याकुब 1
1
याकुबलाम् से़वा
1के़रे़क् लाजेॽओ के़से़बाआङ् के़वाॽबा ख्रिस्ते़न् नसान् के़जोःक्पा यहुदिसे,#१:१ ख्रिस्ते़न् नसान् के़जोःक्पा यहुदिहाॽ—ग्रिक पाःन्दाङ्ङो “थिक्-ने़त् यहुदि सुवाङ्हाॽ” पोङ्॥ निङ्वाॽफुमाङ् नु दाङ्बा ये़सु ख्रिस्तरे़ कुसे़वारोबा इङ्गाॽ याकुबरे़ कन् सक्इङ्घङ्ङिन् हाक्निङ्बारो॥
नसान् नु सिक्कुम्दिङ् निङ्वाॽ
2आमिःम् फुॽनुसाॽ नु ने़ॽनुसाॽसे, खिनिॽ काक् परिक्ले़न् इनोगे़न् तुक्खेओ के़ध्ये़ॽइल्ले़ खे़ङ्ग साॽरिक् सःप्मनाबा पाःन्लो फाॽआङ् इःत्ते़म्मे़ॽओ, 3थेआङ्भे़ल्ले़ आक्ख्यारिक् नसाःन्साबा के़जोगि फाआङ् निङ्वाॽ साॽमो के़ध्ये़ॽइल्ले़ खिनिॽ नासि थःप्मान् पोरो के़लॽबान् के़निसुम्लो॥ 4हे़क्क्याङ् नासि थःप्मान् कुलिङ्दो के़त्ल थारिक् पोर पोङ्लो, हे़क्केलॽरिक् खिनिॽ के़धुम्बा नु कुलिङ्दो के़गे़प्पा के़बोःक्खिआङ् खिनिॽओ कुलिङ्दो मे़ङ्गे़प्मनाबा पान् थेआङ् मे़बोङ्ने़ल्लो॥
5कर खिनिॽ सिक्कुम्दिङ् निङ्वाॽ चाहाबा के़जोगिने़ फाॽग्र निङ्वाॽफुमाङ्ङिन् नाःक्ते़म्मे़ॽ हे़क्क्याङ् खुने़ॽ के़बिरिॽरो, थेआङ्भे़ल्ले़ कुयाःक् मे़ल्ले़ॽए कुनिङ्वाॽ हन्दुआङ् के़नाःक्पाहाॽ के़रे़क् पिरुसिॽरो॥ 6कर के़नाःक्पाल्ले़ नाःक्तुबा पाःन्निन् खोसुङ् फाॽआङ् चप्चि मे़न्जोःक्के नाःक्तुर पोङ्लो॥ चप्चि के़जोःक्पाङ्ग सुरित् केजङ्ङिल्ले़ मुःत्तुल्ले़ वाहङ्ङो के़बोःक्पा वाभे़ल्ले़ङ्ङिन् कुइसिक् यो ना थोबा पोङ्लो॥ 7हे़क्केलॽरिक् चप्चि के़जोःक्पा मनाःल्ले़ यहवे दाङ्बाओलाम्#१:७ ग्रिक पाःन्दाङ्ङो “कुरिओस” सुत्लान् साप्ते़आङ् पत्॥ याकुबरे़ “कुरिओस” पाःत्तुबे़न् ये़सु ख्रिस्ते़न् मे़त्तुबारो, कर कन् पाःत्लाओ खुने़ॽ पानुदिङ् पाः निङ्वाॽफुमाङ्ङिल्ले़ कुयाःम्बेओ पाःत्तुबारो॥ थे पाःन्नाङ् खोसुङ् फाॽआङ् मे़इःत्तुन्लरो॥ 8खे़ङ्ग कुनिङ्वाॽ के़लाम्बा मनारो, हे़क्क्याङ् खे़ल्ले़ काक् चोगुबा याःम्बक्को चोगुङ्बि मे़जोःक्कान्बि लॽरो॥
याङ्साॽमा नु याङ्साकुन्धेसाबा
9याङ्गे़साॽबा नसानिबान् हाराॽ निङ्वाॽफुमाङ्लाम् मिङ्सो इङ्धाङ् खोसुल्ले़ सःत्ल पोङ्लो॥ 10कर याङ्साकुन्धेसाबान् निङ्वाॽफुमाङ्लाम् नःम्नःम्बा पोङ्ङिल्ले़ सःत्ल पोङ्लो, थेआङ्भे़ल्ले़ खुने़ॽग इगे़ले़म्बाआङ् मक्के़धा के़बेःक्पा ताम्भुङ् फुङ् कुइसिक् इले़म्बेःक्लो॥ 11थेआङ्भे़ल्ले़ नाम्से़आङ् नाम्लाःङ्माल्ले़ याःन्सुङ्ङिन् हेसुॽ हे़क्क्याङ् फुङ्ङिन्नाङ् मक्थाआङ् नुबा कुधाःप्मे़न् पेःक्लो॥ बा हे़क्केलॽरिक्के याङ्साकुन्धेसाबान्नाङ् खुने़ॽ याःम्बक् चोगुर पत्तिल्ले़ए सि पेःक्लो॥
इनोगे़न् तुक्खे नु हङ्साॽमा
12इनोगे़न् तुक्खेन् नासि के़धःप्पे़ङ्ग मुॽइसाबारो, थेआङ्भे़ल्ले़ खे़न् निङ्वाॽसाॽमाओ थाःल्ले़ कुलिङ्दो के़गे़प्पा पोःक्खे़आङ् निङ्वाॽफुमाङ्ङिल्ले़ खुने़ॽ मिःम्जि के़मे़प्पाहाॽ पिमासि फाॽआङ् माङ्हे़क् चोगुबा मे़न्नुप्मनाबा हिङ्मन्ले़न् तिचःन् खे़ल्ले़ खोसुॽरो॥ 13हे़क्क्याङ् हङ्साॽमो के़धाबाल्ले़ निङ्वाॽफुमाङ्ङिल्ले़ हङ्साॽराङ्लो फाॽआङ् आप्फाल्ले़आङ् मे़बाःत्तुन्लरो, थेआङ्भे़ल्ले़ निङ्वाॽफुमाङ्ङिन् फे़न्पान् लाम्बा हङ्मे़साॽने़न्लो, हे़क्क्याङ् खुने़ॽआङ् आत्तिन्हाॽआङ् हङ्मे़साॽरुन्छिन्लो॥ 14कर काक् मनाहाॽ आबाङे फे़न्निङ्वाॽइल्ले़ मुरा मे़त्तुसिआङ् हङ्साॽमो मे़धारो॥ 15कन् फे़न्निङ्वाॽइल्ले़ आनिॽ आयुक्काङ् लायो चोःक्मा आबाङ्लो, हे़क्क्याङ् लायोल्ले़ आनिॽ सिमे़न्नो आदेॽरो॥
16आमिःम् फुॽनुसाॽ नु ने़ॽनुसाॽसे, खिनिॽ इङ्ले़क्को मे़ध्ये़म्मिन्ने़ॽओ॥ 17काक् नुबा नु कुलिङ्दो के़गे़प्पा पर्धाःम्मिङ्ग थाःङ् ताङ्साक्पो के़ओःप्पा ओःत्तिहाॽ के़जोःक्पा पानुदिङ् पाः निङ्वाॽफुमाङ्लाम् युरो॥ खे़न् ओःत्तिहाॽग साम्ब्रिःप्पा कुइसिक् ले़ङ्बेःक्, कर खुने़ॽ आप्फाल्ले़आङ् मे़ले़ङ्ने़न्लो॥ 18खुने़ॽ चोगुबा नावागे़न् चइःत्तो काक्नु तगि के़दुम्बा निङ्वाॽफुमाङ्ङो तोःम्मनाबा चासोक् कुइसिक् आबोङ्ल फाॽआङ् आबाङे कुनिङ्वाॽइल्ले़ से़क्खाबा कुबाःन्जाक्लाम् कुस्सा आजोगे़आङ् वाॽ॥
खे़म्मा नु चोःक्मा
19आमिःम् फुॽनुसाॽ नु ने़ॽनुसाॽसे, नाघे़म्माओ के़रे़क् चात्ते़म्मे़ॽओ, कर पाःप्माओ नु सिक् पोःक्माओ सुःसे़म्मे़ॽओ फाॽआङ् कुसिङ् निःत्ते़म्मे़ॽओ॥ 20थेआङ्भे़ल्ले़ खिनिॽ सिक्किल्ले़ आप्फाल्ले़आङ् निङ्वाॽफुमाङ्ङिल्ले़ कुसिराॽ के़धाङ्बा साम्योबा याःम्बक् चोःक्मा के़न्छुक्तुम्मिल्लो॥ 21खे़ल्ले़चोगुल्ले़ ताप्फे़ःम्बा नु सिक्के़ले़ःङ्बा पाःन्हाॽ ले़रे़म्देःसे़म्मे़ॽआङ् निङ्वाॽफुमाङ्ङिल्ले़ खिनिॽ सिक्लुङ्मो लेःत्तुबा खिनिॽ ताङ्से़ःप्मा के़सुक्पा कुबाःन्जाक्किन् खिनिॽ नःम्नःम्माङ् ताःक्ते़म्मे़ॽओ॥
22कर पाःन्जाक्किल्ले़ पाःत्तुबा कुइसिक् चोगे़म्मे़ॽओ॥ पाःन्जाक् के़घे़म्बारक् के़बोःक्खिॽने़ फाॽग्र आबाङे इङ्गे़ले़क्कासिॽरो॥ 23पाःन्जाक्किन् के़घे़प्सुम् कर खे़न् कुइसिक् के़न्जोगुम्मिन्ने़ फाॽग्र से़ल्ले़ङ्घोओ खिनिॽ नारा ओगे़मे़त्तुम्बा कुइसिक् चोक्लो॥ 24खिनिॽ आबाङे ओगे़मे़त्तासिआङ् आनिगे आक्तङ्बा चोगिगे़ फाॽआङ् के़निसुम्बान् के़बेगिनुमे़ःन्ने निङ्वाॽ के़भेःत्छुम्लो॥ 25कर आत्तिन् मनाःल्ले़आङ् चोःक्युम्भो के़बिबा सेसे साम्योथिम्मिन् खे़प्सुआङ् निङ्वाॽ मे़भेःत्छुन्, कर खे़ल्ले़ चक्मे़ल्लॽए नुरिक् ओमे़त्तुआङ् खे़प्सुबा पाःन्हाॽ चोगुॽ, खे़ल्ले़ चोगुबा काक् कुयाःम्बक्को निङ्वाॽफुमाङ्ङिल्ले़ मुॽइसाम् पिरुॽरो॥
26आत्तिल्ले़ इङ्गाॽ साम्योसाबा चोःक्का लॽरिक् निङ्वाॽ इःत्तुॽ, कर कुले़सोःप्पे़न् युक्को मे़गत्तुन्ने़ फाॽग्र खे़ङ्ग इङ्ले़क्सिङ्ङाङ् खे़ल्ले़ कुसाम्योःङ्ग हने़रक् पोङ्लो॥ 27पानुदिङ् पा निङ्वाॽफुमाङ्ङिल्ले़ ते़न्दिङ् चोगुबा सुत्थो नु सेसेबा साम्योसाबा पोङ्माङ्ग बा कन्लो—ये़त्छाबाहाॽ नु मेमेदुमाहाॽ खुनिॽ इनोगे़न् तुक्खेहाॽओ कम्ब्राङ् मे़प्मासि, हे़क्क्याङ् इक्सादिङ् खाम्बेःक्मोबा याप्मि के़जिःम्बा पाःन्हाॽलाम् माःङ्घा वाॽमारो॥
Currently Selected:
याकुब 1: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.