Bel enggau Naga 1
1
Daniel enggau bala imam Bel
1Udah Raja Astiages parai, Sirus ari Persia lalu nganti iya merintah menua nya. 2Daniel siku ari pangan Raja Sirus ke semak amat enggau iya. Raja ngembuan pengandal ke besai ba Daniel lebih ari bala penyading penemu iya ke bukai.
3Orang Babilon bisi engkeramba benama Bel. Tiap hari orang meri 400 liter tepung alus, empat puluh iku kambin beri-beri enggau 200 liter wain nyadi ke piring ngagai Bel. 4Raja Sirus arapka Bel endang petara lalu nyembah nya tiap hari. Tang Daniel nyembah Allah Taala iya empu.
5Nyadi sekali raja nanya Daniel, “Nama kebuah nuan enda nyembah Bel?” Daniel nyaut, “Aku enda nyembah engkeramba ti digaga jari mensia. Aku semina nyembah Allah Taala ti idup, ngaga serega enggau dunya lalu Iya Tuhan semua mensia.
6“Kati nuan enda arapka petara kami Bel ti amat idup?” tanya raja. “Enda nuan meda pemayuh utai dempa enggau dirup iya tiap hari?”
7Daniel ketawa lalu bejaku, “Anang nuan alah dikemelika orang, Raja. Petara ti di kumbai Bel enda lebih ari tanah liat ti dibalut enggau engkaraju; iya enda nemu makai tauka ngirup sebarang utai,”
8-10Ninga nya raja balat amat ringat lalu ngangauka tujuh puluh iku imam Bel. Iya bejaku ngagai sida, “Aku ngasuh kita ngadang dulu, kita deka dibunuh enti kita enda nunjuk ngagai aku Bel nya makai semua piring ti diberi ngagai iya. Enti kita ulih nentuka Bel amat makai piring, Daniel deka dibunuh laban ngumbai Bel nya ukai petara.”
Daniel setuju enggau perambu tu. 11Semua sida nitihka raja ngagai rumah endur nyembah Bel, ti alai bala imam Bel bejaku enggau raja, “Raja, kami deka pansut ari rumah tu awakka nuan ngengkah pemakai atas mija lalu nyediaka wain. Lebuh nuan pansut, nuan lalu ngunchi pintu lalu ngechop kunci ngena chop raja. 12Pagi siti lebuh nuan ngabas utai nya, enti Bel enda makai piring nya, nuan tau munuh kami. Tang enti Bel makai piring nya, Daniel deka dibunuh laban bebula ngelaban kami.”
13Tang bala imam Bel enda irau laban sida udah ngaga jalai belalai masuk ari baruh mija, dalam rumah sembiang, awakka bisi jalai kena sida tama makai piring ti diberi ngagai Bel tiap malam.
14Lebuh bala imam udah mupuk pulai, raja lalu nyedia piring ke Bel. Udah nya Daniel ngasuh orang gaji iya mai abus lalu ngachirka iya ba geladak papan rumah sembiang nya. Orang bukai nadai meda, semina raja aja. Udah nya semua sida pansut, lalu ngunchi pintu, ngechop iya ngena chop raja. Sida lalu mulai kediri.
15Malam nya, baka selama, bala imam enggau bini anak sida tama rumah sembiang nengah jalai ti dipelalai, lalu makai pemakai sereta ngirup wain ke bisi dia.
16Tumu pagi siti, raja enggau Daniel mansang ngagai rumah sembiang. 17Raja nanya Daniel, “Kati chop penutup pintu bisi pechah, Daniel?” “Nadai raja, chop penutup pintu enda pechah,” saut iya.
18Pengudah pintu dibuka, raja tepedaka mija ti endur ngengkah pemakai puang, iya lalu manjung “Nuan bekuasa, O Bel! Nuan amat petara.”
19Tang Daniel belabuh ketawa lalu bejaku enggau raja, “Sebedau nuan masuk ke dalam rumah sembiang, peda nuan geladak papan, uji padahka aku, sapa empu bekau tapa kaki nya.”
20“Aku meda bekau tapa kaki orang lelaki, indu enggau anak mit,” pia ku raja. 21Iya ringat amat, lalu ngasuh bala imam enggau bini anak sida ditangkap lalu dibai ngagai iya. Sida nunjukka iya jalai ti dipelalai, ditengah sida masuk ngambi pemakai ti dengkah ba mija rumah sembiang. 22Bala imam diukum bunuh. Raja nyerahka engkeramba Bel ngagai Daniel, lalu iya ngerusak engkeramba nya sereta ngerubuh rumah sembiang Bel.
Daniel Munuh Naga
23Lebuh maiya nya bisi siku naga besai ti disembah orang Babilon. 24Nyadi sekali raja bejaku enggau Daniel, “Nuan enda ulih madahka aku iya nya petara tu enda idup. Nya alai sembah meh iya!”
25“Aku nyembah Tuhan,” saut Daniel. “Iya siku aja Allah Taala ti idup. 26Enti nuan, raja, meri pemendar, aku deka munuh naga nuan nya enda ngena pedang tauka pemalu.” “Aku ngemendarka nuan,” saut raja.
27Udah nya Daniel ngambi getah liat, lanyih jelu, enggau bulu buk lalu dipanduk begulai. Iya ngagai roti ari utai ti dichampur iya kena nyapi naga. Udah naga makai utai nya, tubuh iya kembai, lalu perut iya pambus. “Nya meh gamal utai ke disembah kita bansa Babilon,” ku Daniel.
28Lebuh orang Babilon ninga berita utai ti udah nyadi, sida mandangka pengeringat diri ngagai raja. “Raja udah nyadi orang Judah,” ku sida manjung. “Terubah, iya ngerusak Bel, udah nya, iya munuh bala imam. Lalu diatu iya munuh naga kitai.” 29Sida ngagai raja lalu ngasuh iya nyerahka Daniel ngagai sida. Sida nangkan raja, “Enti nuan enggai, kami munuh nuan enggau kita menyanak.”
30Lebuh raja meda sida deka ngamatka jaku, iya dipejal nyerahka Daniel ngagai sida. 31Orang muai Daniel ke dalam lubang remaung lalu ninggal iya dia pengelama enam hari. 32Dia bisi tujuh iku remaung. Sida selalu diberi makai dua iku mensia enggau dua iku kambin biri tiap hari. Tang dalam kandang enam hari, sida enda diberi makai kena nentuka Daniel dempa sida.
Daniel Diselamatka Ari Lubang Remaung.
33Lebuh maya nya Nabi Habakuk bisi di menua Judah. Iya udah manduk lauk bekuah lalu nabakka roti dalam nya. Iya mai utai ti dipanduk nya ngagai bala orang ke ngetau di umai. 34Maya nya bisi melikat Tuhan bejaku enggau Habakuk, “Ambi pemakai ti dibai nuan nya, lalu beri ngagai Daniel dalam lubang remaung di Babilon.”
35Habakuk nyaut “Tuan, aku enda kala ke Babilon lalu aku enda nemu dini endur lubang remaung.”
36Melikat megai buk iya, lalu mai iya terebai ngagai Babilon sebaka enggau pengelaju ribut. Melikat ngengkahka iya semak lubang remaung. 37Habakkuk ngangau “Daniel! Daniel!” Tuhan bisi nganjungka nuan pemakai. Tu iya, ambi.”
38Lebuh Daniel ninga Habakkuk, iya besembiang, “Tuhan, Nuan ingatka aku. Nuan enda kala ngelengkaka orang ke rinduka Nuan.” 39Iya angkat lalu makai pemakai nya. Melikat Allah Taala lalu mai Habakkuk pulai ke rumah iya.
40Tujuh hari udah Daniel dibuai ke dalam lubang remaung, raja nurun kia laban deka ngulitka pemarai Daniel. Lebuh iya datai dia, iya nilik ke dalam lubang remaung, lalu tepedaka Daniel duduk dia. 41Raja nyerauh, “Oh Tuhan, Allah Taala Daniel, Nuan pemadu besai, nuan siku aja ti Tuhan.” 42Iya narit Daniel pansut ari lubang remaung lalu ngasuh sida ke deka munuh Daniel dibuai ke dalam lubang nya. Sida lalu dempa remaung tekala nya, ditengkilaka raja.
Currently Selected:
Bel enggau Naga 1: BK
Highlight
Share
Copy
Want to have your highlights saved across all your devices? Sign up or sign in
Hakcipta © 2011, The Bible Society of Malaysia
Copyright © 2011, The Bible Society of Malaysia