ wulu anfɩ ɩda mlɩ ansɩtɔ anfɩsʋ. Nɩ mlowie wulu ɔnɔ a, mlówun afrimu kanahɛ ɔkʋ da ɔfɛtɔ, ɔhaa mɔkʋtsia mʋsʋ kɩ. Mlɩsankɩ mʋ ba mɩ. 31Nɩ ɔkʋ ɔfɩtɛ mlɩ ɔbɛɛ, ‘Ntogyi sʋ mlɩdɛ mʋ sankɩ?> a, mlɩbla mʋ mlɩaa, ‘Anɩ Wie dɛ mʋ hian.> ”
32Akasɩpʋ abanyɔ amʋ bɔyowun afrimu kanahɛ amʋ, fɛ alɩá Yesu lɛbla amʋ́. 33Brɛá bʋdɛ mʋ sankɩ a, mʋ awie bɛfɩtɛ amʋ́ bɛɛ, “Ntogyi sʋ mlɩdɛ mʋ sankɩ?”
34Bɛlɛ mʋ́ ɔnɔ bɛɛ, “Anɩ Wie dɛ mʋ hian.” 35Besi, bɛkpa afrimu kanahɛ amʋ ba Yesu. Bɛyaɩ amʋ́ atati dɩnka mʋsʋ, tsu Yesu bian mʋsʋ. 36Brɛá Yesu tsie mʋsʋ ɔyɔ a, aha amʋ bɛkpa amʋ́ atati yaɩ tswɩ ɔkpatɔ, ɔlɛnatɩ mʋ́sʋ tsʋn.
37Brɛá Yesu lɔwa Olif ɩbʋ amʋ kplɩ ɔyɔ Yerusalem wulutɔ bɩ a, mʋ abuopʋ amʋ fɛ́ɛ́ bɔtswɩ ope kanfʋ Bulu kʋklʋkʋʋ, ofula amʋʋ ɔlɔbwɛ, bowun amʋ fɛ́ɛ́ sʋ. 38Bɛɛ, “Bulu oyula owie anfɩ ɔba mʋ ɩdatɔ anfɩ! Iwilwii bʋ ɔsʋsʋ. Numnyam ɩbwɛ Bulu klɛ ɔsʋsʋʋsʋ ɩnʋ.”
39Farisifɔ akʋ bʋbʋ ɔdɔm amʋtɔ. Ɩnʋ bɛbla Yesu bɛɛ, “Osunapʋ, ka fʋ abuopʋ anfɩ itin!”
40Yesu lɛbla amʋ́ ɔbɛɛ, “Ndɛ mlɩ bla mbɛɛ, nɩ aha anfɩ bɛhɩɛ kpa ɔnɔ bun kʋraa a, abwi anfɩ bɔ́kplʋn kanfʋ Bulu.”
Yesu Isu Yerusalem Sʋ
41Brɛá Yesu lɛta Yerusalem wie ta, olowun wulu amʋ sɩsɩ a, olosu ha mʋ́. 42Ɔbɛɛ, “Yerusalemfɔ, tɛkɩ ilehian ánɩ́ mlɛ́bɩ tɔá ɩtɔpʋ iwilwii ba ndɛ, tamɛ mlɩmɛtalɩ bɩ mʋ́. 43Brɛ kʋ ɩba, mlɩ alupʋ bɛ́kafia mlɩ abunti, pwɛ okpo wa mlɩ, sa mlɩ tin ɔkpagyiɔkpasʋ. 44Bɛ́hɩ wulu anfɩ pʋ́ mʋ́tɔ atsiapʋ. Bʋméesi ibwi kʋlɛ dɩnka mʋ́ basʋ, tsufɛ mlɩmɛbɩ brɛá Bulu lɛba mlɩ nkpa ɔhɔkpa!”
Ibia Agyipʋ Gya Lɛ Bulu Ɔtswɛkpa Wunsɩnɛsʋ
(Mateo 21:12-17; Marko 11:15-19; Yohane 2:13-22)
45Brɛá Yesu lowie Yerusalem a, ɔlɔyɔ Bulu ɔtswɛkpa wunsɩnɛsʋ. Olenya wie ɩnʋ alɩ, ɔlɔwa ibia agyipʋ gya bɩ. 46Ɔlɛbla amʋ́ ɔbɛɛ, “Bɔwanlɩn wa Bulu asʋn amʋtɔ bɛɛ, ‘Bɛ́tɩ mɩ ɔtswɛkpa bɛɛ, mpaɩ ɔbɔkpa.> Tamɛ mlɩlapʋ ɩnʋ mli awikplu oŋainkpa.”
47Oletsia suna atɔ Bulu ɔtswɛkpa ɩnʋ ekekegyiɛkɛ. Bulu igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ bodunka ɔkpa ánɩ́ bɔ́tsʋn mʋ́sʋ mɔ mʋ. 48Tamɛ bʋmenya, tsufɛ aha amʋ fɛ́ɛ́ bʋbuo mʋ asʋn blɩhɛ.
Currently Selected:
Luka 19: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation