1 ฮู่ง โต้ว 1
1
ดาวิด ฮู่ง หฮญัง-เจ๊ย โก๋ เญย เฒี่ยง โห่
1ดาวิด ฮู่ง หฮญัง-เจ๊ย ฮลัง, หฒะเก้ง โก๋ ไห่ อ๊ะ. ไม้ กุ๊น ปุน นิ่น ห่ม สวัง ธั้ม, นิ่น ไม้ ไฮ่ เซี้ยว. 2นิ่น เญย หฒวัง เจียน ฯฒฯ ก๊อง บั๋ว นิ่น, “ฮู่ง เตี๋ย อ่า, ปุน เยีย บัว เถง เม่ย ล์อ เต้า ไม้ เปว๋ย เจี๋ย ตอน เญย เซียะ-ตอน ยาง ต้าย ฟู-สู โก๋ว ฮู่ง เตี๋ย. นิ่น ไฮ่ เปว๋ย ฮู่ง เตี๋ย เญย ซิน-เฮลน เถง เยีย บัว เญย เฒี้ยว, เยีย บัว เญย ฮู่ง, เซี้ยว.”
3นิ่น บัว ฯฒฯ มี่ง ก๋อม อิสะลาเอน เต่ย-ปูง ล์อ เซียะ-เหฑว่ย ฯฒฯ ล์อ ตุ๊ เต้า ซูเนม เมี่ยน เญย เซียะ, บั๋ว เห่ว อาบีช้าก, ต้อ ต้าย ปุน ฮู่ง เตี๋ย. 4น้าย เต้า เซียะ หฒะเก้ง เหฑว่ย ไห่. นิ่น ฟู-สู โก๋ว ฮู่ง เตี๋ย มป่า ฮู่ง เตี๋ย ไม้ เหธา นิ่น.
5ฮักกีด โหฒว อาโดนียา เญย มา.#2 ซามูเอน 3:4 อาโดนียา ท่าย นิ่น กั้น โหฒว โฮล ฯฒฯ ก๊อง, “เยีย ฒู้ง อ๋อย ตุ๊ โหฒว ฮู่ง.” นิ่น ฯฒฯ หลิ่ว เล์ย เบ๊าะ จ๋า เธีย เหธา ม์า#1:5 ไฟ ฒ้าง เธีย เญย เมี่ยน. หย่า ม่าย ฮม์ เหฒียบ เต้า เมี่ยน ถิว มี่ง ด่าง. 6(นิ่น เญย เตีย ไม้ ก๊อง เจี๋ย เหยียด หฑุ่น นิ่น, หน่าย ก๋า นิ่น, “เม่ย ฝู่ง โหฒว น้าย โหฒว วั้ว?” อาโดนียา เฒี่ยง ตุ๊ เหฑว่ย ไห่. นิ่น หย่า โหฒว อับซาโลม เญย โย์ว.)#2 ซามูเอน 3:3-4 7นิ่น เหธา เสลุยา เญย ตอน, โยอาบ, เหธา อาบียาทา ไซ เมี่ยน ธ่าง ล่าง. วั้ว เต๋ย อี เต้า ฯฒฯ เอย เจี๊ยน นิ่น, เถง นิ่น. 8มป่า สาโดก ไซ เมี่ยน เหธา เยโฮยาดา เญย ตอน, เบไนยา, เหธา โต่ว หว่า เมี่ยน, นาทัน, เหธา ซิเมอี เหธา เลอี, เหธา ดาวิด เฮ้น ไห่ เญย แปง ไม้ เถง อาโดนียา วั้ว ปูง.
9อาโดนียา เยียม โซเฮเล้ด เญย หละเปย๊ย-ฒอง#1:9 ม่าย เต๋ย เห่ว หละเปย๊ย-นาง. นิด เอนโลเกน หล่ง ปะกี ยู่ง, ง่ง เหธา ง่ง ตอน-จุ่น เหฒี่ย. นิ่น หย่า ธี้ง ฮู่ง เตี๋ย เญย ตอน บัว, เซ นิ่น เญย เหยียด ฒู้ง โย์ว บัว, เหธา เยียม ยูดา โหฒว ฮู่ง เญย เจียน วั้ว เต๋ย เหยียด ฒู้ง. 10มป่า นิ่น ไม้ ธี้ง โต่ว หว่า เมี่ยน, นาทัน, ไฟ เบไนยา, ไฟ เฮ้น ไห่ เญย แปง, ไฟ นิ่น เญย โย์ว, ซาโลมอน.
11นาทัน ฯฒฯ ก๊อง บั๋ว ซาโลมอน เญย มา, บัดเชบา,#2 ซามูเอน 12:24 “เม่ย ไม้ ไฮ์ ไฟ? ฮักกีด เญย ตอน, อาโดนียา, เป๋น ฮู่ง หมี่ อ๊ะ. บัว เญย เฒี้ยว, ดาวิด, ฒู้ง ไม้ ฮิ้ว. 12เหว่ย น้าย, โท้ ปุน เยีย เถง เม่ย ธ่าง ล่าง ฮนั้ง หาย นอ ไฮ่ เหฌียว เม่ย กั้น เหธา เม่ย เญย ตอน, ซาโลมอน, เญย แหม่ง. 13เม่ย อ๋อย หฒุ เปียะ มี่ง ล์อ ดาวิด ฮู่ง, ก๊อง บั๋ว นิ่น, ‘เยีย เญย เฒี้ยว, ฮู่ง เตี๋ย อ้า! เม่ย โฮ้ว หว่า ปุน เยีย, เม่ย เญย มเซียะ โปว, ก๊อง, “เยีย เญย ตอน, ซาโลมอน, ฒู้ง อ๋อย ตุ๊ หฑิบ เม่ย โหฒว ฮู่ง, เฒว์ย เม่ย เญย เหว่ย” ไม้ เฒ์ย? วั้ว หญู่ง, อาโดนียา เหว่ย หาย ติ่ว ตุ๊ โหฒว ฮู่ง หมี่ อ๊ะ?’ 14เม่ย เหธา ฮู่ง เตี๋ย หธ่อ ก๊อง เจี๊ยน หว่า วั้ว หฒั่น, เยีย ฯฒฯ เปียะ มี่ง เถง เม่ย ต้ง โจ๋ว หว่า ก๊อง.”
15บัดเชบา ฯฒฯ เปียะ ฮู่ง เตี๋ย เญย เกน ปวั้ง ฮู่ง เตี๋ย. ฮู่ง เตี๋ย โก๋ ไห่ อ๊ะ. ม่าย ซูเนม เมี่ยน เญย เซียะ, อาบีช้าก, เยียม วั้ว โก๋ว นิ่น. 16บัดเชบา เกวย เหฌี่ย ป๋าย ฮู่ง เตี๋ย.
ฮู่ง เตี๋ย ฯฒฯ หน่าย นิ่น, “เม่ย อ๋อย หล่ง หาย หญู่ง?” 17บัดเชบา ก๊อง บั๋ว นิ่น, “เยีย เญย เฒี้ยว อ่า, เม่ย เฒี้ยง เจี๊ยน เฒี้ยว, เม่ย เญย ทิน-ฮู่ง, แล์ง หว่า ปุน เยีย. เม่ย แล์ง, ‘เม่ย เญย ตอน, ซาโลมอน, อ๋อย ตุ๊ หฑิบ เจี๊ยน เม่ย โหฒว ฮู่ง เฒว์ย เจี๊ยน เม่ย เญย เหว่ย.’ 18มป่า อี้ หฒั่น อาโดนียา ตุ๊ โหฒว ฮู่ง หมี่ อ๊ะ. เยีย เญย เฒี้ยว, ฮู่ง เตี๋ย, หย่า ไม้ ฮิ้ว. 19นิ่น หล่ง ง่ง เหธา ง่ง ตอน-จุ่น เหธา ปะกี ยู่ง ธั้ม เญย เหฒี่ย หย่า ธี้ง ฮู่ง เตี๋ย เญย เหยียด ฒู้ง ตอน เหธา อาบียาทา ไซ เมี่ยน เหธา ต้ม แปง-เปย๊ย, โยอาบ, มป่า นิ่น ไม้ ธี้ง เม่ย เญย โปว, ซาโลมอน. 20เยีย เญย เฒี้ยว, ฮู่ง เตี๋ย อ่า, อี้ หฒั่น อิสะลาเอน หฒวัง เมี่ยน เญย มฒีง หมั่ง เจี๊ยน เม่ย, อ๋อย เม่ย บั๋ว นิ่น บัว หาย เต้า ตุ๊ หฑิบ เจี๊ยน เยีย เญย เฒี้ยว, ฮู่ง เตี๋ย, โหฒว ฮู่ง เฒว์ย เหว่ย. 21ไม้ เฒย แอ๊ะ, เยีย เญย เฒี้ยว, ฮู่ง เตี๋ย, เกวย เสย หมี่ อ๊ะ.#1:21 ฟาน หฒะ ฮิบลู หว่า ก๊อง “เกวย เสย, มี่ง เหธา นิ่น เญย อง-ถาย บัว เยียม.” เอ๋ย เล์ย เซ ไต่ หมี่ อ๊ะ. ฆะฮ้า เยีย เหธา เยีย เญย ตอน, ซาโลมอน, หฒุ ฝุน เป๋น ฒุ์ย-เมี่ยน หมี่ อ๊ะ.”
22บัดเชบา เหธา ฮู่ง เตี๋ย หธ่อ ก๊อง เจี๊ยน หว่า วั้ว หฒั่น, โต่ว หว่า เมี่ยน, นาทัน, ต้าย เถา อ๊ะ. 23ม่าย เมี่ยน บั๋ว ฮู่ง เตี๋ย, “โต่ว หว่า เมี่ยน, นาทัน, ต้าย เถา.” นาทัน ฯฒฯ เยียม ฮู่ง เตี๋ย เญย หฑะเฮมียน พัวะ เหฌี่ย เถา เดา.
24นาทัน ก๊อง, “เยีย เญย เฒี้ยว, ฮู่ง เตี๋ย อ่า, เม่ย หฒะเก้ง ก๊อง อาโดนียา ตุ๊ หฑิบ โหฒว ฮู่ง, ตุ๊ เฒว์ย เม่ย เญย เหว่ย ไฟ? 25อี้ ฮนอย นิ่น มี่ง หล่ง ง่ง เหธา ง่ง ตอน-จุ่น เหธา ปะกี ยู่ง ธั้ม เญย เหฒี่ย. นิ่น หย่า ธี้ง ฮู่ง เตี๋ย เญย เหยียด ฒู้ง ตอน เหธา เหยียด ฒู้ง ต้ม แปง-เปย๊ย#1:25 ไฟ ต้ม แปง-เปย๊ย, โยอาบ. เหธา อาบียาทา ไซ เมี่ยน. อี้ หฒั่น นิ่น บัว เหธา นิ่น เยียม วั้ว หญั่น, เยียม วั้ว ฮบ หย่า ก๊อง, ‘อาโดนียา ฮู่ง อ้า! เฒี่ยง ตุ๊ หม่าน ฝุย อ๊า โล่ะ!’ 26มป่า เยีย, เม่ย เญย โปว, เหธา สาโดก ไซ เมี่ยน เหธา เยโฮยาดา เญย ตอน, เบไนยา, เหธา เม่ย เญย โปว, ซาโลมอน, นิ่น ไม้ ธี้ง. 27น้าย เต๋ย สี่ ธ้วด เซ เยีย เญย เฒี้ยว, ฮู่ง เตี๋ย, ฮนั้ง น้าย นอ โหฒว หย่า ไม้ บั๋ว เม่ย เญย โปว บัว หาย เต้า ตุ๊ หฑิบ โหฒว ฮู่ง, เฒว์ย เยีย เญย เฒี้ยว, ฮู่ง เตี๋ย เญย เหว่ย ไฟ?”
ดาวิด เหลียบ ซาโลมอน โหฒว ฮู่ง
28ดาวิด ฮู่ง ก๊อง, “เห่ว บัดเชบา ต้าย.” บัดเชบา ฯฒฯ เปียะ ต้าย โซ้ว เจี๊ยน ฮู่ง เตี๋ย เญย หฑะเฮมียน. 29ฮู่ง เตี๋ย ฯฒฯ แล์ง หว่า ก๊อง, “เฒี้ยว, ต้ง เถง เยีย เล่ย ดุ๊ด หญู่งๆ โค้ว หน่าน วั้ว เต้า, หฒะเก้ง เฒี่ยง เจี๊ยน. 30ด่ง น้าย เฒียน, เยีย อี้ ฮนอย อ๋อย หฒิว เยีย เฒี้ยง เจี๊ยน เฒี้ยว, อิสะลาเอน เมี่ยน เญย ทิน-ฮู่ง, โฮ้ว ปุน เม่ย วั้ว เต๋ย หว่า โหฒว. เม่ย เญย ตอน, ซาโลมอน, ตุ๊ หฑิบ เยีย โหฒว ฮู่ง หย่า ตุ๊ เฒว์ย เจี๊ยน เยีย เญย เหว่ย.”
31บัดเชบา ฯฒฯ พัวะ เหฌี่ย เฮมียน เถา เดา ป๋าย ฮู่ง เตี๋ย หย่า ก๊อง, “โท้ ปุน เยีย เญย เฒี้ยว, ดาวิด ฮู่ง, เฒี่ยง ตุ๊ หม่าน ฝุย.”
32ดาวิด ฮู่ง ก๊อง, “เห่ว สาโดก ไซ เมี่ยน เหธา โต่ว หว่า เมี่ยน, นาทัน, เหธา เยโฮยาดา เญย ตอน, เบไนยา, เปียะ ต้าย.” นิ่น บัว ฯฒฯ ต้าย เยียม ฮู่ง เตี๋ย เญย หฑะเฮมียน. 33ฮู่ง เตี๋ย ก๊อง บั๋ว นิ่น บัว, “ต้อ เม่ย บัว เญย เฒี้ยว เญย โปว เหธา เจี๊ยน เม่ย บัว มี่ง หย่า ปุน เยีย เญย ตอน, ซาโลมอน, เก้ เจี๊ยน เยีย กั้น เญย ล่อ ฝูง นิ่น มี่ง เถา กีโฮน ววม-ฒี้ง. 34เยียม วั้ว ปุน สาโดก ไซ เมี่ยน เหธา โต่ว หว่า เมี่ยน, นาทัน, โต๋ โย่ว ออน นิ่น โหฒว อิสะลาเอน เมี่ยน เญย ฮู่ง. อ๋อย หฒุ ปย๊ม จอง หย่า เห่ว เจี๊ยน ก๊อง, ‘โท้ ปุน ซาโลมอน ฮู่ง เฒี่ยง ตุ๊ หม่าน ฝุย.’ 35ฆะฮ้า อ๋อย หฒุ กัน เจี๊ยน นิ่น ฝาว ต้าย. นิ่น ฯฒฯ เฒว์ย เจี๊ยน เยีย เญย เหว่ย ตี๊ เยีย โหฒว ฮู่ง. เยีย หย่า พ้าย นิ่น กุ๊น อิสะลาเอน เหธา ยูดา.”
