MATTHAÏOS 1
KHASICLBSI

MATTHAÏOS 1

1
Ki kpa tymmen jong U Jisu Khrist
(Luk. 3:23-38)
1Kane ka dei ka thup kyrteng jong ki kpa tymmen U Jisu Khrist, uba hiarpateng na u Dabid, uba long uba hiarpateng na u Abraham.
2-6 # 2 Syiem. 24:14,15; 2 Khrn. 36:10; Jer. 27:20 Naduh u Abraham haduh u syiem Dabid, ïa kine harum ki kpa tymmen la thoh kyrteng: U Abraham, u Isaak, u Jakob, u Judah bad ki para shynrang jong u; nangta u Peres bad u Serah (ka kmie jong ki ka dei ka Tamar), u Hesron, u Ram, u Amminadab, u Nahshon, u Salmon, u Boas (ka kmie jong u ka dei ka Rahab), u Obed (ka kmie jong u ka dei ka Ruth), u Jesse, bad u syiem Dabid.
Na u Dabid haduh ka por ha kaba ïa ki paid Israel la ringmraw sha Babilon, ïa kine harum ki kpa tymmen la thoh kyrteng: 7-11U Dabid, u Solomon (ka kmie jong u ka dei ka briew kaba la ju long ka tnga jong u Uriah), u Rehoboam, u Abijah, u Asa, u Jehoshaphat, u Jehoram, u Ussaïah, u Jotham, u Ahas, u Hesekaïah, u Manasseh, u Amon, u Josaïah, bad u Jehoïakhin lem bad ki para shynrang jong u.
12-16Na ka por hadien ka jingshah ringmraw ha Babilon haduh ka jingkha ïa U Jisu, ïa kine harum ki kpa tymmen la thoh kyrteng: U Jehoïakhin, u Shealtiel, u Serubbabel, u Abiud, u Eliakim, u Asor, u Sadok, u Akhim, u Eliud, u Eleasar, u Matthan, u Jakob, bad u Joseph, uba la shongkurim ïa ka Mari, ka kmie jong U Jisu, ïa uba la khot U Messaïah.
17Te kumta, la don khatsaw pateng bynriew naduh u Abraham haduh u Dabid, bad khatsaw pateng na u Dabid haduh ka jingshah ringmraw ha Babilon, bad khatsaw pateng naduh nangta haduh ka jingkha ïa u Messaïah.
Ka jingkha ïa U Jisu Khrist
(Luk. 2:1-7)
18 # Luk. 1:27 Kane ka long kumno ka jingkha ïa U Jisu Khrist ka la jia. Ka kmie jong u ka Mari ka la ïatehktien bad u Joseph, hynrei ha shuwa ba kin ïashongkurim, la shem ïa ka ba ka la punkhun na U Mynsiem Bakhuid. 19U Joseph u long u briew uba ju ïai leh borabor ïa kaba dei, hynrei um kwah ban pynjahburom ïa ka Mari ha kaba paw; kumta u la thmu ban pynkut noh ïa ka jingïatehktien ha kaba jar jar. 20Katba u dang puson halor kane, u angel jong U Trai u la mihpaw ha u ha ka jingphohsniew bad u ong, “Ko Joseph, uba hiarpateng na u Dabid, wat sheptieng ban shim ïa ka Mari ban long ka tnga jong me. Namar dei da U Mynsiem Bakhuid ba ka la punkhun. 21#Luk. 1:31Kan kha i khun shynrang, bad men khot kyrteng ïa u, U Jisu — namar un pyllait im ïa ki briew jong u na ki pop jong ki.”
22Mynta kane baroh ka la jia khnang ban pynlong ïa kaei kaba U Trai u la kren lyngba ki nongïathuhlypa ban urlong shisha, 23#Isa. 7:14“Ka Theisotti kan punkhun bad kan kha ïa u khun, bad yn khot kyrteng ïa u, U Immanuel” (kaba mut “U Blei u long lem bad ngi”).
24Kumta haba u Joseph u la kyndit thiah, u la shongkurim ïa ka Mari, kumba u angel jong U Trai u la bthah ïa u ban leh kumta. 25#Luk. 2:21Hynrei um shym la ïathiah shongkha bad ka ha shuwa ban kan kha ïa u khun jong ka. Bad u Joseph u la khot kyrteng ïa u, U Jisu.

KHASI HOLY BIBLE (CL) © Bible Society of India, 2016. Used by permission. All rights reserved worldwide.


Learn more about Khasi CL Bible - BSI

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.