โยฮัน 14
14
เยซู เซ ต้ง มี่ง หฒั่ง เตี๋ย วั้ว ติ้ว เจ๊า
1เยซู แอ๋ง ก๊อง, “ไม้ ตู๋ง เฮญี้ยว ฮวาง เฮญี้ยว เฑ่า. อ๋อย หฒุ เสียน เขา ทิน-ฮู่ง หย่า เสียน เขา เยีย. 2เยีย เญย เตีย เญย เปย๊า ม่าย เยียม เญย ต๋อง ธั้ม เญย. สี ก๊อง ไม้ ม่าย เยีย ฒู้ง บั๋ว เม่ย บัว หมี่ อ๊ะ. เยีย หย่า มี่ง หลิ่ว เล์ย ต๋อง ปุน เม่ย บัว เยียม. 3เยีย มี่ง หลิ่ว เล์ย เหฒียง ต๋อง ปุน เม่ย บัว เยียม, เยีย แอ๋ง ต้าย ต้อ เม่ย บัว มี่ง เหธา เยีย เยียม วั้ว. เยีย เยียม หาย เม่ย บัว ฯฒฯ เหธา เยีย เยียม วั้ว. 4เยีย อ๋อย มี่ง เญย ต๋อง วั้ว ติ้ว เจ๊า, เม่ย บัว หย่า ฮิ้ว เญย.”
5โทมัด ก๊อง บั๋ว นิ่น, “เฒี้ยว อ้า! เยีย บัว ไม้ ฮิ้ว ตุ๊ เม่ย มี่ง หาย. เยีย บัว ฮนั้ง หาย นอ ไฮ่ ฮิ้ว ตุ๊ เจ๊า มี่ง?”
6เยซู เตา, “เยีย เซ ต้ง มี่ง หฒั่ง เตี๋ย วั้ว ติ้ว เจ๊า, หย่า ต้ง เฒียน เล์ย, หย่า ต้ง เฒี่ยง แหม่ง. ธ้วด ลิ์ว เขา เยีย, ไม้ ม่าย หาย เต้า ไฮ่ มี่ง ตุ๊ เถา หฒั่ง เตี๋ย วั้ว. 7สี ก๊อง เม่ย บัว หฒะเก้ง ฮิ้ว ตุ๊ เยีย, เม่ย บัว ฯฒฯ ฮิ้ว ตุ๊ เยีย เญย เตีย. ยั่ง น้าย เจี๋ย เม่ย บัว ฮิ้ว ตุ๊ นิ่น, เม่ย บัว หย่า ปวัด เจี๋ย นิ่น.”
8ฟีลิบ ก๊อง บั๋ว เยซู, “เฒี้ยว อ้า! โท้ เม่ย ปุน เยีย บัว ปวัด หฒั่ง เตี๋ย โอ่. ปวัด ลิ์ว เยีย บัว เฮญี้ยว ฆาย อ๊ะ.”
9เยซู ก๊อง, “ฟีลิบ อ้า! เยีย เหธา เม่ย บัว เยียม เล่า ไห่ อ๊ะ. เม่ย หธ่อ ไม้ แก้ง ฮิ้ว ตุ๊ เยีย ไฟ? หาย เต้า ปวัด เจี๋ย เยีย เซ ปวัด เจี๋ย หฒั่ง เตี๋ย. ฮนั้ง น้าย เม่ย เหว่ย หาย ติ่ว ก๊อง, ‘โท้ ปุน เยีย บัว ปวัด หฒั่ง เตี๋ย?’ 10เม่ย ไม้ เสียน เยีย เยียม หฒั่ง เตี๋ย กะญั์ว, หฒั่ง เตี๋ย เยียม เยีย กะญั์ว ไฟ? เยีย เหธา เม่ย บัว ก๊อง น้าย เต๋ย หว่า ไม้ เฒ์ย เยีย กั้น ฮนั้ม ธ้วด ต้าย ก๊อง. หฒั่ง เตี๋ย เยียม เยีย กะญั์ว โหฒว นิ่น กั้น เญย กง. 11เม่ย บัว อ๋อย หฒุ เสียน เยีย เยียม หฒั่ง เตี๋ย กะญั์ว, หฒั่ง เตี๋ย หย่า เยียม เยีย กะญั์ว. ไม้ เฒย แอ๊ะ, อ๋อย หฒุ เหว่ย เยีย โหฒว เญย สี่ เสียน. 12เยีย ก๊อง เฒียน บั๋ว เม่ย บัว, หาย เต้า เสียน เขา เยีย, วั้ว เต้า อ๋อย โหฒว ฮนั้ง เยีย โหฒว นอ. นิ่น โหฒว เญย สี่ ฒู้ง อ๋อย โหฒว เก้า โฮล เจี๋ย เยีย เญย, เหว่ย หฒุ เยีย มี่ง หฒั่ง เตี๋ย วั้ว. 13เม่ย บัว เต๊ง เยีย เญย บั๋ว โท้ หาย หญู่ง, เยีย ฒู้ง อ๋อย โหฒว วั้ว หญู่ง. ฮนั้ง น้าย, หฒั่ง เตี๋ย เหว่ย นิ่น เญย ตอน ตุ๊ เมี่ยน ท่าย. 14สี ก๊อง เม่ย บัว เต๊ง เยีย เญย บั๋ว โท้ หาย หญู่ง, เยีย ฒู้ง อ๋อย โหฒว วั้ว หญู่ง.
เยซู แล์ง ปุน สีง ลี่ง เหฌี่ย
15“สี ก๊อง เม่ย บัว ฮนั้ม เยีย, เม่ย บัว ฯฒฯ เอย เจี๊ยน เยีย เญย หลี่ง โหฒว. 16เยีย อ๋อย เถง หฒั่ง เตี๋ย โท้, นิ่น ฯฒฯ อ๋อย ปุน กั้น เต้า ต้าย เถง เม่ย บัว, เหธา เม่ย บัว เหยียด ลิ์ว เยียม. 17น้าย เต้า เซ สีง ลี่ง, ต้ง ปุน เมี่ยน ฮิ้ว ตุ๊ เฒียน เล์ย วั้ว เต้า. ป้าม เมี่ยน ไม้ ไฮ่ ฒิบ นิ่น, เหว่ย หฒุ ป้าม เมี่ยน หมั่ง ไม้ ปวัด นิ่น หย่า ไม้ ฮิ้ว ตุ๊ นิ่น. มป่า เม่ย บัว ฮิ้ว ตุ๊ นิ่น เญย, เหว่ย หฒุ นิ่น เหธา เม่ย บัว เยียม หย่า เยียม เม่ย บัว เญย เฮญี้ยว.#14:17 ม่าย เต๋ย โล์-ฮนอย โซว ก๊อง “หย่า อ๋อย เยียม เม่ย บัว เญย เฮญี้ยว”. 18เยีย ไม้ กวั่ง เม่ย บัว เป๋น กู้ ฮั่น ตอน. เยีย แอ๋ง อ๋อย ต้าย ล์อ เม่ย บัว. 19ไม้ เล่า ป้าม เมี่ยน ไม้ ปวัด เยีย, มป่า เม่ย บัว อ๋อย ตุ๊ ปวัด เยีย. เหว่ย หฒุ เยีย เฒี่ยง เจี๊ยน, เม่ย บัว ฯฒฯ ตุ๊ เฒี่ยง เจี๊ยน. 20เถา วั้ว ฮนอย เม่ย บัว ฯฒฯ ฮิ้ว ตุ๊ เยีย เยียม เยีย เญย เตีย กะญั์ว, เม่ย บัว หย่า เยียม เยีย กะญั์ว, เยีย หย่า เยียม เม่ย บัว กะญั์ว.
21“หาย เต้า ฒิบ เยีย เญย หลี่ง หย่า เอย เจี๊ยน โหฒว, ต้ง วั้ว เต้า ฮนั้ม เยีย. หาย เต้า ฮนั้ม เยีย, เยีย เญย เตีย หย่า ฮนั้ม นิ่น. เยีย หย่า ฮนั้ม นิ่น หย่า อ๋อย ปุน นิ่น ฮิ้ว ตุ๊ เยีย.”
22ยูดาด, ไม้ เฒ์ย หม่าย เยซู วั้ว เต้า ยูดาด อิสะคาลิโอด, หน่าย เยซู, “เฒี้ยว อ้า! เม่ย เหว่ย หาย ติ่ว ก๊อง เม่ย อ๋อย ปุน เยีย บัว ฮิ้ว ตุ๊ เม่ย มป่า ไม้ ปุน ป้าม เมี่ยน ฮิ้ว ตุ๊ เม่ย?”
23เยซู เตา นิ่น, “หาย เต้า ฮนั้ม เยีย ฯฒฯ เอย เจี๊ยน เยีย หฌาว เญย หว่า โหฒว. เยีย เญย เตีย ฯฒฯ ฮนั้ม นิ่น. เยีย เหธา เยีย เญย เตีย หย่า อ๋อย ต้าย ล์อ นิ่น, เหธา นิ่น เยียม. 24หาย เต้า ไม้ ฮนั้ม เยีย ฯฒฯ ไม้ เอย เยีย หฌาว เญย หว่า. เม่ย บัว ไฮ์ เยีย ก๊อง ลิ์ว น้าย เต๋ย หว่า, ไม้ เฒ์ย เยีย กั้น ฮนั้ม ธ้วด ต้าย ก๊อง. เซ หฒั่ง เตี๋ย, ต้ง พ้าย เยีย ต้าย วั้ว เต้า, เญย หว่า.
25“เยีย หธ่อ เหธา เม่ย บัว เยียม เญย เฒี่ยง โห่ เยีย ก๊อง เหฑ่ง น้าย เต๋ย หว่า บั๋ว เม่ย บัว. 26เถง เมี่ยน วั้ว เต้า, ต้ง หฒั่ง เตี๋ย อ๋อย เต๊ง เยีย เญย บั๋ว พ้าย ต้าย เญย สีง ลี่ง, อ๋อย หฌาว หญู่งๆ เม่ย บัว, หย่า อ๋อย ปุน เม่ย บัว ไฮ่ จั๋ง ตุ๊ เยีย บั๋ว เจี๋ย เญย เหยียด ฒู้ง.
27“เยีย เลี่ยว แป้ง ออน ปุน เม่ย บัว. เซ เยีย กั้น เญย แป้ง ออน เยีย เหธย ปุน เม่ย บัว. เยีย ปุน เญย ไม้ ฮนั้ง ป้าม เมี่ยน ปุน เญย. ไม้ ตู๋ง เฑ่า ฟ่าน หย่า ไม้ ตู๋ง กั้ม เหฑีย.
28“เม่ย บัว ไฮ์ เยีย ก๊อง เจี๋ย, เยีย อ๋อย หฒุ เล่ย ฆอย เม่ย บัว, มป่า เยีย แอ๋ง อ๋อย ต้าย ล์อ เม่ย บัว. สี ก๊อง เม่ย บัว ฮนั้ม เยีย, เม่ย บัว อ๋อย หฒุ อะเฮน้ย เยีย มี่ง หฒั่ง เตี๋ย วั้ว เหว่ย หฒุ หฒั่ง เตี๋ย เก้า โฮล เจี๋ย เยีย. 29น้าย เต๋ย สี่ ไม้ แก้ง ธ้วด เยีย จา-ด่าง บั๋ว เหฒียง เม่ย บัว. ฒั้ว น้าย เต๋ย สี่ ธ้วด เม่ย บัว ฯฒฯ เสียน อ๊ะ.
30“ยั่ง น้าย เจี๋ย เยีย ไม้ ตุ๊ เหธา เม่ย บัว ก๊อง หว่า ธั้ม เหว่ย หฒุ กุ๊น ป้าม เกน วั้ว เต้า อ๋อย ต้าย. นิ่น ไม้ ม่าย หัด ม์า กุ๊น เยีย. 31มป่า เยีย เอย เหฑ่ง หฒั่ง เตี๋ย พ้าย เยีย เญย หว่า เหว่ย ปุน ลู่ง เดี๊ย เมี่ยน ฮิ้ว ตุ๊ เยีย ฮนั้ม หฒั่ง เตี๋ย. เจี์ย ซิน ต้าย. บัว มี่ง อ๊ะ.
Currently Selected:
โยฮัน 14: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007