36เยโฮยาดา เญย ตอน, เบไนยา, เตา ฮู่ง เตี๋ย, “อาเมน. โท้ เฒี้ยว, เยีย บัว เญย เฒี้ยว, ฮู่ง เตี๋ย, เญย ทิน-ฮู่ง, หย่า ตี่ง ฮนั้ง หน่าย. 37ฒิ่น ด่าง เฒี้ยว ฮนั้ง หาย นอ เหธา เยีย เญย เฒี้ยว, ฮู่ง เตี๋ย, เยียม, โท้ เฒี้ยว หย่า ฮนั้ง วั้ว นอ เหธา ซาโลมอน เยียม, หย่า ปุน นิ่น เญย ฮู่ง โห่#1:37 ฮิบลู หว่า ก๊อง เหว่ย. เก้า โฮล เยีย เญย เฒี้ยว, ดาวิด ฮู่ง.”
38สาโดก ไซ เมี่ยน เหธา โต่ว หว่า เมี่ยน, นาทัน, เหธา เยโฮยาดา เญย ตอน, เบไนยา, เหธา เคเลที เมี่ยน, เหธา เพเล้ด เมี่ยน,#1:38 น้าย เต๋ย อี หญู่ง เมี่ยน โหฒว ฮู่ง เตี๋ย เญย ซิน-เฮลน เมี่ยน. ฯฒฯ ปุน ซาโลมอน เก้ เจี๊ยน ดาวิด ฮู่ง เญย ล่อ แอ๋ง ฝูง นิ่น มี่ง เถา กีโฮน ววม-ฒี้ง. 39เยียม วั้ว สาโดก ไซ เมี่ยน ฯฒฯ เฒาะ เยียม หฒั่ง ทิน-ฮู่ง เญย ด๊บ-ลิ่ว ตั๊บ เจี๊ยน ออน เมี่ยน เญย โย่ว วั้ว นอม จอง ต้าย, หล่ง โย่ว ออน ซาโลมอน. นิ่น บัว หย่า ปย๊ม จอง. หฒวัง แปะ ฝีง เห่ว เจี๊ยน ก๊อง, “โท้ ปุน ซาโลมอน ฮู่ง เฒี่ยง ตุ๊ หม่าน ฝุย.” 40หฒวัง แปะ ฝีง หย่า กัน เจี๊ยน นิ่น หฑวน, ปย๊ม เจี๊ยน เฮล้า-ด้ง หนู, หฒะเก้ง! เฌียนๆ โย่วๆ เญย เห่ว, เฉีย ฒู้ง ดั่น เดา ต์ง.
41อาโดนียา แอ๋ง เหธา นิ่น เยียม เญย หฒวัง แคะ เมี่ยน โธะ โหะ หญั่น ป่า โห่ว นิ่น วั้ว ต๋น หฮนาง วั้ว หฒั่น, นิ่น บัว ไฮ์ วั้ว เต๋ย เฉีย บุย. โยอาบ ไฮ์ จอง เญย เฉีย บุย นิ่น ฯฒฯ หน่าย ก๋า, “เยียม วั้ว ฒี่ง กะญั์ว เญย เฉีย ด่ง หน่าย บุย ม่าย หาย หญู่ง เอ๋ย เล์ย?”
42นิ่น บัว หธ่อ ก๊อง เจี๊ยน หว่า วั้ว หฒั่น, ม่าย อาบียาทา ไซ เมี่ยน เญย ตอน, โยนาทาน, ต้าย เถา. อาโดนียา ก๊อง, “เปียะ ม่าะ! เม่ย โหฒว คู้ เมี่ยน. ต๋าย เม่ย หย่า ต้อ คู้ เฝียน ต้าย.”
43โยนาทาน เตา, “ไม้ เฒ์ย สี่ อ๊ะโล่ะ! บัว เญย เฒี้ยว, ดาวิด ฮู่ง, เหลียบ ซาโลมอน โหฒว ฮู่ง หมี่ อ๊ะ. 44ฮู่ง เตี๋ย พ้าย สาโดก ไซ เมี่ยน เหธา โต่ว หว่า เมี่ยน, นาทัน, เหธา เยโฮยาดา เญย ตอน, เบไนยา เหธา เคเลที เมี่ยน เหธา เพเล้ด เมี่ยน กัน นิ่น มี่ง. นิ่น บัว หย่า ปุน นิ่น เก้ เจี๊ยน ฮู่ง เตี๋ย เญย ล่อ. 45สาโดก ไซ เมี่ยน เหธา โต่ว หว่า เมี่ยน, นาทัน, เยียม กีโฮน ววม-ฒี้ง หล่ง โย่ว ออน นิ่น โหฒว ฮู่ง. นิ่น บัว เยียม หน่าย เฌียนๆ โย่วๆ เญย หฑวน, เฉีย ฯฒฯ แอ๊ง ปวั๊ง เหยียด นอม ฒี่ง. น้าย เซ เม่ย บัว หมวัง ไฮ์ เญย เฉีย. 46ซาโลมอน ฒู้ง เฒว์ย เจี๊ยน ฮู่ง เหว่ย อ๊ะ. 47ไม้ ตาน บัวะ น้าย. ฮู่ง เญย เจียน หย่า ต้าย ปวัง หว่า ปุน บัว เญย เฒี้ยว, ดาวิด ฮู่ง. นิ่น บัว ก๊อง, ‘โท้ เม่ย เญย ทิน-ฮู่ง ปุน ซาโลมอน เญย เม่ง เก้า โฮล เม่ย เญย, หย่า ปุน นิ่น เญย ฮู่ง โห่ เก้า โฮล เม่ย เญย.’ ฮู่ง เตี๋ย ฯฒฯ เยียม นิ่น เญย โหธว โด๊ะ เหฌี่ย ป๋าย 48แอ๋ง ก๊อง, ‘เธง เฒี้ยว, อิสะลาเอน เมี่ยน เญย ทิน-ฮู่ง, เหว่ย หฒุ นิ่น อี้ ฮนอย ปุน เยีย เญย มฒีง ตุ๊ ปวัด หฑิบ เยีย วั้ว เต้า เฒว์ย เยีย เญย เหว่ย.’”
49อาโดนียา เญย หฒวัง แคะ ไฮ์ ลิ์ว น้าย เต๋ย หว่า, นิ่น บัว เฮญี้ยว หว่าย เหฑ่ง, เฒียง หน่าย เจี์ย ซิน เปย๋า หฑาน เหฑ่ง หมี่ อ๊ะ. 50อาโดนียา กั้ม เหฑีย ซาโลมอน ฯฒฯ มี่ง นั้น เจี๊ยน เหฒี่ย-ต้อง เญย จอง. 51ม่าย เมี่ยน บั๋ว ซาโลมอน, “อาโดนียา กั้ม เหฑีย ซาโลมอน ฮู่ง ฯฒฯ นั้น เจี๊ยน เหฒี่ย-ต้อง เญย จอง. นิ่น ก๊อง, ‘โท้ ซาโลมอน ฮู่ง อี้ ฮนอย โฮ้ว หว่า นิ่น ไม้ หล่ง หฑุ ด๊าว ไต๋ เยีย, นิ่น เญย โปว.’”
52ซาโลมอน ก๊อง, “สี ก๊อง ปวัด นิ่น โหฒว คู้ เมี่ยน, เหยียด ติ้ว นิ่น เญย บะเปยย ไม้ หฒุ ด๊อด เหฌี่ย เดา. มป่า สี ก๊อง ปวัด นิ่น โหฒว เอ๊าะ สี่, นิ่น ฒู้ง อ๋อย หฒุ ไต่.” 53ซาโลมอน ฮู่ง ฯฒฯ พ้าย เมี่ยน มี่ง วั้ว เหฒี่ย-ต้อง ต้อ นิ่น ต้าย. อาโดนียา ฯฒฯ ต้าย พัวะ เหฌี่ย ซาโลมอน ฮู่ง เญย หฑะเฮมียน. ซาโลมอน ก๊อง, “หฑวน เม่ย กั้น เญย เปย๊า อ๊ะ.”
Currently Selected:
1 ฮู่ง โต้ว 1: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007