2 Juan 1
1
WERAR TAKU, MUNAZIÑI KUZ
1Wejrqui Juan cjititc̈ha. Icliz jiliritc̈ha wejrqui. Jaziqui tii cartal cjijrz̈cuc̈ha Yooz illzta cullacaquin tjappacha naaz̈a maatinacz̈quin. Wejrqui anc̈huc werara k'ayachuc̈ha. Niz̈aza tjapa Yooz taku criichinacaqui anc̈hucz̈ k'ayachic̈ha. 2Uc̈hum kuzquiziqui werar Yooz taku z̈ejlc̈ha, niz̈aza wiñaya z̈elaquic̈ha. 3Niz̈aza zuma munaziñi kuzziz kaman, Yooz Ejpz̈tan niz̈aza Jesucristo Yooz Majchtan uc̈hum yanapc̈ha. Niz̈aza uc̈hum okz̈cu, llan kuzziz cjiskatc̈ha.
4Yekjap am maatinaca cherchinc̈ha, Yooz takucama kamñi. Nuz̈upan, mantichic̈ha Yoozqui. Nuz̈ kamñi cherz̈cu, ancha chipchinc̈ha wejrqui. 5-6Cullacalla, anziqui am roct'uc̈ha, porapat zuma munaza. Nii mantitaqui anac̈ha anztakaz. Tuquitanpacha uc̈humqui nuz̈ mantitapanc̈ha. Jakziltat zuma munaziñi kuzzizlaja, jalla niiqui Yooz mantitanacacama kamc̈ha.
Tuquitanpacha Yooz mantita nonzinc̈hucc̈ha, zuma munaziñi kuzziz cjee, jalla nii.
INCALLÑI Z̈OÑINACA
7Tii muntuquiz muzpa z̈oñinacaqui ojklayc̈ha, z̈oñi incallcan. Ninacaqui anaz̈ criic̈ha, Jesucristuz̈ z̈oñz̈ curpuchiz kamchic̈ha tii muntuquiz, nii. Jalla ninacac̈ha incallñinacaqui. Niz̈aza Cristuz̈ quintranacac̈ha. 8Anc̈hucqui nonz̈na. Anc̈hucqui Yooztajapaz̈ langz̈a. Nii langz̈ta cuitaquic̈ha, ana pertiznajo, arajpachquin zumanaca tanzjapa.
9Jakziltat Jesucristuz̈ tjaajinta yapzaja, jalla niiqui anaz̈ Yooztan tsjii kuzziz kamc̈ha. Niz̈aza jakziltat Jesucristuz̈ tjaajintacama ana kamc̈haja, jalla niiqui anazakazza Yooztan tsjii kuzzizqui. Pero jakziltat Jesucristuz̈ tjaajintacama kamc̈haja, jalla niic̈ha Yooz Ejpz̈tan niz̈aza Yooz Majchtan tsjii kuzzizqui. 10Jakziltat anc̈hucaquiz tjonz̈cu Cristuz̈ tjaajinta ana niicama tjaajinc̈haj niiqui, anaz̈ Yooztan tsjii kuzziz nii jilaqui. Anc̈hucqui nii z̈oñi ana kjuyquiz kjawznaquic̈ha. Anazaz̈ tsaanaquic̈ha. 11Jakziltat nii anawal z̈oñz̈quiz tsaanac̈haj niiqui, nii z̈oñz̈ anawal langz yanaptaz̈okaz cjic̈ha.
Z̈ERZ TAKUNACA
12Zumsira wacchi takunaca wejtta z̈ejlc̈ha. Pero tjappachaqui anal cjijrz pecuc̈ha. Anc̈hucaquin tjonz pecuc̈ha, uc̈hum pora parlizjapa, porapat cuntintu cjisjapa.
13Am cullaqui illzizakazza Yoozqui. Naaz̈a maatinacaqui saludos apayz̈quic̈ha. Jalla nuz̈ukazza.
Currently Selected:
2 Juan 1: cap
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.