Luka 12
12
Apinabwɛbibwɛ Ɩwɩ Ɔlada
(Mateo 10:26-27)
1Igyi alɩ, brɛá aha mpɩm-mpɩm bɛba befia ɩnʋ, bʋdɛ aba ayabiasɩ tsatsa a, Yesu legyankpa da mʋ akasɩpʋ amʋ ɔla ɔbɛɛ, “Mlɩkɩ wanklaan Farisifɔ bodobodotu-afasʋ,#12:1 Farisifɔ Bodobodotu-afa gyi amʋ́ afunu atosunahɛ. Kɩ Mat. 16:12. tsufɛ apinabwɛbi abwɛpʋ bʋgyi. 2Tɔtɔ ma ɩnʋá babun atɔ mʋ́sʋá bʋmóobwii mʋ́sʋ. Togyitɔ ɛ ma ɩnʋá ileŋain ánɩ́ ɩmɛ́ɛlɩn ɔwan. 3Bɛda asʋn ánɩ́ mlɩlɛblɩ nklobitɔ ɔkan. Kugyikʋá igyi, ɩplɔ ibóbon.
Ɔha Ánɩ́ Abénya Ifu
(Mateo 10:28-31)
4“Apio aba, ndɛ mlɩ bla mbɛɛ, mlɩmánya nyankpʋsa ifu. Ɔbɛ́talɩ mɔ mlɩ ɔyʋlʋ, tamɛ ɔmɛ́ɛtalɩ bwɛ mlɩ tɔtɔ mʋ́ ɔma. 5Nósuna mlɩ ɔha ánɩ́ mlɩnya ifu. Mʋgyi Bulu. Mʋ ɔmɔ mlɩ ɔma a, ɔbʋ tumi tswɩ mlɩ ɔkla ɛ wa ɩsʋbɩtɩ ogya ánɩ́ ɩtamaduntɔ. Ee! Mʋ mlɩnya ifu nɩ!
6“Afɩnɩ bʋtɔkʋkʋ fɛ akensire anu kɛkɛ? Megyi kɔba ana? Amʋ́ kʋraa a, Bulu tamatan ɔkʋkʋsʋ, 7mɛnɩ bɛɛ mlɩá Bulu yin mlɩ nwunsʋ-imi kʋraa klatɔ. Mʋ́ sʋ mlɩmánya ifu. Mlɩbʋ bia dʋn akensire tsɔtsɔɔtsɔ!
Adansɩɛgyi Pʋ́ Asʋnkina
(Mateo 10:32-33; 12:32; 10:19-20)
8“Ndɛ mlɩ bla mbɛɛ, nɩ ɔkʋ lɛtalɩ gyi mɩ ɩwɩ adansɩɛ ahatɔ a, mɩ, Nyankpʋsa-Mʋ-Bi anfɩ ɛ négyi mʋ ɩwɩ adansɩɛ Bulu-abɔpʋ ansɩtɔ. 9Tamɛ nɩ ɔkʋ lekina mɩ ahatɔ a, mɩ ɛ nékina mʋ Bulu-abɔpʋ ansɩtɔ.
10“Ɔhagyiɔha ánɩ́ ɔlɛblɩ mɩ, Nyankpʋsa-Mʋ-Bi anfɩ ɩwɩ asʋn lalahɛ a, Bulu ɔbɛ́talɩ sikie mʋ. Tamɛ nɩ ɔkʋ lɛblɩ Ɔŋɛ Wankɩhɛ amʋ ɩwɩ abususʋ a, Bulu méesikie ndɛ, oméesikie mʋ ɔkɛ.
11“Nɩ bɛkpa mlɩ ya Yudafɔ ofiakpa, ntɛ ɔmásʋ agyipʋ pʋ́ awie ansɩtɔ a, mlɩmágywɩɩn asʋn ánɩ́ mlɛ́blɩ pʋka ɩwɩ lɛ ntɛ alɩá mlɛ́lɛ mʋ́ ɔnɔ. 12Tsufɛ Ɔŋɛ Wankɩhɛ amʋ obósuna mlɩ alɩá mlɛblɩ alɩ brɛ amʋtɔ.”
Osikani Mimlahɛ Ɔkʋ Ɩwɩ Yebi
13Ɔdɔm amʋtɔ ɔha ɔkʋ lɛbla Yesu ɔbɛɛ, “Osunapʋ, bla mɩ dɛhɛn, ɔha mɩa mʋnyɔ aye atɔá anɩ sɩ lesi yaɩ anɩtɔ.”
14Tamɛ Yesu lɛfɩtɛ mʋ ɔbɛɛ, “Agya, ma lɛyaɩ mɩ asʋn ogyipʋ ntɛ atɔtɔ oyepʋ ha mlɩ?” 15Mʋʋ ɔlɛbla aha amʋ fɛ́ɛ́ ɔbɛɛ, “Mlɩkɩ wanklaan ɔnsɩpɛwasʋ. Tsufɛ nyankpʋsa nkpa ɩma atonyahɛ tsɔtsɔɔtsɔtɔ.”
16Ɩnʋ ɔlɛha amʋ́ yebi ɔbɛɛ, “Osikani ɔkʋ ndɔtɔ-atɔ lɛhɩɛ wa alɛ ofi ɔkʋ. 17Mʋʋ ɔlɛfɩtɛ mʋ ɩwɩ ɔbɛɛ, ‘Nkalɩ nɔ́bwɛ mɩ atɔ-abi anfɩ? Mma ɔtɩnɛá nɔ́pʋyaɩ.> 18Ɩnʋ ɔlɛblɩ ɔbɛɛ, ‘Nyin tɔá nɔ́bwɛ. Nóbwie mɩ ɩdan, lawa akpɔnkpɔntɩ. Mʋ́tɔ nɔ́pʋ mɩ atɩkɔ pʋ́ mɩ ntobi amʋ wa nɩ. 19Fówun nabla mɩ ɔkla mbɛɛ, “Mɩ ɔkla, ɩklʋn ɩdɩ fʋ asɩ. Kɩ, fʋbʋ atɔ tsɔtsɔɔtsɔá ɩda ha fʋ nfi-nfi. Gyi, afʋnun, ansɩ igyi fʋ.” > 20Ɩnʋ Bulu lɛbla mʋ ɔbɛɛ, ‘Ɔha mimlahɛ! Onyenɩ ndɛ fʋ ɔkla hɔ lɛ fʋ ɩbɩtɔ. Ma obégyi atɔ anfɩ fakle yaɩ anfɩ fɛ́ɛ́?> ”
21Yesu lɔmɔ mʋ́ ɔnɔ ɔbɛɛ, “Alɩ bɔ́bwɛ ɔha ánɩ́ olekle atɔ yaɩ ha mʋ ɩwɩ ɔsʋlʋ anfɩsʋ, tamɛ ɔma tɔtɔ Bulu wa nɩ.”
Ansɩ Pʋdɩnka Bulusʋ
(Mateo 6:25-34)
22Ɩnʋ Yesu lɛbla mʋ akasɩpʋ ɔbɛɛ, “Mʋ́ sʋ ndɛ mlɩ bla mbɛɛ, mlɩmáhan ɩwɩ tɔá mlégyi, tɔá mlónu pʋ́ tɔá mlɛ́dɩda sʋ. 23Nyankpʋsa nkpa dehian dʋn atogyihɛ. Mʋ ɔyʋlʋ ɛ ɩdʋn atɔ dɩdahɛ. 24Mlɩkɩ aklankpa. Bʋtamadu, bʋtamasɩɛtɩ wa ɩdantɔ. Bʋma ɩdan ntɛ ɩfa, tamɛ Bulu tɛha amʋ́ atogyihɛ. Mlɩmá labi dʋn mbubwi? 25Mlɩtɔ ma ɔbɛ́talɩ han ɩwɩ pʋ brɛ kpalobi tsɩa mʋ nkɛtɔ? 26Nɩ mlɩmɛ́ɛtalɩ bwɛ ɩtɔ tukuriibi anfɩ kʋraa a, ntogyi sʋ mlɩdɛ ɩwɩ han trahɛ amʋsʋ? 27Mlɩkɩ alɩá pututɔ-oyi ntswɩtswɩ tɛdan. Ɩtamayɔ agyʋma ntɛ lʋ atati. Tamɛ ndɛ mlɩ bla mbɛɛ, Owie Salomo, mʋ inya fɛ́ɛ́tɔ a, ɔmɛtalɩ hɩhɩɛ ɩwɩ wa akɩlɛ fɛ oyi ntswɩtswɩɩ anfɩtɔ kʋkʋ. 28Nɩ Bulu dɛ ɩfa ánɩ́ ndɛ ɩlɩɩ, ɔkɛ ɩlawu, bawa mʋ́ ogya tati dɩda a, ɔmɛ́ɛtalɩ dɩda mlɩ atati dʋn mʋ́? Ntogyi sʋ mlɩ hogyi mɔtsɔ alɩ?
29“Mʋ́ sʋ mlɩmágywɩɩn tɔá mlégyi ntɛ tɔá mlónun ɩwɩ, ɩha mlɩ ansɩ ɩpɛ. 30Tsufɛ ɩnɩ aná ɔmá-ɔmá bʋtɛsrɩ gya nɩ. Mlɩ Sɩ amʋ yin ánɩ́ ɩdɛ mlɩ hian. 31Ɩtɔá mlɩgyankpa dunka gyi Bulu iwiegyi, Bulu ɔbɔ́pʋ ɩnɩ tsɩa mʋ́tɔ ha mlɩ.
Atonyahɛ Pʋyaɩ Ɔsʋsʋ
(Mateo 6:19-21)
32“Ɔpasua tukuriibi, mlɩmánya ifu. Tsufɛ ɩbʋ mlɩ Sɩ amʋ ɔdwɛá ɔbɔ́pʋ iwie ogyikpa amʋ ha mlɩ. 33Mlɩfɛ mlɩ ɩwɩsʋ atɔ, amlɩpʋ kɔba amʋ kie aha ánɩ́ bʋma tɔtɔ. Mlɩbɩn akɛntɛá iméeyinta ha mlɩ ɩwɩ. Mʋ́gyi, mlɩyaɩ mlɩ siadɩɛ ɔsʋsʋ. Ɩnʋ mʋ́ a, kʋkʋ mɛ́ɛdalɩ mʋ́tɔ, tsufɛ awikplu bʋma ɩnʋ, atɛplɛ ɛ bʋtamawɩ atɔ ɩnʋ. 34Tsufɛ ɔtɩnɛá fʋ siadɩɛ bʋ a, ɩnʋ fʋ agywɩɩn tetsia.
Asumpʋá Bʋtogyo
35“Mlɩwa atadɩɛ, amlɩnywɛ mlɩ nkandɩɛ. 36Mlɩbwɛ ɩwɩ fɛ asumpʋá bʋdɛ amʋ́ wie ɔkpa kɩ, obótsu ɔka otsiakpa ba. Fɛkɩ nɩ ɔba bɛda klʋnsʋ a, béfinki ha mʋ. 37Ansɩ bégyi asumpʋ oduá amʋ́ wie ɔbɛ́ba bɔtʋ amʋ́ bʋtsie bʋgyo mʋ. Ɔnɔkwalɩ ndɛ mlɩ bla. Amʋ́ wie amʋ ɔbɛ́saba tati, ha amʋ́ bétsia ɔpʋnʋasɩ. Mʋ onuto ɔbɔ́kɔnkɩ atogyihɛ amʋ ha amʋ́. 38Ansɩ bégyi amʋ́, nɩ ɔba bɔtʋ amʋ́ bʋtsie bʋgyo mʋ, ɔyɩnsɩnɛ ntɛ bakɛ. 39Tamɛ mlɩnu asʋn anfɩ. Nɩ woyi mʋ wie yin brɛá owikplu ɔbɛ́ba mʋ woyitɔ a, tɛkɩ omesi woyi amʋ tswɩ, owikplu mobwie wie wi mʋ atɔ. 40Mlɩ ɛ mlɩgyo, tsufɛ mɩ, Nyankpʋsa-Mʋ-Bi anfɩ nɛ́ba brɛá mlɩ ansɩ mɛdɩn mɩsʋ.”
Osumpʋ Wanklaan Pʋ́ Ɔlalahɛ
(Mateo 24:45-51)
41Petro lɛfɩtɛ mʋ ɔbɛɛ, “Anɩ nkʋlɛ fʋdɛ yebi anfɩ ha loo, ntɛ anɩa aha anfɩ fɛ́ɛ́?”
42Yesu lɛblɩ ɔbɛɛ, “Ma mɛɛ gyi osumpʋá ɔlɛtɩn ansɩ, ɔbʋ ɔnɔkwalɩ? Mʋ ɩbɩtɔ mʋ wie tɔpʋ mʋ aba atrahɛ wa ɔbɛɛ, ɔha amʋ́ atogyihɛ dɩnka brɛsʋ. 43Ansɩ bégyi osumpʋ amʋ, nɩ mʋ wie amʋ ɔba bowun ánɩ́ lɛlɛ ɔdɛ mʋ́ bwɛ. 44Ɔnɔkwalɩ ndɛ mlɩ bla. Mʋ wie amʋ ɔbɔ́pʋ mʋ atɔ fɛ́ɛ́ wa mʋ ɩbɩtɔ. 45Tamɛ nɩ osumpʋ amʋ lɛblɩ wa nwuntɔ ɔbɛɛ, ‘Mɩ wie ɩbabɩ mɔkʋfʋn, ɔbɔ́wa ɔpá.> Ɩnɩ sʋ olefi asɩ ɔdɛ mʋ aba asumpʋ atsɩ mʋ́a ayin da, ɔdɛ atɔ gyi si amʋ́, ɔdɛ nta nun bʋ a, 46mʋ wie amʋ ɔbɛ́ba bofwie mʋtɔ ɛkɛá ɔmɛdɩn ansɩ. Mʋ wie amʋ ɔbɛ́hɩɛ tɩtɩ mʋtɔ, tra bɩtɩ mʋa aha ánɩ́ bɔmɔhɔ mʋ gyi ɩsʋ kɛkɛ.
47“Osumpʋ oduá oyin tɔá igyi mʋ wie apɛ, tamɛ ɔmɛla ɩwɩ bwɛ yaɩ a, mʋ wie ɔbɛ́hɩɛ pɩtɩ mʋ atɔ wanklaan. 48Tamɛ osumpʋá omeyin mʋ wie apɛ, ɔlɔbwɛ tɔá ilehian ha atɔ pɩtɩ a, mʋ wie ɔbɛ́pɩtɩ mʋ kpalobi. Bulu tɛfɩtɛ tsɔtsɔ tsu ɔha ánɩ́ ɔlɛha mʋ tsɔtsɔ wa, ɔtɛfɩtɛ tsɔtsɔɔtsɔ ɛ tsu ɔha ánɩ́ ɔlɛha tsɔtsɔɔtsɔ wa.
Ipian Yesu Lɔpʋba, Megyi Iwilwii
(Mateo 10:34-36)
49“Ogya ɔdʋdakpa nɛba ɔsʋlʋ anfɩsʋ. Nɩ mɩ nkʋlɛ sʋ mʋ́ a, tɛkɩ idetsii dodoodo. 50Asubɔ kʋ ɩda mɩsʋá bɔ́bɔ mɩ. Mɩ klʋn mɛ́ɛdɩ mɩ asɩ yɔfʋn brɛá ɩlamɔ ɔnɔ. 51Ɩmábwɛ mlɩ fɛ iwilwii nɔpʋba ɔsʋlʋ anfɩsʋ. Megyi iwilwii, aha nsɩnɛ yinta nɔpʋba. 52Tsufɛ tsu sei pʋya a, woyiá aha abanu bʋbʋ mʋ́tɔ a, abasa bɔ́kʋsʋ lɩɩ abanyɔsʋ. Abanyɔ ɛ bɔ́kʋsʋ lɩɩ abasasʋ. 53Abi yinhɛ mʋ́a amʋ́ asɩ nsɩnɛ ibéyinta. Abi tsɩhɛ mʋ́a amʋ́ ayin ɛ nsɩnɛ ibéyinta. Osia tsɩhɛ mʋa mʋ sia tsɩhɛ nsɩnɛ ɛ ibéyinta.”
Brɛtɔ Asʋn Asɩnu
(Mateo 16:2-3)
54Yesu lɛtra bla aha amʋ ɔbɛɛ, “Nɩ nyankpʋ obila bʋsʋ a, mlɩtɛblɩ mlɩaa, ndɛ nyankpʋ obótswie; lɛlɛ ototswie. 55Nɩ nsaɩntɔ itsu fʋa a, mlɩtɛblɩ mlɩaa, ndɛ owi ɔbɛ́lɩn; lɛlɛ ɩtɛlɩn. 56Apinabwɛbi abwɛpʋ! Mlɩyin alɩá bʋtɛlɛ ɔsʋlʋsʋ pʋ́ nwʋlʋtasʋ atɔ asɩ. Ntogyi sʋ mlɩmɛtalɩ nu ɩtɔ anfɩ ɩdɛba sei anfɩ mʋ́ asɩ?
Anyaba Nsɩnɛla
(Mateo 5:25-26)
57“Ntogyi sʋ mlɩtamatalɩ gyi asʋn wanklaan ha mlɩ ɩwɩ? 58Nɩ ɔkʋ ɔsama fʋ a, wa ɔsa ha amlɩblɩ mʋ́ woyitɔ, mɛnɩ fʋ onyaba mɔ́ɔpʋ fʋ yaa asʋn ogyikpa. Fówun asʋn ogyipʋ méegyi fʋ asʋn, pʋ fʋ wa prosiyin ɩbɩtɔ, ɔwa fʋ obu. 59Nɩ megyi alɩ a, mmɛ́ɛmlɛ fʋ, nkɛtɩ faka togyitɔ ta asa fɛ́dalɩ ɩnʋ.”
Currently Selected:
Luka 12: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation