Hebrifɔ 1
1
Bulu Asʋn Ɩna Mʋ Bi Amʋsʋ
1Bɩmbɩ amʋ a, Bulu lɔtsʋn ɔkpa ɔtsan-ɔtsansʋ tɔɩ kpla anɩ anain brɛ tsɔtsɔɔtsɔtɔ tsʋn mʋ ɔnɔsʋ atɔɩpʋsʋ. 2Tamɛ sei anfɩ ɔyɩ ɩba bɔmɔ ɔnɔ anfɩ mʋ́ a, alatɔɩ kpla anɩ tsʋn mʋ Bi amʋsʋ. Mʋgyi ɔha ánɩ́ Bulu lɛlɛá ogyi mʋ atɔ nɩ. Mʋ Bi anfɩsʋ ɔlɔtsʋn bwɛ togyitɔ. 3Mʋsʋ Bulu Ɔkpɔnkpɔntɩ numnyam tɔwankɩ tsʋn. Mʋgyi ɔha ánɩ́ ɔlɛhɩɛ lɩan Bulu, ɔdɛ mʋ asʋn amʋʋ ɩbʋ tumi amʋ pʋkɩ togyitɔsʋ nɩ. Brɛá ɔlɔgyʋra anɩ ta a, oletsia ɔsʋsʋ Bulu Otumipʋ amʋ gyɔpɩsʋ.
Bulu Mʋ Bi Amʋ Lɔfʋa Dʋn
4Bulu lotsu mʋ Bi amʋ fʋa dʋn Bulu-abɔpʋ fɛ́ɛ́. Alɩ kɛn ɔlɛha mʋ ɩda dʋn amʋ́ nɩ. Ɩnɩ losuna ánɩ́ ɔdʋn amʋ́ fɛ́ɛ́. 5Tsufɛ Bulu mɔkʋbla mʋ abɔpʋ amʋtɔ ɔkʋkʋʋkʋ kɩ ɔbɛɛ,
“Mɩ Bi gyi fʋ,
ndɛ nabwɛ fʋ Sɩ.”
Ntɛ bla amʋ́tɔ ɔkʋkʋ ɔbɛɛ,
“Nɔ́bwɛ fʋ Sɩ,
fʋ ɛ fɔ́bwɛ mɩ Bi.”
6Ɩnɩ ɔma asa Bulu ɔbɔ́wa mʋ Bitɩ amʋ sɩsɩ ɔyɩtɔ a, ɔlɛblɩ ɔbɛɛ,
“Mɩ abɔpʋ fɛ́ɛ́ bʋsum mʋ.”
7Tɔá ɔlɛblɩ tsu mʋ abɔpʋ amʋ mʋ́ ɩwɩ gyi,
“Nabwɛ mɩ abɔpʋ fɛ afu.#1:7 afu ntɛ ɔŋɛ. Ɔŋɛ mʋ́a afu lɛlɩan aba Griki ɔblɩtɔ.
Nabwɛ mɩ asumpʋ fɛ ogya plɛnplɛn.”
8Tamɛ ɔlɛbla mʋ Bi amʋ mʋ́ ɔbɛɛ,
“Oo Bulu, fʋ iwiegyi mɛ́ɛta ɛkɛkɛɛkɛ!
Yilebwɛ gyi fʋ iwiegyi akɔnfra.
9Yilebwɛ fʋtekle. Fʋtekisi lalahɛ fɛ́ɛ́.
Mʋ́ sʋ mɩ, fʋ Wie Bulu nalɛ fʋ, da fʋ ofuli.
Napʋ ansigyi wa fʋtɔ dʋn fʋ aba.”
10Bulu asʋn wanlɩnhɛ amʋ lɛtra blɩ ɔbɛɛ,
“Mɩ Wie, fʋlɔwa ɔsʋlʋ ntswɩasɩ brɛá fefi ɔyɩ asɩ.
Fʋ onuto ɩbɩ fɔpʋbwɛ ɔsʋsʋ.
11Mʋ́ fɛ́ɛ́ ɩbɔ́fwɩ, tamɛ fʋ mʋ́ fétsia brɛ fɛ́ɛ́.
Mʋ́ fɛ́ɛ́ ɩbɔ́bwɛ dada fɛ tatida.
12Fókunta mʋ́ fɛ tati.
Fɛ́tsɛ mʋ́ fɛ atadɩɛ.
Tamɛ fʋ mʋ́ fʋtamatsɛ.
Fʋ nkpa mɔ́ɔmɔ ɔnɔ ɛkɛkɛɛkɛ.”
13Bulu mɛbla mʋ ɔbɔpʋ ɔkʋkʋ ɔbɛɛ,
“Tsia mɩ gyɔpɩsʋ,
yɔfʋn brɛá nɔ́pʋ fʋ alupʋ bwɛ fʋ ayabi oyikpa.” fɛ alɩá ɔlɛbla mʋ Bi amʋ.
14Ntɔ mɛɛ Bulu-abɔpʋ bʋgyi? Megyi ɔŋɛ bʋgyi, Bulu tɔwa bʋtɔbʋa aha ánɩ́ ɔbɔ́hɔ amʋ́ nkpa?
Currently Selected:
Hebrifɔ 1: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation