Hebreos 1
1
Skëköl ut se' ta̱ ilà wa
1Skëköl utbitu̱ tai̱ë se' yë́pa bak ká̱ ia̱ia̱ë e'pa ta̱ ittekölpa wa. Ie' utbitu̱ ie'pa ta̱ tai̱ë kua̱'ki̱ kua̱'ki̱. 2Erë i̱'ñe ta̱, mik ká̱ i' e̱rkewatke e' ké̱wö ska' ta̱, ie' tté se' ta̱ iwák alà patkë'itö ká̱ i' ki̱ e' wa. Tsa̱we ta̱ ie' tö íyi ulitane yö' ilà ta̱ ñita̱. Ñies ie' tö ilà tkë'ka̱bak a̱s íyi ulitane dö̀ ie' ulà a̱ aishkuö ta̱. 3Skëköl Alà dör iyë́ olo tai̱ë e'. We̱s Skëköl dör e' su̱ë ie' dör. Íyi ulitane kicha a'tse̱r ie' wa̱ ittè diché tai̱ë e' wa. Se' nuì̱ paikléttsa̱itö e' ukuöki̱ ta̱ ie' tkéka̱ ká̱ jaì a̱ dalöiërta̱' tai̱ë Skëköl ulà bua'kka.
Skëköl Alà olo ta̱' tai̱ë shu̱te̱ Skëköl biyöchökwakpa tsa̱ta̱
4E' wa iwënewa̱ tö Skëköl Alà dör Skëköl biyöchökwakpa tso' ká̱ jaì a̱, e'pa ko̱s tsa̱ta̱. Es ñies we̱s Skëköl tö ie' kiè iwák alà, e' dör bua'iewa̱ we̱s ie' tö ibiyöchökwakpa kiè e' tsa̱ta̱. 5Skëköl yëkkuö ki̱ itso' kitule tö Skëköl tö iché ilà a̱:
“Be' dör ye' alà;
i̱'ñe yö ikkachétke tö ye' dör be' yë́.”#1.5 Salmo 2.7
Erë ttè e' kë̀ yëule ie' wa̱ ibiyöchökwakpa isie a̱. Ñies Skëköl yëkkuö ki̱ Skëköl tö ilà tté chè i' es:
“Ye' tö icheraë tö ye' dör ie' yë́,
eta̱ ie' dör ye' alà.”#1.5 2 Samuel 7.14; 1 Crónicas 17.13
Erë Skëköl kë̀ wa̱ ibiyöchökwakpa isie tté yëule es. 6Ñies mik ie' tö ilà eköl ë̀me, e' patkeketke ká̱ i' a̱, eta̱ ie' tö itté yë' i' es:
“Ye' biyöchökwakpa ulitane ka̱wöta̱ ie' dalöiök tai̱ë.”#1.6 Deuteronomio 32.43
Ttè ekkë ko̱s kue̱ki̱ se' wa̱ ijche̱r tö Skëköl Alà dör Skëköl biyöchökwakpa ulitane tsa̱ta̱.
7Mik Skëköl tö ibiyöchökwakpa tté cheke, eta̱ ie' tö ichè i' es:
“Ye' tö ye' biyöchökwakpa patkeke we̱s siwa̱' batsi̱r es,
e'pa dör ye' kanè mésopa patkekeyö we̱s bö' wörkua wöñar es.”#1.7 Salmo 104.4
8Erë ie' tö ilà tté cheke i' es:
“¡A Skëköl, be' tö s'wëttse̱ke s'blúie e' dör yöbië!
Be' tö s'wëttse̱ke yësyësë.
9Se̱ne yësyësë dalër be' é̱na, erë se̱ne sulu a̱r suluë be' é̱na;
e' kue̱ki̱, ye' dör be' Këköl, e' tö be' klö'wé̱ ta̱ ttsë'ne buaë méyö be' a̱ tai̱ë be' male̱pa ulitane tsa̱ta̱.”#1.8-9 Salmo 45.6-7
10Ñies Skëköl tö ilà tté cheke i' es:
“A Këköl, tsa̱we ta̱ be' tö ká̱ i' yö',
ñies ká̱ jaì ena ì ko̱s tso' iki̱ e' yö' be' wák tö.
11-12E' ko̱s chörawa e̱rdawa we̱s datsi' nurwa̱ ta̱ ie̱rwa es,
e' ko̱s manerdattsa̱ we̱s s'datsi' mane'wè̱ ta̱ iwötrèwa̱ es.
Erë be' tso'tke ke̱net. Be' kë̀ manerpattsa̱, be' se̱r michoë.”#1.10-12 Salmo 102.24-27
13Skëköl tö iché ilà a̱ i' es:
“Be' e̱' tkö́se̱r ye' ulà bua'kka
dö̀ mik ye' tö be' bolökpa mérö be' klö̀ diki̱a̱ eta̱.”#1.13 Salmo 110.1
Erë Skëköl kë̀ wa̱ ttè e' yëule ibiyöchökwakpa isie a̱. 14Skëköl biyöchökwakpa dör we̱s siwa̱' es kë̀ wërta̱'. E'pa ko̱s kaneblöke Skëköl a̱. Ie' tö ie'pa patkeke wé̱pa tsa̱tkërdaë, esepa ki̱muk. E' kue̱ki̱ ie' kë̀ wa̱ ttè ese yëule ie'pa isie a̱.
Currently Selected:
Hebreos 1: BNT
Highlight
Share
Copy
Want to have your highlights saved across all your devices? Sign up or sign in
Nuevo Testamento en Bribri con Antiguo Testamento corto © Sociedad Bíblica de Costa Rica, 1904, 2007, 2010.