2 Korintofɔ 3
3
Bulu Ntam Pɔpwɛ Asumpʋ
1Asʋn anfɩ anɩdɛblɩ anfɩ ɩtra desuna ánɩ́ anɩdɛ ɩwɩ kanfʋ suna mlɩ loo? Ntɛ ilehian ánɩ́ abɔ́pʋ anɩ adansɩɛ nwʋlʋ ba mlɩ, ntɛ abɔ́hɔ mʋ́ tsu mlɩ wa fɛ alɩá akʋ bʋtɔbwɛ? 2Ɛkɛkɛɛkɛ! Mlɩ onuto tsiatɔ gyi adansɩɛ nwʋlʋá bawanlɩn dɩnka anɩ klʋnsʋ, ɔhagyiɔha dɛ mʋ́ wun kla, pʋbɩ ánɩ́ anɩdɛ agyʋma wanklaan yɔ. 3Mlɩgyi ɔwʋlʋá Kristo lɔwanlɩn, ɩlɔtsʋn anɩsʋ ba. Tamɛ megyi oyipɛ ɔlɔpʋwanlɩn mʋ́, Bulu Ɔkɩankpapʋ amʋ Ɔŋɛ ɔlɔpʋwanlɩn mʋ́. Megyi abwi pɛtɛplɛ anyɔsʋ#3:3 Abwi pɛtɛplɛ anyɔ amʋʋ Bulu lɔwanlɩn mʋ Mbla Du dɩnka mʋ́sʋ ha Mose amʋ. ɛ ɔlɔwanlɩn mʋ́ dɩnka, mboun anyankpʋsa klʋnsʋ.
4Anɩbʋ ɔkpa blɩ alɩ, tsufɛ Kristo sʋ anɩ ansɩ dɩn Bulusʋ. 5Anɩyin ánɩ́ anɩmɔfʋn ánɩ́ abɛ́talɩ bwɛ tɔtɔ anɩ onuto ɩwɩsʋ. Bulu sʋ anɩlɔfʋn ha togyitɔ bwɛ. 6Mʋlaha anɩlabwɛ mʋ ntam pɔpwɛ amʋ asumpʋ. Megyi ɩbɩ Bulu lɔpʋwanlɩn mʋ́ mʋ́, mboun Ɔŋɛ Wankɩhɛ amʋ. Tsufɛ mbla wanlɩnhɛ amʋ ɩtɔpʋ lowu ba, tamɛ Ɔŋɛ Wankɩhɛ klɛ amʋ mʋ́ ɩtɔpʋ nkpa ba.
7Mbla dada amʋʋ Bulu lɔwanlɩn dɩnka abwi anyɔsʋ amʋ ɩlɔpʋ lowu ba. Tamɛ mʋ́ numnyam lɛha Mose ansɩtɔ lɛhɩɛ wankɩ asa ɔlɔpʋba Israelfɔ. Brɛá numnyam amʋ ɔnɔ ɩdɛ asɩba o a, bʋmɛtalɩ kɩ mʋ ansɩtɔ. 8Ɩnɩá mbla wanlɩnhɛ amʋ lenya numnyam alɩ a, mʋmʋ Ɔŋɛ Wankɩhɛ amʋ gyumagyihɛ numnyam ɩbɛ́hɩɛ dʋn mʋ́! 9Mbla wanlɩnhɛ amʋʋ ɩtɛha anɩtegyi ɩpɔn amʋ kʋraa ɩbʋ numnyam. Mʋmʋ nkalɩ Ɔŋɛ Wankɩhɛ gyumagyihɛ amʋʋ ɩhɩɛ bʋ numnyam dʋn mʋ́ amʋ ɩbɔ́bwɛ? Tsufɛ ɩtɛha anɩtegyi asʋ Bulu ansɩtɔ! 10Mʋmʋ idesuna ánɩ́ Bulu mbla dada amʋ ɩtra ma numnyam kʋraa. Pɔpwɛ anfɩ numnyam lagyi mʋ́sʋ. 11Tsufɛ nɩ Mbla dada amʋʋ imetsia wa ɔpá amʋ ɩbʋ numnyam alɩ a, mʋmʋ pɔpwɛ anfɩ ibétsia brɛ fɛ́ɛ́ anfɩ klɛ ɩbɛ́hɩɛ dʋn mʋ́!
12Anɩ ansɩ dɩn ntam pɔpwɛ anfɩsʋ. Mʋ́ sʋ anɩbʋ ɔkpa tɔɩ faan. 13Anɩmegyi fɛ Moseá oletsia pʋ tati bun nwun, mɛnɩ Israelfɔ bʋmóowun mʋ ansɩtɔ wankɩ brɛá mʋ́ ɔnɔ ɩdɛ asɩba. 14Tamɛ mʋ́ o a, Bulu lɛha amʋ́ klʋntɔ lɔwa odwin bɔfʋn ndɛ. Mʋ́ sʋ nɩ bʋdɛ Bulu mbla dada amʋ kla amʋ́ ofiakpa a, bʋtamanu mʋ́ asɩ, tsufɛ tati amʋ letin amʋ́ agywɩɩn. Tɔtɔ mɛ́ɛtalɩ bwii tati amʋ lɛ amʋ́ agywɩɩnsʋ, nkɛtɩ amʋ́a Kristo babwɛ kʋlɛ. 15Bɔ́tʋ ndɛ kʋraa nɩ bʋdɛ Mose mbla amʋ kla a, tati amʋ ɩtra bun amʋ́ agywɩɩnsʋ. Mʋ́ sʋ bʋtamanu mʋ́ asɩ. 16Tamɛ nɩ ɔha onya damli klʋntɔ ba anɩ Wie wa pɛ, Kristo labwii tati amʋ lɛ mʋ agywɩɩnsʋ. 17Anɩ Wie amʋʋ asʋn anfɩ ɩdɛtɔɩ tsu mʋ ɩwɩ amʋ gyi Ɔŋɛ Wankɩhɛ amʋ nɩ. Ɔtɩnɛgyiɔtɩnɛá Ɔŋɛ amʋ ɩbʋ a, ɩwɩgyi tetsia ɩnʋ. 18Anɩ Wie dɛ tati amʋ bwii lɛ anɩ fɛ́ɛ́ ansɩtɔ. Mʋ́ sʋ anɩdɛ mʋ numnyam amʋ lɛ suna nɩ. Mʋ Ɔŋɛ amʋ laha anɩdɛ mʋ lɩan, tsufɛ mʋ numnyam amʋ ɩtra dɛwankɩ anɩtɔ tsɩa.
Currently Selected:
2 Korintofɔ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation