१ कोरन्थि 3
3
सेसेहुप्लक्को निङ्वाॽ मे़न्दङ् पाःन्हाॽ
1आमिःम् फुॽनुसाॽ नु ने़ॽनुसाॽसे, इङ्गाॽ खिनिॽनु पाराङ्ङिल्ले़ याम्साम्गे़न् मनाहाॽनु पाराङ्बा कुइसिक् मे़म्बाःप्पे़न्, कर इक्साबा निङ्वाॽ के़गप्पा मनाहाॽ हे़क्तङ्बा नसाःन्नो कुनिङ्वाॽ के़बाःक्पा अङे़ःक्वाहाॽनु पाःप्मनाबा कुइसिक् पाराङ्लो॥ 2इङ्गाॽ हुॽनिङ्बा निसाम्मिन् खाक्खाक्पा तःक् हे़क्के मे़जोगे़न्, कर नु हे़क्तङ्बा चोगे़रो, थेआङ्भे़ल्ले़ खिनिॽग खाक्खाक्पा तःक् चामा मे़न्छुक्के के़वयिरो॥ आल्लोसाङ् खाक्खाक्पा तःक् चामा के़सुक्पा मे़म्बोङ्ङे के़वयिॽरो, 3थेआङ्भे़ल्ले़ खिनिॽग आल्लो थारिक् इक्साबा निङ्वाॽइल्ले़ के़युक्तिआङ् के़वयिॽरो॥ खिनिॽ लुम्मो नाहे़त्छिङ्मा नु खे़माॽ वाॽइल्ले़ खिनिॽ आबाङे इक्साबा निङ्वाॽइल्ले़ के़युक्तिआङ् नसान् मे़न्जोःक्मनाबा मना कुइसिक् के़म्बोःक्खिन्बि? 4थेआङ्भे़ल्ले़ खिनिॽ लुम्मो थिक्किल्ले़ इङ्गाॽ पावले़न् तिम्दुङ् लॽ, वेॽसमाल्ले़ इङ्गाॽ अप्पोलोसे़न् तिम्दुङ् लॽइल्ले़ खिनिॽ नसान् मे़न्जोःक्मना मना हे़क्तङ्बा के़म्बोःक्खिम्बि? 5अप्पोलोसे़न् नु पावले़न् हाःत्छिबे? आन्छिगेग दाङ्बाल्ले़ मुरा मे़त्ते़छिगे़बा, कुयाःम्बक् के़जोःक्पा कुसेवारोबासिगे़रक्लो॥ आन्छिगे़लाम्बाए खिनिॽ नसान् के़जोगुम्माङ् के़वयिॽरो॥ 6इङ्गाॽ याॽरिःम्बा लेःत्तुङ्, अप्पोलोसरे़#३:६ पावलरे़ खे़ङ्हाॽ काक्नुःल्ले़ तगि ये़सु ख्रिस्तरे़ कुयाःम्बेओ सुनाइङ् से़सुआङ् वये़॥ पावल खे़प्मोलाम् पेआङ् चक्मे़ल्लॽए खुनिॽ हुॽसे़ आप्पोलोसे़न् त्ये़॥ च्वाःत् केःत्तु, कर निङ्वाॽफुमाङ्ङिल्ले़ फोसुरो॥ 7खे़ल्ले़चोगुल्ले़ याॽ के़लेःप्पा नु च्वाःत् के़गेःप्पाहाॽ थेसिआङ् मेःन्लो॥ कर के़भोबा निङ्वाॽफुमाङ्ङिन्लक् के़ये़क्पारो॥ 8याॽरिःम्बा के़लेःप्पे़न् नु च्वाःत् के़गेःप्पाङ्ग कुदङ्बासिरो॥ खे़ङ्हाॽरे़ याम्बुधिक् चोःक्सुबा कुइसिक् आबाङे खुन्छिॽ थुम्घोन् खोसुॽरो॥ 9थेआङ्भे़ल्ले़ आन्छिगे सोरिक् निङ्वाॽफुमाङ्ङिल्ले़ कुयाःम्बक् के़जोःक्पासिगे़रो॥ खिनिॽग निङ्वाॽफुमाङ्ङिल्ले़ कुइक्ताप् नु कुहिम्निङ्लो॥
10निङ्वाॽफुमाङ्ङिल्ले़ पिराङ्बा लुङ्गुम्लाम्बा इङ्गाॽ चाःप्पा हिम् के़जोःक्पा कुइसिक् हिम्पाङ्यक्किन् ने़स्सुङ्, हे़क्क्याङ् वेॽसमाल्ले़ खे़न् सम्दाङ् लुङ्धाक् से़त्तुर हिम् चोगुॽ॥ कर लुङ्धाक् के़से़प्पार हिम् के़जोःक्पाल्ले़ हिम् चोगुल्ले़ खुने़ॽ सिङ्सिङ् लॽमा पोङ्लो॥ 11थेआङ्भे़ल्ले़ तगि ने़स्से़ चुरे़बा हिम्पाङ्यक्किङ्ग ये़सु ख्रिस्तरो॥ खे़न् ने़मनाबा हिम्पाङ्यक्किन्नुःल्ले़ वेॽ आत्तिन्हाॽरे़आङ् वेॽ हिम्पाङ्यक् ने़मा मे़न्छुक्तुन्लो॥ 12आल्ल हिम् के़जोःक्पाल्ले़ खे़न् सम्दाङ् साम्म्याङ्, युप्पा, इमे़ल्लुङ्बा मुधिङ्लुङ्, सिङ्, याःन्सुङ् इग्र याॽलाङ्ङिल्ले़ हिम् चोगुने़ फाॽग्र 13खुने़ॽ कुयाःम्बक्किन् आक्तङ्बा चोक् फाॽआङ् खे़न् खासे़न् ये़न्नो ओसेःन्दाङ् पोङ्लो, हे़क्क्याङ् के़रे़क्ले़ खुनिॽ याःम्बक्किन् से़क्खाबा चोःक्पि मेःम्बि फाॽआङ् मिःल्ले़ए साॽरुरो॥ 14आत्तिन् मनाःल्ले़ चोगुबा कुयाःम्बक्किन् मिःल्ले़ मे़जने़न् खे़ल्ले़ थुम्घो खोसुॽरो॥ 15कर आत्तिन् मनाःल्ले़ चोगुबा कुयाःम्बक्किन् मिःल्ले़ थ्यःङ् चदेसुॽ, खे़न् मनान् यम्बा फे़त्लाॽमाओ थारो॥ खे़न् ताङ्से़ःप्साङ् मिःल्ले़ खप्मे़ लाबु से़रुबा कुइसिक् पोङ्लो॥
16खिनिॽग निङ्वाॽफु माङ्हिम्निङ् फाॽआङ् निङ्वाॽ के़ङ्गत्तुम्मिम्बि? हे़क्क्याङ् निङ्वाॽफुमाङ्ङिल्ले़#३:१६ निङ्वाॽफुमाङ्ङिल्ले़ कुमनाहाॽ सेसेमाङ्ङिन् युङ्बा माङ्हिम्मिन्नु मे़दङ्घुसिरो॥ कुयाम्साम्मिन् खिनिॽओ वाॽ के़लॽबान् निङ्वाॽ के़ङ्गत्तुम्मिम्बि? 17आत्तिल्ले़ निङ्वाॽफु माङ्हिम्मिन् फे़त्लाःन्दुॽ, निङ्वाॽफुमाङ्ङिल्ले़ खे़न् मे़क्खुॽरो, थेआङ्भे़ल्ले़ निङ्वाॽफु माङ्हिम्मिङ्ग सेसे चोक्लो, हे़क्क्याङ् खे़न् माङ्हिम्मिङ्ग खिनिॽएरो॥
18खिनिॽ इङ्मे़ले़क्कासिम्मिन्ने़ॽओ! आत्तिल्ले़ कन् इक्सादिङ् खाम्बेःक्मो सिक्कुम्दाङ्बा नु चाःप्पा चोःक्का लॽरिक् निङ्वाॽ इःत्तुॽ हाराॽ खे़न् थेआङ् मे़ल्ले़ःम्नाबा अदङ् कुइसिक् पोङ्निरो॥ हे़क्केःल्ले़ खे़न् सिक्कुम्साबा पोङ्॥ 19थेआङ्भे़ल्ले़ कन् इक्सादिङ् खाम्बेःक्मोबा सिक्कुम् निङ्वाॽइङ्ग निङ्वाॽफुमाङ्ङिल्ले़ कुनिमाओग अदङ्पान् कुइसिःक्लो॥ साम्योसाप्लाओ अक्खेलॽरिक् साप्ते़आङ् पत्,
“खुने़ॽग सिक्कुम्दाङ्बाहाॽ खुनिॽ इस्वामो ते़म्सुसिरो॥”#अयुब ५:१३ 20हे़क्क्याङ् याम्मो,
“सिक्कुम्साबाहाॽरे़ निङ्वाॽ मे़इःत्तुबा पाःन्निन् हने़बा चोक् फाॽआङ् यहवे दाङ्बाल्ले़ निरो॥”#निङ् सुम् ९४:११ 21खे़ल्ले़चोगुल्ले़ मनाहाॽरे़ खुनिॽ याःम्बेओ आत्तिन्हाॽआङ् आङ्दिङ् मे़न्लॽने़न्लरो॥ थेआङ्भे़ल्ले़ के़रे़क् पाःन्हाॽग खुने़ॽइन्नेरो॥ 22पावल, अप्पोल्लोस, पत्रुस, हे़क्क्याङ् के़रे़क् इक्सादिङ् खाम्बेःक्मान्, ने़त्तिगे़न् हिङ्मन्, सिमे़न्, कोये़म्बा ये़म्मिन् नु ताये़म्मिन्नाङ् खुने़ॽइन्नेरो॥ 23हे़क्क्याङ् खिनिॽग ख्रिस्ते़ल्ले़न्निङ्लो॥ हे़क्क्याङ् ख्रिस्ते़ङ्ग निङ्वाॽफुमाङ्ङिल्ले़न्लो॥
Currently Selected:
१ कोरन्थि 3: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.