Luka 16
16
Agyʋmasʋ Ɔkɩpʋ Ansɩtɩnpʋ Ɔkʋ
1Yesu lɛbla mʋ akasɩpʋ ɔbɛɛ, “Ɩwɩ onyapʋ ɔkʋ letsia, ɔbʋ agyʋmasʋ ɔkɩpʋ. Aha bowi tsa mʋ wie amʋsʋ bɛɛ, ɔdɛ mʋ gyi. 2Ɩnɩ sʋ ɔlɛtɩ oyin amʋ, fɩtɛ mʋ ɔbɛɛ, ‘Ntɔ asʋn ndenu tsu fʋ ɩwɩ alɩ? Bobu akunta ha mɩ, tsufɛ fʋmɛ́ɛtra kɩ mɩ agyʋmasʋ.> 3Agyʋmasʋ ɔkɩpʋ amʋ lɛfɩtɛ mʋ ɩwɩ ɔbɛɛ, ‘Nkalɩ nɔ́bwɛ? Mɩ wie ɔba begya mɩ. Mma ɔwʋnlɩn ánɩ́ nɛ́natɩ dɔ ha aha. Ɩbʋ mɩ pɛlɩá nɛ́natɩ kʋlɩ atɔ ɛ. 4Ɩbʋ alɛ! Nyin tɔá nɔ́bwɛ, mɛnɩ nɩ osi mɩ a, nénya aha ánɩ́ bɔ́hɔ mɩ wa amʋ́ woyitɔ.>
5“Mʋ́ sʋ ɔlɛtɩ aha ánɩ́ bʋdɛ mʋ wie ɩkɔ kʋlɛ-kʋlɛ. Ɔlɛfɩtɛ ogyankpapʋ ɔbɛɛ, ‘Ɩkɔ afɩnɩ fʋdɛ mɩ wie?> 6Ɩkɔ ɔkɩtapʋ amʋ lɛlɛ mʋ́ ɔnɔ ɔbɛɛ, ‘Nfɔ agbɔngbɔ lafanyɔ (200).> Agyʋmasʋ ɔkɩpʋ amʋ lɛbla mʋ ɔbɛɛ, ‘Tsan fʋ adansɩɛ ɔwʋlʋ amʋtɔ, afʋwanlɩn lafakʋlɛ (100).> 7Ɔlɛfɩtɛ ɔkʋ ɛ ɔbɛɛ, ‘Ɩkɔ afɩnɩ fʋdɛ?> Ɩkɔ ɔkɩtapʋ amʋ lɛbla mʋ ɔbɛɛ, ‘Bodobodo nfuo akɛntɛ ɔpɩm-ɔkʋlɛ (1,000).> Agyʋmasʋ ɔkɩpʋ amʋ lɛbla mʋ ɔbɛɛ, ‘Tsan fʋ adansɩɛ ɔwʋlʋ amʋtɔ, afʋwanlɩn lafakwe (800).>
8“Osikani amʋ lɛkanfʋ agyʋmasʋ ɔkɩpʋ anfɩ ɔma ɔnɔkwalɩ anfɩ ánɩ́ alatalɩ tɩn ansɩ alɩ.” Yesu lɔmɔ mʋ́ ɔnɔ ɔbɛɛ, “Ndɛmba-abiá bʋbuo ɔyɩtɔ atɔ ansɩtɩn ánɩ́ bɔpʋ bʋtsie amʋ́ abatɔ ɩdʋn amʋ́á bʋyin Bulu klɛ.
9“Ndɛ mlɩ bla mbɛɛ, mlɩpʋ ɔyɩtɔ atɔ bwɛ apio, mɛnɩ nɩ ɩta a, Bulu ɔbɔ́hɔ mlɩ wa mʋ woyiá ɩbʋ ɩnʋ brɛ fɛ́ɛ́tɔ. 10Ɔha ánɩ́ ɔlɛtalɩ kɩta atɔ tukuriibi, olegyi ɔnɔkwalɩ mʋ́sʋ a, mʋ kɛn obégyi ɔnɔkwalɩ atɔ kpɔnkpɔntɩ ɛsʋ nɩ. Tamɛ ɔha ánɩ́ ɔmɔwa ɔnɔkwalɩ atɔ tukuriibisʋ ɔmɔ́ɔwa ɔnɔkwalɩ atɔ kpɔnkpɔntɩsʋ. 11Mʋ́ sʋ nɩ mlɩmá ɔnɔkwalɩ ɔyɩtɔ atɔsʋ a, ma mɛɛ ɔbɔ́hɔ mlɩ gyi, pʋ ɔsʋsʋ atɔ onuto wa mlɩ ɩbɩtɔ? 12Ntɛ nɩ fʋma ɔnɔkwalɩ ɔkʋ klɛsʋ a, ma mɛɛ ɔbɔ́pʋ fʋ klɛ ha fʋ?
13“Osumpʋ ɔkʋkʋ mɛ́ɛtalɩ sum awie anyɔ. Ɔbɔ́dwɛ ɔkʋlɛ, lu ɔkʋlɛ. Ntɛ obóbu ɔkʋlɛ, omóobu ɔkʋlɛ. Fʋmɛ́ɛtalɩ sum Bulu, sum Kɔba.”
Yesu Asʋn Blɩhɛ Kʋ
(Mateo 11:12-13; 5:31-32; Marko 10:11-12)
14Farisifɔ bʋtɔdwɛ kɔba. Mʋ́ sʋ brɛá bonu Yesu asʋn blɩhɛ anfɩ a, bɔbwɛ mʋ ahinla. 15Ɩnʋ Yesu lɛbla amʋ́ ɔbɛɛ, “Mlɩtɛlɛ ɩwɩ suna ánɩ́ aha yile mlɩgyi aha ansɩtɔ, tamɛ Bulu mʋ́ yin mlɩ klʋntɔ. Tsufɛ tɔá nyankpʋsa tɛkɩá ɩbʋ labi igyi Bulu akisitɔ.
16“Mose Mbla amʋ pʋ́ Bulu ɔnɔsʋ atɔɩpʋ amʋ asʋn wanlɩnhɛ lɔyɔ agyʋma alɩɩ bɔfʋn Asu Ɔbɔpʋ Yohane brɛsʋ. Tsu mʋsʋ bʋdɛ Bulu iwiegyi amʋ ɩwɩ asʋn wanklaan ɔkan da, aha ɛ bʋdɛprɩ wie mʋ́tɔ. 17Ɔsʋ mʋ́a asɩ bɛ́talɩ mɔ ɔnɔ, tamɛ itoduahɛ ntɛ asʋnbi kʋlɛ kʋraa móowu Mose Mbla amʋtɔ.
18“Oyin okina mʋ ka layetsia ɔtsɩ bamba a, alatɔ mbʋa. Oyingyioyin ánɩ́ otsia ɔtsɩ anfɩ mʋ klu lakina mʋ ɛ latɔ mbʋa.”
Ɩwɩ Onyapʋ Ɔkʋ Mʋa Lasaro
19Yesu lɛbla amʋ́ ɔbɛɛ, “Ɩwɩ onyapʋ ɔkʋ letsia. Atati wʋlɩhɛ ɔtɛdɩda, otegyi nkpa wanklaan ekekegyiɛkɛ. 20Atɔ ɔkʋlɩpʋ ɔkʋá mʋ ɩwɩ letsitsi nlɔ ɛ letsia, bʋtɛtɩ mʋ Lasaro. Betsia pʋ ohiani anfɩ yɛyaɩ ɩwɩ onyapʋ amʋ ɔkpa ɔnɔ. 21Ɔkɩá obénya atogyihɛ mpupubiá ɩbɛ́kpakpa bun oyin amʋ ɔpʋnʋasɩ gyi. Akɩaɩ letsia beyinta mʋ nlɔ amʋ kʋraatɔ.
22“Brɛá ohiani anfɩ lowu a, Bulu-abɔpʋ botsu mʋ ya, oleyetsia anɩ nain Abraham wa ɔsʋsʋ. Ɩwɩ onyapʋ anfɩ ɛ lobowu, bopula mʋ. 23Ɔlɔyɔ ɔbʋ ɩsʋbɩtɩ ogya ánɩ́ ɩtamaduntɔ, ɔdɛ ɩwɩɔsɩn wun. Olotsu ansɩ fʋa, olowun ánɩ́ Lasaro tsie Abraham wa tsutsuutsu. 24Ɩnʋ ɔlɔkplʋn ɔbɛɛ, ‘Anɩ sɩ Abraham ee! Wun mɩ nwɛ, afʋha Lasaro ɔyɔpʋ mʋ osrebi da ntsutso pʋbɛda mɩ ɔdandʋsʋ, ilwii kpalobi. Ndɛ ɩwɩɔsɩn wun ogya anfɩtɔ dʋbɩ!>
25“Tamɛ Abraham lɛbla mʋ ɔbɛɛ, ‘Obi, kaɩn. Fʋ nkpatsiatɔ a, fegyi ɔdwɛ, Lasaro ɛ letsia ɔsɩntɔ. Sei a, ɔbʋ ɔdwɛtɔ, fʋ ɛ fʋbʋ ɔsɩntɔ. 26Ɔma a, ɩlan kpɔnkpɔɔnkpɔntɩ kʋ da anɩa fʋnyɔ nsɩnɛ. Mʋ́ sʋ ɔhaa mɛ́ɛtalɩ fa tsu nfɩ ba fʋ wa ɩnʋ, ɔhaa ɛ mɛ́ɛtalɩ fa tsu ɩnʋ ba anɩ wa nfɩ.> 27Oyin amʋ lɛbla Abraham ɔbɛɛ, ‘Mʋmʋ nobwii ɩpa, anɩ sɩ Abraham, wa Lasaro sɩsɩ mɩ sɩ woyitɔ. 28Mbʋ apio yinhɛ abanu akʋ ɩnʋ. Ɔyɛda amʋ́ ɔla, mɛnɩ bowu a, bʋmɛ́ɛba bowun ɩwɩɔsɩn anfɩ odu.>
29“Abraham lɛlɛ mʋ́ ɔnɔ ɔbɛɛ, ‘Mose mʋa Bulu ɔnɔsʋ atɔɩpʋ amʋ nwʋlʋ bʋ amʋ́ wa, ɩdɛ amʋ́ ɔla da. Bʋnu mʋ́, abʋgyi mʋ́sʋ.> 30Oyin amʋ lɛlɛ mʋ́ ɔnɔ ɔbɛɛ, ‘Anɩ sɩ Abraham, asʋn amʋ nu kɛkɛ mɛ́ɛha amʋ́ abʋdamli klʋntɔ. Mboun nɩ ɔkʋ ɔkʋsʋ tsu afulitɔ yɔ amʋ́ wa a, bɛ́damli klʋntɔ.> 31Tamɛ Abraham lɛbla mʋ ɔbɛɛ, ‘Nɩ bʋmegyi Mose mʋa Bulu ɔnɔsʋ atɔɩpʋ amʋ nwʋlʋtɔ asʋn amʋsʋ a, ɔkʋ ɔkʋsʋ tsu afulitɔ yɔ ɩnʋ kʋraa a, bʋmóonu ɔha amʋ asʋn.> ”
Currently Selected:
Luka 16: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation