Matiyo 1
KBTP

Matiyo 1

1
Jizọsị Kịrayịsị Atẹngịapụ Ma
(Luk 3.23-38)
1Nwẹn goo ḅarị apụ ma anie Jizọsị Kịrayịsị atẹngịapụ ma. Ori Jizọsị Kịrayịsị ḅe Devidi furo ọ̀ pakam, anie Ebira-amụ furo-ḅẹ-ḅọ ḅe.
2Ebira-amụ anie Ayịzịkị ḍa, Ayịzịkị anie Jekọbụ ḍa, Jekọbụ anie Juda na ori owiapụ-amịnapụ ma ḍaḅọ. 3Juda anie Pẹrẹzi na Zera na ḍa (ịna iyingiḅọ anie Tama); Pẹrẹzi anie Hẹzịrọnị ḍa, Hẹzịrọnị anie Ramụ ḍa, 4Ramụ anie Amịnadabụ ḍa, Amịnadabụ anie Nasọnị ḍa, Nasọnị anie Salimọnị ḍa, 5Salimọnị anie Bohazi ḍa (ò iyingi ẹrẹ Rehabụ), Bohazi anie Obẹdị ḍa (ò iyingi ẹrẹ Rufu), Obẹdị anie Jese ḍa, 6#2 Ama 24.14,15; 2 Pkị 36.10; Jer 27.20Jese anie Amadaḅọ Devidi ḍa.
Devidi anie Sọlọmọnị ḍa (ò iyingi anie tarị-tarị Yuraya na sime ẹrẹḅọ ma), 7Sọlọmọnị anie Rihobohamụ ḍa, Rihobohamụ anie Abija ḍa, Abija anie Asa ḍa, 8Asa anie Jehosafatị ḍa, Jehosafatị anie Joramụ ḍa, Joramụ anie Uzaya ḍa, 9Uzaya anie Jotamụ ḍa, Jotamụ anie Ahazi ḍa, Ahazi anie Hẹzịkaya ḍa, 10Hẹzịkaya anie Manasẹ ḍa, Manasẹ anie Amọnị ḍa, Amọnị anie Josaya ḍa, 11Josaya anie Jehohakịnị na ori owiapụ-amịnapụ ma na ḍa.
12-16Babịlọnị ḅụ Izirẹlịapụ ma kun-ḅara ḅio paka-ḅo sakị ḅụ, ọkị mu Jizọsị iyi sakị la mịna ẹrẹ goo wararị atẹngịapụ ma anie jụmọ-jụmọ iyi yee: Jehohakịnị na Sẹlịtẹlị na, Zerubabẹlị na Abudi na, Ẹlịyakịmụ na Azọ na, Zadọkụ na Akimu na, Eliudi na Ẹlịyeza na, Matani na Jekọbụ na Josẹfụ na. Ḅị Josẹfụ ḅe anie Meri, Jizọsị tẹ Juu-ḅẹ-apụ kẹ Mẹsaya sịn-ḅọ ḅe iyingi na sime ye.
17Mị-ḅara ḅụ, Ebira-amụ ḅụ ọkị mu Devidi la ngei aḅụọ fa jei, tẹ Devidi ḅụ ọkị mu ini Izirẹlịapụ ma kun so Babịlọnị mu sakị la pịkị ngei aḅụọ fa jei, tẹ anị sakị ḅụ ọkị mu Mẹsaya ḅe iyi sakị la pịkị ngei aḅụọ fa jei.
Meri Jizọsị Kịrayịsị Iyim
(Luk 2.1-7)
18 # Luk 1.27 Mie Jizọsị Kịrayịsị iyi ḅara. Josẹfụ nwẹn-sịn owiḅọ Meri nwẹn-sịn, amụ owiḅọ na gboloma-a, iriawọ-tụḅọ sime ḅẹ tẹ arị ọlọm. Kụma tẹrẹmẹ in ḅo ama-na-ere-na ḅara kẹ anga gboloma árị ẹrịm Fịafịa Tẹmẹ ḅe kụrọ ḅụ á fura tẹ. 19Tẹ Josẹfụ ḅe, sakị mamgba Juu-ḅẹ-apụ ama-anganga-ḅara mẹ ḅẹ kuraye mịẹ-mịẹ ḅọ, kụma ò ḅii-a ori á sịḅị kẹ ama sịn. Mie ḅụ ọ̀ tọnm mịnẹ ọ̀ ḅọịma tẹ sime mẹ kan sin ḅa. 20Ọ̀ paa miemẹ kuromarị ogbo ọ̀ ḍawọ tẹ KỊNỊNYANAḄỌ enjẹlị ọ̀ ḅẹẹm, “Josẹfụ, Devidi tụḅọ, ḅalafa ma tẹ Meri ma ọkị simee. Kẹ gotẹ ọkọ ḅẹẹarị, á kọn wararị fura mẹ Fịafịa Tẹmẹ ḅe kụrọ ḅụ ḅom. 21#Luk 1.31Árị owiḅọtụḅọ iyi ḅa, tẹ ị́ kẹ ọ̀ sịn ḅarịye Jizọsị (anie fiearị Ḅọrọmaḅọ), ori amịna atomi asi ḅụ ịn ḅọrọma ḅẹ ẹrẹsị.”
22Nwẹn ḍuko ye mẹmgba mịẹm, anie KỊNỊNYANAḄỌ ịkịankoroḅọ ḅe ḅụ ḅọrọ tẹ ḍuko tẹ ye mẹ paka ḅẹm ẹrẹsị, 23#Ayị 7.14“Ḅụụ-gboloa iriawọ-tụḅọ fura tẹ owiḅọtụḅọ iyi ḅa, tẹ ịn kẹ ọ̀ sịn ḅarị ẹrẹ Ịmanụwẹlị” (anie fiearị, “Tamụnọ wamịnị na emi”).
24Mie ḅụ Josẹfụ ḍawọ mẹ ḅụ naa-saakị tẹso, ọ̀ nwẹnị KỊNỊNYANAḄỌ enjẹlị ḅe ọ̀ ḅẹẹ ḅara mịẹ, tẹ Meri ma ọkị sime. 25#Luk 2.21Kụma ori árị na gboloma-a nwenii árị á tụḅọ ḅe iyim. Tẹ Josẹfụ nwẹnị ọ̀ sịn Jizọsị.

(C) The Bible Society of Nigeria


Learn more about FỊAFỊA BAỊBỤLỤ

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.