1 THESSALONIKA 1
1
Chibai bûkna
1Paula leh Silvana leh Timothea chuan, Pa Pathian leh Lalpa Isua Kristaa Thessalonika khuaa kohhranhote hnênah,
Khawngaihna leh remna in hnênah awm rawh se. #Tirh 17.1
Thessalonika mite rinna leh awm dân
2,3Kan Pathian leh Pa hmaah chuan rinna avânga in thiltihzia te, hmangaih avânga in thawh rimzia te, kan Lalpa Isua Krista beisei avânga in chhelzia te kha theihnghilh lova hre rengin, kan ṭawngṭainaahte chuan in hming lamin, nangmahni zawng zawng avângin Pathian hnênah lâwmthu kan hril fo ṭhîn a ni. 4Unau, Pathian duh takte u, a thlanzia che u kha kan hria a, 5khatia kan Chanchin Ṭha chu thu chauhva in hnêna thleng lova, thiltihtheihna leh Thlarau Thianghlim leh nasa taka rin tlatna nên a lo thlen zâwk kha; nangmahni hma sialin in chungah eng ang mi nge kan lo nih tâk kha in hre si a. 6Tin, thu chu hrehawm tuar chungin, Thlarau Thianghlima lâwmin in lo pawm a, keimahni leh Lalpa zirtute in lo ni a. #Tirh 17.5-9 7Chutichuan, Makedonia leh Akaia rama ringtu zawng zawngte tân entawn in lo nih kha. 8Lalpa thu chu nangmahni aṭangin a thang chhuak ta si a, Makedonia leh Akaia ramah chang ni lovin, hmun tinah pawh Pathian lama in rinzia chu a thang ta a; chutichuan, keinin eng mah sawi rêng a ngai ta lo. 9,10Kan tlawh ṭum che u a min lawmzia te, Pathian nung leh dik tak rawngbâwl tûr leh a Fapa (mitthi zîng ata a kaihthawh, thinur lo thleng tûr laka min chhan chhuaktu Isua kha) vân ata lo nghâk tûrin, milem hawisana Pathian lam in hawi tâk thute kha an sawi fo ṭhîn a ni.
Currently Selected:
1 THESSALONIKA 1: MIZOVBSI
Highlight
Share
Copy
Want to have your highlights saved across all your devices? Sign up or sign in
Mizo OV - Re-edited Bible
© The Bible Society of India, 2017.
Used by permission. All rights reserved worldwide.