2 Korintofɔ 11
11
Paulo Mʋa Sumbi Ayɔpʋ Afunupʋ
1Mlɩnya klʋn, amlɩnu mɩ mimlala kpalobi anfɩ asɩ! Kokoli, mlɩnya klʋn ha mɩ. 2Mmesi mlɩ tswɩ, fɛ alɩá Bulu tamasi mlɩ tswɩ. Tsufɛ mlɩgyi fɛ obitebiá omeyin oyin, napʋ mlɩ ha oyin ɔkʋlɛ, ogyi Kristo. 3Tamɛ alɩ amʋʋ ɩwɔ amʋ lɔpʋ mʋ alapɛ mlɛ Hawa amʋ a, ifu dɛ mɩá ɔkʋ ɔbɛ́mlɛ mlɩ, mlɩ ansɩ bɛ́dɩnkɩ ɔnɔkwalɩwa pʋ́ ɔdwɛ wankɩhɛ amʋʋ mlɩbʋ ha Kristo amʋsʋ. 4Tsufɛ nyin ánɩ́ nɩ ɔkʋ ɔba bɛda Yesu bamba ɔkʋ ɩwɩ asʋn ɔkan suna mlɩ, imegyi ɔmʋamʋʋ anɩlɛda mʋ ɩwɩ asʋn ɔkan suna mlɩ amʋ a, mlɔ́kɔsɩ hogyi. Nɩ mlenya ɔŋɛ bamba kʋá ɩna ɔtsan ha mʋamʋʋ mlɩlegyankpa nya amʋ ɛ a, mlɔ́hɔ mʋ́ gyi. Alɩ kɛn nɩ mlonu asʋn bamba ánɩ́ ɩna ɔtsan ha mʋamʋʋ anɩlɛbla mlɩ amʋ ɛ a, mlɔ́kɔsɩ hɔ mʋ́sʋ gyi nɩ!
5Mmedehogyiá aha anfɩ bʋdɛ ɩwɩ tɩ “Sumbi ayɔpʋ akpɔnkpɔntɩ” anfɩ bʋdʋn mɩ ɔkpa ɔkʋkʋsʋ. 6Nɩ mmeyin tɔɩ kʋraa a, nyin asʋn ánɩ́ ndɛblɩ. Nahogyiá anɩlaha asʋn anfɩtɔ ɩlawankɩ mlɩ ɔkpagyiɔkpasʋ.
7Ɩnɩá nɔpʋ ɩwɩasɩba pʋ́ obú ha mlɩ brɛá nɛda Bulu asʋn wanklaan amʋ ɔkan suna mlɩ, mmɔhɔ mlɩ tɔtɔ sʋ yɛ tsitsa nɔbwɛ a? 8Ɔpasua bamba atɔ nɔswɩɩ, pʋba bɔyɔ agyʋma ha mlɩ. Mʋ́ sʋ nɛtalɩ sum mlɩ, mmɔhɔ mlɩ tɔtɔ nɩ. 9Brɛá mbʋ mlɩ wa, ɩwɩ lɛklɩ mɩ a, mmesi ipian tswɩ mlɩtɔ ɔkʋkʋsʋ. Mboun apio amʋʋ botsu Makedonia ba amʋ lɛha mɩ mɩ atohianhɛ. Ɩnɩ sʋ mmesi ipian dɩnka mlɩtɔ ɔkʋkʋsʋ, mméesi dɩnka ɛ. 10Ɩnɩá ɔnɔkwalɩ nenya ndɛblɩ tsu Kristo ɩwɩ mʋ́ a, ɔhaa mɛ́ɛtalɩ ka mɩ itin ɔbɛɛ, mmápʋ asʋn anfɩ tsu ɩwɩ Akaia ɔsʋlʋsʋ fɛ́ɛ́. 11Ntogyi sʋ? Ntamadwɛ mlɩ loo? Ɛkɛkɛɛkɛ! Bulu yin ánɩ́ ntɔdwɛ mlɩ!
12Nɔ́bwɛ mɩ agyʋma fɛ alɩá ndɛ mʋ́ bwɛ dodo. Nɔ́bwɛ mʋ́ pʋtin amʋ́ ɔkpa, nɩ bʋdɛ ɩwɩ tsu bɛɛ, gyʋma kʋlɛ anɩa amʋ́nyɔ anɩdɛbwɛ. 13Afunupʋ bʋgyi. Bapina bwɛ ɩwɩ fɛ Kristo sumbi ayɔpʋ, bʋna bʋdɛ mlɩ mlɛ. 14Tamɛ ɩma wanwan! Tsufɛ Ɔbʋnsam kʋraa tɛkɩ ansɩ bwɛ ɩwɩ fɛ Bulu-ɔbɔpʋ wankɩhɛ! 15Mʋ́ sʋ ɩma wanwan ánɩ́ mʋ asumpʋ anfɩ ɛ bapina bwɛ ɩwɩ fɛ yile abwɛpʋ. Amʋ́ ɔnɔmɔ ɩbɛ́lɛ amʋ́ bwɛhɛ kugyikʋ ɔwan.
Paulo Asʋn Wunhɛ
16Ntra ndɛ mlɩ bla mbɛɛ, ɔhaa mábu mɩ ɔha mimlahɛ. Tamɛ nɩ mlɩdɛ mɩ bu alɩ o a, mlɩtsu mʋ́ alɩ, mɩ ɛ anya ɔkpa tsu ɩwɩ kpalobi. 17Anɩ Wie tamatɔɩ alɩ, tamɛ nabwɛ ɩwɩ fɛ ɔha mimlahɛ. 18Aha tsɔtsɔɔtsɔ bʋtotsu ɩwɩ fɛ ɔyɩtɔ aha, sʋ mɩ ɛ nótsu ɩwɩ. 19Ee a, ɩnɩá mlɩaa atɩansɩpʋ mlɩgyi o a, mlɩtotsula ha aha mimlahɛ. 20Tsufɛ nɩ ɔkʋ ɔpʋ mlɩ bwɛ nkpábi kʋraa a, mlɩtotsula. Nɩ ɔpʋ mlɩ nya ɩwɩ, ogyi iwie mlɩsʋ, obu mlɩ tɔkʋ odu, ɔda mlɩ ɩsʋtɔ kʋraa a, mlɩtotsula ha mʋ. 21Mlɩaa, mma ansɩtɔ-ɔnlɩn. Ee, natsula. Mɩ klɛ ma ɩnʋ.
Tamɛ togyitɔá ɔkʋ labwɛ ɔdɛpʋtsu ɩwɩ a, mɩ ɛ nɛ́talɩ pʋ́ mɩ klɛ tsu ɩwɩ. (Tamɛ nahogyiá igyi mimlala.) 22Nɩ bɛɛ Hebrifɔ bʋgyi a, mɩ ɛ Hebriyin ngyi. Nɩ Israelfɔ ɛ bʋgyi a, Israelyin mɩ ɛ ngyi. Nɩ bɛɛ, botsu Abraham abi-anátɔ a, ɩnʋ mɩ ɛ notsu nɩ. 23Bɛɛ Kristo asumpʋ bʋgyi? Mblɩ mʋ́ mimlasʋ, ndʋn amʋ́! Nayɩrɩ ɩwɩ yɔ agyʋma dʋn amʋ́. Nadɩ obu dʋn amʋ́. Bada mɩ dʋn amʋ́. Nesian wu brɛ tsɔtsɔɔtsɔtɔ. 24Yudafɔ banwɛn mɩ mplɩ tse adʋasa-kweba (39) tse nu kɛkɛ. 25Romafɔ ɛ bapɩtɩ mɩ atɔ tse sa kɛkɛ. Bɛda mɩ abwi ɔtsawʋlɛ. Tse sa kɛkɛ ntsusʋ-yibi labun mɩ, nasin ntsutso ɛkɛwʋlɛ owitɔ. 26Mɩ ɔkpa tsɔtsɔɔtsɔ tutɔ a, nafa ntsu akpɔnkpɔntɩ, natsʋn ogyo atswapʋ ɩbɩtɔ dalɩ. Natsʋn ɔmá bambasʋfɔ pʋ́ anɩ pɩ Yudafɔ fɛ́ɛ́ ɩbɩtɔ dalɩ. Natsʋn awulusʋ pʋ́ adimbisʋ, nafa ɔpʋ. Natsʋn aha amʋʋ bʋdɛ amʋ́ ɩwɩ tɩ bɛɛ, Akristofɔ amʋ aná fɛ́ɛ́ ɩbɩtɔ dalɩ. 27Nayɔ agyʋma kpekple, ɩlapian mɩ kɩ. Ntamadɩdɩ nkɛkʋ. Ntetsia akʋn mʋ́a ɔmɛwʋlɩ. Ntɛklɩ ɔnɔ, ntɛdɩ atsalɩ, natɩ yaya aná fɛ́ɛ́. 28Ɩnɩ fɛ́ɛ́ ɔma a, tɔá ɩdɩn mɩ klʋnsʋ, ntɔgywɩɩn mʋ́ ɩwɩ ekekegyiɛkɛ gyi ɔpasua amʋ fɛ́ɛ́ alɛwa. 29Ma lɔpɔn, mmotsu kʋkʋ lɛ mʋ asʋntɔ? Ma bɛkpa wa lakpantɔ, ɩmɔwa mɩ ɔblɔ.
30Nɩ bɛɛ ntsu ɩwɩ a, ntobiá ɩtɛha mɩ hogyi tɛba asɩ nɔ́pʋtsu ɩwɩ. 31Bulu, ogyi anɩ Wie Yesu mʋ Sɩ, ɔlɛkana kanfʋ brɛ fɛ́ɛ́tɔ amʋ yin ánɩ́ mmɛdɛ afunu wa. 32Owie dɛhɛn Areta lɛha mʋ ɔmásʋ ɔkɩpʋ lɛyɛtɛ mɩ Damasko wulu ɔnɔ, ɔkɩta mɩ. 33Tamɛ bɔpʋ mɩ wa lakpatɔ, lɛ mɩ tsʋn ikwitɔ, kplɩ mɩ yi buntiá bɔpwɛ wa wulu amʋ ɔma, nɛsrɩ si mʋ.
Currently Selected:
2 Korintofɔ 11: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation