YouVersion Logo
Search Icon

१ कोरन्‍थि 5

5
ताप्‍फे़ःम्‍बा याःम्‍बक् के़जोक्‍पे़न् लःप्‍मादेमा
1खिनिॽ लुम्‍मो याम्‍बोःप्‍मा याःम्‍बक् पोःक्‍खे़आङ् वाॽ, खिनिॽओ लत्‍छाःल्‍ले़ आबाङे कुम्‍मा पाःक्‍मान् मेःत् कत्तुआङ् वाॽमु! हे़क्‍तङ्‌बा ताप्‍फे़ःम्‍बा याम्‍बोःप्‍मा याःम्‍बक्‍किङ्‌ग नसान् मे़न्‍जोःक्‍मनाबा सुवाङ्‌लुम्‍मोआङ् मे़बोङ्‌ने़ल्‍लो॥ 2कर खिनिॽग आङ्‌दिङ्‌ने़ के़लॽरिॽ! खिनिॽग मे़रिङ् थक्‍मा के़बोङ्‌बाने़ वये़, हे़क्‍क्‍याङ् हे़क्‍तङ्‌बा मनान् खिनिॽ सेसे तङ्‌जुम्‍लाम् लःप्‍मादेमा के़बोङ्‌बा वये़॥ 3इङ्‌गाॽ खिनिॽनु होःप्‍पासाङ् आनिङ्‌वाॽओग सोरिक्‍के वाॽआरो॥ खे़ल्‍ले़चोगुल्‍ले़ खिनिॽनु सोरिक् वाॽआबा कुइसिःक्‍के खे़न् मनाःल्‍ले़ कुदक्‍ले़ङ्‌वाओ खासे़न् लोःन्‍दुङ् सुरुङ्‌ङाङ् वाॽआरो॥ 4आनिॽ दाङ्‌बा ये़सुरे़ कुमिङ्‌ङो सेसेहुप्‍लक्‍को खिनिॽ के़जुप्‍सिल्‍ले़ खिनिॽनु इङ्‌गाॽ आनिङ्‌वाॽइन् दाङ्‌बा ये़सुरे़ कुमुक्‍साम्‍मिन्‍नु वाॽइल्‍ले़, 5खे़न् मनान् सेसेहुप्‍लक्‍लाम्‍बा लःत्ते़म्‍देसे़म्‍मे़ॽआङ् माफे़न्‍साम्‍मिन् हुक्‍सुप्‍ते़म्‍मे़ॽओ॥ हे़क्‍केलॽरिक् नासिङ्‌गे़न् कुधक्‍किन्#५:५ लायोबा नोस्रङ् फाॽआङ्‌ङाङ् कुसिङ् निःत्ते़त्‍लो॥ मे़क्‍ल हे़क्‍क्‍याङ् कुयाम्‍साम्‍मिन् दाङ्‌बान् नुङ् युबा ये़न्‍नो ताङ्‌से़ःप्‍लरो॥
6खिनिॽ आङ्‌दिङ् लॽमाङ्‌ग नुबा पान् मेःन्‍लो॥ खरे़ःङ् के़भङ्‌बा च्‍यॽसिक् सिदाॽइल्‍ले़ के़रे़क् फेॽरुम्‍मिन् युक्‍तुबा कुइसिक् च्‍यॽसिक् ताप्‍फे़ःम्‍बा पाःन्‍निल्‍ले़ के़रे़क् नुबा पाःन्‍हाॽ फे़त्‍लाःन्‍दु के़लॽबा पाःन्‍निन् कुसिङ् मे़न्‍निःत्ते के़वयिॽबि? 7खे़ल्‍ले़चोगुल्‍ले़ खिनिॽ सेसेबा के़बोःक्‍खिर फाॽआङ् खे़न् लायो के़जोःक्‍पा ताप्‍फे़ःम्‍बा मनान्#५:७ ग्रिक पाःन्‍दाङ्‌ङो “तगिबा खे़ॽसुङ्‌ङिन् लःत्ते़म्‍देःसे़म्‍मे़ॽओ” पोङ्‌लो॥ खिनिॽ लुम्‍मोलाम् लःत्ते़म्‍देसे़म्‍मे़ॽ॥ थेआङ्‌भे़ल्‍ले़ ख्रिस्‍ते़ङ्‌ग आनिॽ लागि सिदुङ्‌जभा पोःक्‍खे़चुरे़आङ् वाॽरो, खुने़ॽए आनिॽ चोःक्‌युम्‍भो तङ्‌नाम्‍मिल्‍ले़न् मे़ल्‍लुक्‍सारो॥ 8आनिॽग तगिबा ताप्‍फे़ःम्‍बा याःम्‍बक्‍हाॽ नु लायो हे़क्‍तङ्‌बा खे़ॽसुङ् कुधिम्‍बा खरे़ःङ्‌ङिल्‍ले़ मेःन्, कर सेसेबा नु से़क्‍खाबा कुसङ् खरे़ःङ्‌ङिल्‍ले़ चोःक्‌युम्‍भो तङ्‌नाम्‍ले़न् ससाङ्‌स्रोत् चोगुम्‍लो॥
9तगि याम्‍बोःप्‍मा याःम्‍बक् के़जोःक्‍पा मनाहाॽनु सोरिक् मे़वये़म्‍मिन्‍ने़ॽ लॽरिक् इङ्‌गाॽ सक्‍इङ्‌घङ् साप्‍तुङ्‌ङाङ् हाक्‍निङ्‌ङाङ् वयाङ्॥ 10खे़न् फाॽइङ्‌ग नसान् मे़न्‍जोःक्‍मनाबा फे़न् याःम्‍बक् के़जोःक्‍पा, खिःम्‌यक्‍पा, इङ्‌ले़क्‍पा, नावाइत्‍ला माङ्‌गे़घबाहाॽनु मे़वये़म्‍मिन्‍ने़ॽ के़लॽबाग मेःन्‍लो॥ हे़क्‍के के़जोगुम्‍मिल्‍ले़ग कन् इक्‍सादिङ् खाम्‍बेःक्‍मोलाम्‍बा लःम्‍मा पेःक्‍मा के़बोङ्‌बा वये़रो॥ 11कर आल्‍ल इङ्‌गाॽ खिनिॽ अक्‍खेलॽरिक् सक्‍इङ्‌घङ् साप्‍तुङ्‌ङाङ् हाक्‍निङ्‌ल पत्तारो, आत्तिल्‍ले़ आबाङे नसानिबा नुसाॽआ लॽरिक् पाःत्तुआङ् चाराम्‍मा याःम्‍बक् चोगुॽ, खिःम्‌यक्‍पा चोक्, नावाइत्‍लाहाॽ से़वा चोगुॽ, मना इङ्‌दो मे़त्तुसिॽ, थिमसाङ् नु इङ्‌ले़क्‍पा चोक् हे़क्‍तङ्‌बा मनाःङ्‌ग चुम् मे़लेःत्ते़म्‍मिन्‍ने़ॽओ॥ हे़क्‍क्‍याङ् हे़क्‍तङ्‌बा मनाःन्‍नु सोरिक् चाआङ् मे़जे़म्‍मिन्‍ने़ॽओ॥
12नसान् मे़न्‍जोःक्‍मनाबा सेसेहुप्‍लक्‍पा लाकात्‍पा मनाहाॽ खासे़न् लोःम्‍मासि इङ्‌गाॽ आलक्‍पे़न् मेःन्‍लो, कर सेसेहुप्‍लक् सिगाङ्‌बा मनाहाॽ खासे़न् लोःम्‍माग खिनिॽ याःम्‍बक्‍लो॥ 13निङ्‌वाॽफुमाङ्‌ङिल्‍ले़ लाकात्‍पा मनाहाॽ खासे़न् चोगुसिॽरो, कर साम्‌योसाप्‍लाःल्‍ले़ पाःत्तुबा कुइसिक् “ताप्‍फे़ःम्‍बा लायो के़जोःक्‍पा मनाहाॽ खिनिॽ लुम्‍मोलाम् लःत्ते़म्‍देसे़म्‍सिम्‍मे़ॽओ॥”#साम्‌यो इङ् १७:७

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy