Mateu 2
2
Kwiza cha akwa mana
1Yesu yasemuka mu Betleheme,#2:1 BETLEHEME: Kilometro 8 ku sude ya Yerusaleme. limbo lia mu Yudea, muze te Herode#2:1 Herode: Herode Munene, mwanangana wa chifuchi cheswe cha Israele. abwile mwanangana. Muze Yesu hasemuka, akwa mana waze te akuhengula matongonoshi, yaakatuka ku chivumbuko, yeeza ku Yerusaleme. 2Yaahula ngwo: “Ulihi mwana yoze unakasemuka, yoze makabwa mwanangana wa Ayuda? Tunakamona lutongonoshi wenyi nikusoloka ku chivumbuko. Hitweza ni kumuwayila.”
3Muze mwanangana Herode hachivwa, yalibikala kuhiana, ni akwa Yerusaleme eswe. 4Yakungulula mahako a lutwe a Zambi#2:4 mahako A lutwe A ZAMBI: mbunga ya mahako: mwe mwata wa mahako, ni waze abwile miata a mahako hatangu, ni atu a ku majiko alemu kuli waze atongwele miata ja mahako. eswe ni alongeshi a Shimbi.#2:4 alongeshi a Shimbi: alongeshi waze te akulumbununa Mukanda wa Zambi uze asonekene mu hebreu, chibichibi mikanda ya Ubutukilo ndoo ku Shimbi. Yaahula ngwenyi: “Chilamwina yoze Zambi alakenyene, kulihi chamutamba kusemukina?” 5Yaamukumbulula ngwo: “Ku Betleheme, mu Yudea, mumu Chenacho asonekene mukwa munanyi wa Zambi ngwenyi:
6‘Yena Betleheme, mu chifuchi cha Yuda,
hi uli mukepe kuhiana ko mukachi ka akwa kuyula a mu Yuda.
Mumu muli yena mumukatuhuka tetekeli.
Mwenawo makasongwela atu jami Aisraele.’ ”
7Mba Herode yatambika akwa mana ku tenga, yaahula pundu tangwa lize asolokele lutongonoshi. 8Henaho yaatuma ku Betleheme nikwamba ngwenyi: “Yeenu nukahulehule hakutwala kuli mwe mwana. Muze hinwamuwana, nukeze nukangwambulwile, hanga ni yami ngukaye ni kumuwayila.”
9-10Muze heevwa maliji ja mwanangana, yaakatuka, yaaya, yaamona lutongonoshi yoze amwene ku chivumbuko. Ha kumumona yaawahilila kuhiana. Lutongonoshi yatetekela kulutwe lio ndoo yamana helu lia homa haze habwile mwe mwana. 11Akwa mana yaanjila mu zuwo, yaamona mwana hamwe ni naye Maria, yaafulamana, yaawayila mwe mwana, yaabakula yikashi yo, yaamulambula milambu ya oru, ni maji a vumba libema libano,#2:11 LIBANO: maji a vumba libema a kulambula no milambu. ni mira.#2:11 mira: maji akalu a vumba libema, a ku umwe mutondo. 12Zambi yaatoweza mu chilota ngwenyi, kanda ahiluka maha Herode. Kashika, yaaya jila yeka nikuhiluka ku chifuchi cho.
Kuchinyina ku Egiptu
13Muze akwa mana haaya, kanganda ka mwilu yasolokela Josefe mu chilota, yamwamba ngwenyi: “Katuka, anda mwana ni naye uchinyine ku chifuchi cha Egiptu. Ukabwe ko ndoo mungukakutambika, mumu Herode kanafupu mwana akamushihe.”
14Mba Josefe yakatuka, yanda mwana ni naye, yaya no ha ufuku ku Egiptu. 15Yaatwama ko ndoo ku kufwa cha Herode. Chino chabwile hanga chikamanunune liji lize Mwene Zambi ahanjikile kuli mukwa munanyi wenyi ngwenyi: “Hingunatambika mwanami akatuke ku Egiptu.”
Kushiha cha ana akemba
16Muze Herode hanyingika ngwenyi, akwa mana haamulenya, yevwa ufwatulo, yahana Shimbi ya kushiha ana malunga a mu Betleheme ni a mu chifuchi cha kusulangana a miaka yaali ni waze kanda achiheta ku miaka yaali, nikulita ni tangwa lize amulwezele akwa mana. 17Chenacho chamanunukine liji lize Zambi ahanjikile kuli mukwa munanyi wenyi, Jeremia, ngwenyi:
18“Atu kaanevu milolo mu Rama,#2:18 RAMA: limwe limbo kilometro 8 ku norde ya Yerusaleme, hehi ni homa haze afunjile Rashele, pwo lia tata Yakoba (tala 1 Sam 10:2).
malilo ni kunenganyana kuhiana.
Rashele kanalili ana jenyi.
Katayile amulembejeke,
mumu haanafu.”
Kuhiluka ku Israele
19Muze Herode hafwa, kanganda ka mwilu yasolokela Josefe mu chilota mu chifuchi cha Egiptu. 20Yamwamba ngwenyi: “Katuka, anda mwana ni naye, uhiluke ku chifuchi cha Israele, mumu waze afupile kushiha mwana haanafu.” 21Josefe yahinduka, yanda mwana hi naye, yahiluka ku Israele. 22Alioze muze Josefe hevwa ngwo, Arkelau hahinga tato Herode mu chifuchi cha Yudea, yevwa woma kuhiluka ko. Zambi yamulongesa nawa mu chilota, kashika yaya ku chifuchi cha Galilea.#2:22 GALILEA: ku norde mu Israele, haze Herode Antipase, mwanakwo wa Arkelau, ayulile. 23Yaya ni kutwama mu limwe limbo jina lialio Nazare.#2:23 Nazare: limwe limbo kilometro 26 ku chitokelo cha songo lia ku sude ya chitende cha Galilea. Chenacho chamanunukine liji lize Zambi ahanjikile kuli akwa munanyi jenyi ngwenyi: “Kumakamuvuluka ngwo, Kanazare!”
Currently Selected:
Mateu 2: CHK1970
Highlight
Share
Copy
Want to have your highlights saved across all your devices? Sign up or sign in
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.