Luka 15
15
Kufa Fwɩhɛ
(Mateo 18:12-14)
1Ɛkɛ ɔkʋ lampoo ahɔpʋ pʋ́ lakpan abwɛpʋ bɛba Yesu asʋn blɩhɛ onukpa. 2Farisifɔ pʋ́ Mose mbla asunapʋ amʋ bowunti mʋ bɛɛ, “Oyin anfɩ mʋa lakpan abwɛpʋ tɛnatɩ, bʋtɔwa ɩbɩ gyi atɔ kʋraa.” 3Mʋ́ sʋ Yesu lɛha yebi pʋsuna amʋ́ atɔ ɔbɛɛ,
4“Mlɩtɔ ma bʋ akufa lafakʋlɛ (100), ɔkʋlɛ ɔfwɩ a, omesi adukweba-kweba (99) trahɛ wa dimbitɔ ɩnʋ, yodunka mʋ alɩɩ kpɛfʋn brɛá obówun mʋ? 5Nahogyi mbɛɛ, nɩ owun mʋ a, ansɩ bégyi mʋ, obótsu mʋ wa nkɔnkɔ, 6pʋ mʋ ya woyitɔ. Ɔbɛ́tɩ mʋ anyawie pʋ́ mʋ aba, bla amʋ́ ɔbɛɛ, ‘Mlɩha anya ansigyi. Nawun mɩ kufa amʋʋ ɔlɔfwɩ amʋ!> 7Alɩ kɛn ndɛ mlɩ bla mbɛɛ, nɩ lakpan ɔbwɛpʋ ɔkʋlɛ pɛ ɔdamli klʋntɔ a, ansɩ bɛ́hɩɛ gyi aha ɔsʋsʋ ɩnʋ dʋn alɩá ibégyi amʋ́ aha wanklaan adukweba-kweba (99) ánɩ́ bʋmɛtra hian klʋntɔdamli ɩwɩ.
Kɔba Fwɩhɛ
8“Ntɛ nɩ ɔtsɩ ɔkʋ bʋ sika fututu idu, mʋ́tɔ kʋlɛ lafwɩ a, omóonywɛ ɔkandɩɛ kɩkɩ mʋ woyitɔ wanklaan, kpakpa ntobitɔ kɩ, fɛɩ woyi amʋtɔ wanklaan yɔfʋn brɛá alawun mʋ́? 9Nɩ owun mʋ́ a, ɔbɛ́tɩ mʋ apio aba, bla amʋ́ ɔbɛɛ, ‘Mlɩha anya ansigyi. Nawun mɩ sika fututu amʋʋ ɩlɔfwɩ amʋ.> 10Ndɛ mlɩ bla mbɛɛ, alɩ ansɩ bɛ́hɩɛ gyi Bulu-abɔpʋ nɩ lakpan ɔbwɛpʋ ɔkʋlɛ ɔdamli klʋntɔ nɩ.”
Obi Fwɩhɛ Ɔkʋ
11Yesu lɛtra ha amʋ́ yebi ɔbɛɛ, “Oyin ɔkʋ letsia, ɔbʋ abi yinhɛ anyɔ. 12Ɔkʋsʋ amʋ lɛbla mʋ sɩ ɔbɛɛ, ‘Mɩ sɩ, ye fʋ atɔtɔ, afʋpʋ mɩ klɛ ha mɩ.> Ɩnʋ mʋ sɩ lɛkɩta mʋ atɔtɔ ye ha amʋ́. 13Imegyi nkɛ kʋkʋ ɔkʋsʋ amʋ lɔkʋla mʋ atɔ fɛ́ɛ́, olotu ɔkpa yɔ tsutsuutsu ɔmá kʋtɔ. Ɩnʋ oleyetsia nkpa lalahɛ, yinta mʋ atɔ amʋ fɛ́ɛ́. 14Brɛá oleyinta atɔ amʋ ta a, akʋn kpɔnkpɔntɩ kʋ lɛba ɔmá amʋtɔ, ɔlɔwa akʋn dɩ bɩ. 15Mʋ́ sʋ ɔlɔpʋ ɩwɩ yɛmanta ɩnʋyin ɔkʋsʋ, oyin amʋ lɛkpa mʋ ya mʋ ibuasɩ ɔbɛɛ, ɔyɛkɩ mʋ mprakuosʋ ha mʋ. 16Tɛkɩ olekleá obétsia gyi mprakuo atogyihɛ amʋ kʋ, tamɛ ɔhaa mɛha mʋ mʋ́ ɩwɩ ɔkpa. 17Brɛá mʋ ansɩ leyinki ba mʋ ɩwɩsʋ a, ɔlɛfɩtɛ mʋ ɩwɩ ɔbɛɛ, ‘Apafɔ amɔmʋ kʋraa ma mɩ sɩ woyitɔ, bʋmɛdɛ atɔ gyi sian ekekegyiɛkɛ? Mʋ́ ntsie nfɩ, akʋn dɛ mɩ mɔ? 18Nɔ́kʋsʋ yinki yɔ mɩ sɩ wa, yɛbla mʋ mbɛɛ, mɩ sɩ, napʋ ɩla gyi Bulu, pʋgyi fʋ ɛ. 19Mmɛkana ánɩ́ fɛtra tɩ mɩ fʋ bi. Pʋ mɩ bwɛ fʋ apafɔ amʋtɔ ɔkʋlɛ.> 20Mʋ́ sʋ ɔlɔkʋsʋ pʋ ɔkpa ɔba mʋ sɩ wa.
“Brɛá olowotii, mʋ sɩ lowun mʋ sɩsɩ a, ɔlɔwa mʋ nwɛ, ɔlɛsrɩ yefia mʋ, lata mʋ puta. 21Ɩnʋ mʋ bi amʋ lɛbla mʋ ɔbɛɛ, ‘Mɩ sɩ, napʋ ɩla gyi Bulu, pʋgyi fʋ ɛ. Mmɛkana ánɩ́ fɛ́tra tɩ mɩ fʋ bi.> 22Tamɛ mʋ sɩ lɛtɩ mʋ asumpʋ, bla amʋ́ ɔbɛɛ, ‘Mlɩwa ɔsa yotsu atadɩɛ wanklaan amʋ bɔwa mʋ. Mlɩwa mʋ opetia, amlɩwa mʋ ntʋkʋta. 23Mlɩyɛlɛ ɔnantswie yinhɛ kanahɛ amʋʋ alawa nfɔ amʋ ba, amlɩbɔmɔ mʋ, apʋgyi nkɛ ha mʋ. 24Tsufɛ mɩ bi anfɩ lawu tsinki. Ɔlɔfwɩ, anɩlawun mʋ.> Ɩnʋ bɔwa nkɛ gyi bɩ.
25“Alɩ brɛ amʋtɔ a, obi dɛhɛn amʋ bʋ ndɔtɔ. Brɛá olotsu ndɔ amʋtɔ ɔba, alata woyi wie ta a, olonuá plei dɛ woyitɔ ɩnʋ. 26Mʋ́ sʋ ɔlɛtɩ mʋ sɩ asumpʋ amʋtɔ ɔkʋlɛ, fɩtɛ ɔbɛɛ, ‘Amansʋ laba?> 27Osumpʋ amʋ lɛlɛ mʋ́ ɔnɔ ɔbɛɛ, ‘Fʋ pio laba. Mʋ́ sʋ fʋ sɩ laha bamɔ ɔnantswie kanahɛ amʋ, tsufɛ alayinki bɔtʋ mʋ, ɔbʋ nkpa, ɔbʋ ɔnlɩn.>
28“Ɔblɔ lɛkɩta ɔdɛhɛn amʋ. Mʋ́ sʋ olesin mmua. Mʋ sɩ lɛdalɩ ba bokokoli mʋ ɔbɛɛ, ɔba woyitɔ. 29Tamɛ ɔlɛlɛ mʋ́ ɔnɔ ɔbɛɛ, ‘Mɩ sɩ, kɩ nfi dʋdʋʋdʋá napʋtsia fʋ wa sum fʋ. Mmɔkʋbwɛ mábula kʋkʋ kɩ. Tamɛ fʋmɔkʋha mɩ ɔkpalabi fɛɛ mɩa mɩ aba apʋwa ɩwɩ ansigyi kɩ. 30Tamɛ fʋ bi anfɩ alayinta fʋ togyitɔ, mʋa akipʋ bayegyi nkpa anfɩ mʋ́ laba a, famɔ ɔnantswie yinhɛ kanahɛ amʋʋ alawa nfɔ amʋ ha mʋ!> 31Ɩnʋ mʋ sɩ lɛbla mʋ ɔbɛɛ, ‘Mɩ bi, yɛ fʋ mʋ́ fʋbʋ mɩ wa bregyibrɛ. Fʋbʋ mɩ atɔ fɛ́ɛ́. 32Fʋ pio anfɩ lawu tsinki. Ɔlɔfwɩ, anɩlawun mʋ. Mʋ́ sʋ ilehian ánɩ́ abégyi mʋ́ nkɛ, nya ansigyi.> ”
Currently Selected:
Luka 15: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation