Sirak 1
1
Utai Ti Dipelalai pasal Penemu Dalam
1Semua Penemu Dalam bepun ari Tuhan, lalu Penemu Dalam endang ba Iya selama-lama. 2Sapa ulih niap pasir di tebing tasik, titik leka ujan tauka pemayuh hari ti enda nemu ambis? 3Sapa ulih ngira peninggi langit, pemesai dunya, penalam tasik besai tauka penalam Penemu Dalam?
4Penemu-dalam digaga dulu ari semua utai bukai;
lalu pemereti endang meruan bisi belama.
6Kati bisi orang udah dipadah ari ni pun Penemu-dalam?
Kati bisi orang meretika pemandai iya ti enda berupai dipeda?
8Semina siku aja ke amat bepenemu, iya nya, Tuhan ke duduk atas kerusi rajah.
Kitai patut nangi sereta bebasaka Iya.
9 Tuhan empu ngaga Penemu Dalam.
Iya meda sereta nemu Penemu Dalam.
Nya alai, semua utai ti digaga Iya, disi Iya enggau Penemu Dalam.
10Genap iku mensia nerima Penemu Dalam ti setipak enggau pemeri Tuhan;
tang iya meri Penemu Dalam ngagai orang ke rinduka Iya.
11Penangi ke Tuhan deka mai basa sereta temegah ati,
pengelantang enggau ati gaga ti besai amat.
12Penangi ke Tuhan ngasuh ati nyamai
sereta meri pengaga, ati ti senang lantang sereta gayu guru.
13Orang ke nangika Tuhan dudi ila sigi mujur;
Allah Taala deka merekat iya ba hari pemarai iya.
14Penangi ke Tuhan nya sigi singkang ti keterubah nuju Penemu Dalam;
orang ke taluk deka nerima Penemu Dalam, benung agi dalam kandung indai sida.
15Penemu Dalam endang udah bisi ba mensia ari menya,
lalu meruan mengkang ba peturun sida.
16Penangi ke Tuhan endang Penemu Dalam ti chukup amat;
Penemu Dalam deka muaska ati kitai enggau semua pemeri iya.
17 Iya ngisi rumah enggau gudang kitai
enggau semua utai ti dikinginka ati kitai.
18Penangi ke Tuhan nya makuta Penemu Dalam
ti mansang sama enggau pengelantang sereta pengerai.
19Penemu Dalam deka meri penemu enggau pemereti sereta pemandai.
Orang ke ngembuan Penemu Dalam deka bulih basa ti nambah-senambah.
20 Penangi ke Tuhan sigi pun urat Penemu Dalam,
lalu umur ti panjai nyadika dan iya.
Nagang Diri
22Orang ke ringat sengapa nadai kebuah sigi enda bulih pengampun, laban pengeringat ti nyau lebih baka nya ngerusak mensia. 23Orang ke liat ati nganti maya ti patut deka gaga dudi hari. 24Orang ke diau diri deka dipuji orang ba maya ti patut laban sida mereti.
Penemu Dalam Enggau Basa ke Allah Taala
25Penemu Dalam sigi sarang jaku dalam, tang orang ke bedosa endang ngumbai pendiau ti manah nadai guna. 26Enti nuan inginka Penemu Dalam, nuan mesti talukka semua pengasuh Tuhan, nya baru Iya deka meri nuan Penemu Dalam. 27Orang ke nangika Tuhan, iya nya, orang ke pintar sereta bepejalar. Tuhan rinduka orang ke taluk sereta ngemaruhka ati diri. 28Anang enda nangika Tuhan sereta semak Iya enggau ati lurus. Anang nyembah Tuhan enggau ati enda lurus. 29Anang enda bejimat nyebut utai. 30Anang nyumbungka diri ngambika nuan enda labuh sereta enda malu, laban Tuhan deka mantaika utai ti dipelalalika nuan, lalu deka ngasuh nuan malu di mua orang mayuh, laban nuan enda nangika Tuhan tang semina pura-pura aja.
Currently Selected:
Sirak 1: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia