२ युहुन्ना 1
1
तुम्म्याङ्हाङ्मान् युहुन्नालाम् से़वा
1इङ्गाॽ सेसेहुप्लक्कोबा तुम्लाम्लोबाल्ले़ सेःक्मनामा तुम्म्याङ्हाङ्मा#१:१ तुम्म्याङ्हाङ्मा—कन् फाॽइन् लत्छा मे़न्छुमाॽ वये़बिला, इग्र लत्छा सेसेहुप्लक् वये़बिला, हे़क्क्याङ् कुस्साहाॽ फाॽइन् सेसेहुप्लक्कोबा मनाहाॽबिला॥ नु कुस्साहाॽ कन् सक्इङ्घङ्ङिन् हाक्निङ्लो॥ इङ्गाॽ से़क्खाए मिःम्जि मे़त्निङ्लो, हे़क्क्याङ् से़क्खान् कुसिङ् के़निःप्पा के़रे़क्ले़आङ् मिःम्जि के़म्मे़त्तिॽरो॥ 2थेआङ्भे़ल्ले़ से़क्खाःङ्ग आनिॽओ वाॽ, हे़क्क्याङ् सदादिङ् आनिॽनुए वाॽरो॥ 3पानुदिङ् पाः निङ्वाॽफुमाङ्ङिन् नु आबुगे़न् कुस्सा ये़सु ख्रिस्तलाम् के़दाबा लुङ्गुम्, लुङ्माॽ तुक्मान् नु सनारुङ्ङिन् आनिॽ से़क्खा नु मिःम्जिओ के़वाॽबाहाॽनु वाॽररो॥
ख्रिस्तरे़ कुइङ्जाङ्ङो लाङ्घेःक्मा
4पानुदिङ् पा निङ्वाॽफुमाङ्ङिल्ले़ इङ्जाङ् आबिरे़बा कुइसिक् कुभा के़स्साहाॽ से़क्खाओ लाङ्मे़घेःक्ल मे़वाॽबा निङ्वाॽ खोसुङ्ङाङ् इङ्गाॽ साॽरिक् आसिक् समे़आङ् वाॽआरो॥
5हे़क्क्याङ् आल्ल, आमिःम् तुम्म्याङ्हाङ्माए, आनिॽ काक् लुङ्माॽ तुक्कासि फाॽआङ् इङ्गाॽ पेलि फाक्ने़ॽरो॥ कन् कुसङ् इङ्जाङ्ग साप्निङ्बा मेःन्लो, कर कङ्ग तगिआङ्धोए आनिॽनु वये़रो॥ 6हे़क्क्याङ् निङ्वाॽफुमाङ्ङिन् मिःम्जि मे़प्मा फाॽइन् खुने़ॽ कुइङ्जाङ्हाॽ के़इःप्पा के़नाःप्पा पोङ्मारो॥ तगिआङ्धो खिनिॽ काक्ले़ के़घे़प्सुम्बा इङ्जाङ्ङिन् बा कन्लो—खिनिॽ लुङ्माॽ तुक्सिङ्मा पोङ्लो॥
7यरिक् इङ्ले़क् के़बाःप्पाहाॽ इक्सादिङ् खाम्बेःक्मो मे़से़ःरे़आङ् मे़वाॽरो॥ खे़ङ्हाॽरे़ग ये़सु ख्रिस्ते़न् मे़न्छाम्गे़न् याप्मि पोःक्खे़आङ् नासिङ्गे़न् थक्को त्ये़बा फाॽआङ् नसान् मे़न्जोगुन्लो॥ अक्तङ्बा मनाःङ्ग इङ्ले़क्पा नु ख्रिस्तरे़ कुबिफ्युङ्बारो॥ 8खे़ल्ले़चोगुल्ले़ सिङ्सिङ् ये़क्ये़क् लॽरे़म्मे़ॽओ, खिनिॽ काक् के़जोगुम्बा#१:८ के़जोगुम्बा—ग्रिक पाःन्दाङ्ङो साप्ते़बा वेॽ साप्लाहाॽओ “आजोगुम्बा” साप्ते़आङ् पत्लो॥ याःम्बक्किल्ले़न् खोमा के़बोङ्बा खिनिॽ हाङ्से़म्मिन् के़माबा मेःन्, कर के़घोबा पोःक्खे़म्मे़ॽओ॥ 9ख्रिस्तरे़ कुनिसाम्बुङ्ङोलाम् माःङ्घा के़वाॽबा मनाःन्नु निङ्वाॽफुमाङ्ङिन् मे़वाॽने़न्लो॥ कर खुने़ॽ कुनिसाम्बुङ्ङिन्नु मे़ल्ले़त्ते के़वाॽबान्नु पानुदिङ् पा निङ्वाॽफुमाङ्ङिन् हे़क्क्याङ् आबुदिङ् कुस्सान् ने़प्माङ् वाॽसिरो॥ 10ख्रिस्तरे़ से़क्खाबा कुनिसाम्बुङ्ङिन् मे़न्दाःप्मनाबा मनान् खे़ने़ॽ के़हिम्मो ताने़ फाॽग्र खे़न् के़हिम्मो लाःप्मा मे़बाङ्घे़न्ने़ॽ हे़क्क्याङ् लाङ्ङाङ् मे़दाःक्ते़न्ने़ॽओ॥ 11आत्तिल्ले़ खे़न् मनान् लाङ्दाःक्तुॽ, खे़ङ्ग खे़ल्ले़ ताप्फे़ःम्बा कुयाःम्बक्हाॽओ चुम् के़मे़प्पा कुइसिक् पोङ्लो॥
कुनुप्मा से़वा
12इङ्गाॽ यरिक् पाःन्हाॽ खिनिॽ साप्मा कत्तुङ्साङ्, कन् पाःन्हाॽ सक्इङ्घङ्ङोलाम् मेःन्, कर खिनिॽ तुम्निङ्ङाङ्ङे ताॽजे़ङ्मा निङ्वाॽ कत्तुङ्लो॥ हे़क्केलॽरिक् आनिॽ सोसोरिक् साॽरिक् आसःत्लो॥ 13निङ्वाॽफुमाङ्ङिल्ले़ सेगुमा के़न्साॽरे़ कुस्साहाॽरे़ खे़ने़ॽ से़वा के़म्हाक्ते़आङ् वाॽरो॥
Currently Selected:
२ युहुन्ना 1: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.