哥林多後書 4
4
缶仔底背个寶貝
1既然上帝憐憫𠊎等，將這職務交給𠊎等，𠊎等就無失志。 2𠊎等拒絕一切毋知見笑毋敢見人个事；𠊎等無行詭詐个事，也無曲解上帝个道理。反轉，在上帝面前，𠊎等使真理公開顯明出來，用自家个行為來啟發逐儕个良心。 3就算𠊎等所傳个福音有難了解个所在 #4:3 「有難了解个所在」原文直譯係「像係幪等帕仔」，參考 3:13-16 。，也只有該兜向滅亡走等去个人正毋了解。 4該兜人毋信，係因為這世間个神明使佢等个心眼青盲，害佢等看毋到福音个光；福音所顯出个就係基督个榮光，基督係上帝个真相。 5𠊎等毋係傳自家，𠊎等所傳个就係「耶穌基督係主」；為到耶穌个緣故，𠊎等成做你等个僕人。 6吩咐「愛有光對烏暗中照出來」个上帝，就係照光𠊎等內心个上帝；佢使𠊎等認識上帝个榮光，顯在耶穌基督个面頂。
7總係𠊎等係泥做个缶仔，底背竟然裝等這屬靈个寶貝；這就係顯明，這無比个大能係屬上帝个，毋係屬𠊎等个。 8𠊎等堵到各種个困難，總係無被它磧碎；常常疑狐，總係無絕望； 9有盡多對敵，總係無受棄絕；被人打橫，總係無死。 10𠊎等个身體常常帶等耶穌个死，使耶穌个生命也顯明在𠊎等个身上。 11因為，𠊎等還生个時節，為耶穌个緣故常常有死亡个危險，為到使耶穌个生命在𠊎等會朽爛个身上顯明出來。 12這就係講，𠊎等常常面對死亡，你等卻得到生命。
13聖經講：「𠊎信，所以𠊎宣揚。」照這種信仰个精神，𠊎等也信，所以𠊎等也宣揚。 14𠊎等知，使主耶穌復活个上帝也一定會使𠊎等同耶穌共下復活，也帶𠊎等同你等共下到佢个面前。 15這一切攏總係為到你等；恁樣，上帝个恩典臨到越多人，就會有越多人獻上佢等个感謝來彰顯上帝个榮光。
靠信心生活
16因為恁樣，𠊎等無失志。雖然𠊎等外在个身體漸漸敗壞，總係𠊎等內在个生命日日換新。 17𠊎等所堵到這暫時小可个痛苦會為𠊎等帶來貴重、無比、永遠个榮光。 18𠊎等所注目个毋係看得到个，係看毋到个；因為看得到个係暫時个，看毋到个正係永遠个。
Currently Selected:
哥林多後書 4: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012