Matäus 1
PBJHF

Matäus 1

1
De Staumboom von Jesus
1Daut Buak von de Aufstaumunk Jesus Christus, David sien Sän, Abraham sien Sän.
2Abraham wia Isaak sien Voda, Isaak wia Jakob sien Voda, un Jakob wia Juda un siene Breeda äa Voda, 3un Juda wia Perez un Sera von de Tamar äa Voda, un Perez wia Hezron sien Voda, un Hezron wia Ram sien Voda, 4un Ram wia Aminadab sien Voda, un Aminadab wia Nachschon sien Voda, un Nachschon wia Salman sien Voda, 5un Salman wia Boas sien Voda, von de Rahab, un Boas wia Obed sien Voda von Rut, un Obed wia Jese (Isai) sien Voda, 6un Jese wia dän Kjennich David sien Voda. Un David wia Salomo sien Voda, von Uria sienejewäsne Fru: 7Un Salomo wia Roboam (Rehabeam) sien Voda, un Roboam wia Abija sien Voda, un Abija wia Asa sien Voda, 8un Asa wia Joschafat sien Voda, un Joschafat wia Joram sien Voda, un Joram wia Usija (Usija) sien Voda, 9un Usija wia Jotam sien Voda, un Jotam wia Ahas sien Voda, un Ahas wia Esekia (Hiskia) sien Voda, 10un Esekia wia Manasse sien Voda, un Manasse wia Amon sien Voda, un Amon wia Josija sien Voda, 11un Josija wia Jekonja sien Voda, un siene Breeda to de Tiet aus see no Babel wajch jefieet worden. 12No däm daut see no Babel wajch jefieet wieren, Jekonja wia Schealtiel sien Voda, un Schealtiel wia Serubabel sien Voda, 13un Serubabel wia Abijud sien Voda, un Abijud wia Eljakim sien Voda, un Eljakim wia Asor sien Voda, 14un Asor wia Sadok sien Voda, un Sadok wia Achim sien Voda, un Achim wia Eliud sien Voda, 15un Eliud wia Eleasar sien Voda, un Eleasar wia Matan sien Voda, un Matan wia Jakob sien Voda, 16un Jakob wia Josef sien Voda, Maria äa Maun, von äa es Jesus jebuaren, dee doa Christus heet. 17De Jeschlajchta von Abraham bot David sent 14, un von David bot see no Babel vebaunt (wajch jefieet) worden, sent 14 Jeschlajchta, un von donn aus see vebaunt worden no Babel bot Christus, sent wada 14 Jeschlajchta.
De Jeburt von Jesus
18De Jeburt Jesus Christus wia soo: Aus siene Mutta, Maria, däm Josef aunvetrut wia, ea see toop kjeemen, wia see schwanga vom Heiljen Jeist. 19Oba Josef, äa Maun, wia jerajcht un wull äa kjeene Schaund (vere Menschen) moaken, un neem sich väa, äa heemlich to veloten. 20Aus hee daut heemlich plont, kjeem een Enjel vom Har em Droom no am, un säd: «Josef, David sien Sän, ha kjeene Angst, Maria to nämen aus diene Fru, dan daut Kjint en äa es vom Heiljen Jeist. 21Un see woat eenen Sän jebäaren, un du saust am Jesus nanen, dan hee woat sien Volkj von äare Sinden raden». 22Dit aules passieed oba, om daut erfelt wudd, waut von däm Harn derch dän Profeet jesajcht es, de doa säd: 23«Kjikj! De Junkfru woat schwanga (een Kjint to Welt brinjen) sennen, un woat eenen Sän jebäaren, un see woaren am dän Nomen Immanuel jäwen», {Jes.7,14} äwasat heet daut: Gott met ons. 24Aus Josef vom Schlop oppwuak, deed hee, soo aus däm Har sien Enjel am befoolen haud, un neem siene Fru no sich; 25oba hee erkjand äa nich, bot see äaren Ieeschtjebuarnen Sän to Welt jebrocht haud; un hee jeef am dän Nomen Jesus.