ESTER 1
1
Datu baine Wasti disuale pala’
1:1-22
1Iatonna linona Ahasweros, iamotu Ahasweros, tu umparenta saratu’ duangpulo mpitu propinsi, randuk dio India sae lako Etiopia,
2attu iato unnisungmi tu datu Ahasweros dao isungan kapayunganna lan kota benteng Susan.
3Iatonna taun ma’pentallun kadatuanna, napadenammi datu pa’maruasan tu mintu’ arungna sia to mase’ponna; iatu pangulu surodadunna Persia sia Media sia to mala’bi’ sia iatu mai arungna propinsi ma’dio ren nasang dio olona datu.
4Napa’petiroammi datu tu kasugiran sia kamala’biran kadatuanna sia kamaballoan kapuanna kabarre-alloan ba’tu sangapa-apa masainna, iamotu saratu’ karua pulona allona.
5Iatonna upu’mo tu allo iato, napogauran pole’omi datu misa’ pa’maruasan tu mintu’ to buda, lan kota benteng Susan, la to kapua la to bitti’ lan pitung allo dio to’ tarampak pa’lakna tongkonan layuk.
6Kulambu lenang, wol sia sampin lango-lango dipori ulang lenang sia sampin lango-lango makaseda, tu dipale’ke’ dio kapukan salaka, tu dio lentong marmar mabusa; na ba’tu pira-pira inan mamma’ bulaan sia salaka dipatorro diong sali marmar maido sia marmar mabusa, sia batu mattiarra sia batu sanda rupanna.
7Napatamami irusan bulaan tau tu apa dipa’pairusan, pantan sisengaran rupanna, na iatu uai anggoro’na datu sebo tongan, susi tu nasanga tau datu manna sipatu umpogau’i.
8Iake mangiru’i tu tau dipopa’elo’na bang; belanna susimo napamanassa datu to lako to mase’ponna tu lan tongkonan layukna, kumua la naeloran bang pantan la urrundu’ lalan penaanna tu mai tau.
9Ia duka tu Wasti, datu baine, umpogauran pa’maruasan mintu’ baine lan tongkonan layukna datu Ahasweros.
10Iatonna allo ma’pempitu, parannumi tu penaanna datu napobua’ anggoro’, anna mesua lako Mehuman, Bizta, Harbona, Bigta, Abagta, Zetar na Karkas, pitui tu to mase’ponna datu, tu umparakai datu Ahasweros,
11kumua anna solanni tu Wasti, datu baine sae umpennoloi datu, ma’makota kadatuan, la umpa’pekitananni tu kamaballoanna lako mintu’ bangsa sia mintu’ arung, belanna ia misa’ to melo garaganna.
12Apa mengkailing tu Wasti, datu baine, unturu’ parentana datu la sae mennolo, susitu naparampoanni to mase’ponna datu. Attu iato liu ara’mi tu datu na iatu kasengkeanna dukku-dukku tongan.
13Ma’kadami tu datu lako mintu’ to paissan tu unnissanni tu attunna, belanna susimoto tu kabiasan la umparampo a’ganna datu lako to untandai atoran sia salunna.
14Iatu to naporengke’ kale datu, iamotu Karsena, Setar, Admata, Tarsis, Meres, Marsena na Memukan, pitu arung to Persia sia to Media, tu umpennoloi datu sia tu untorroi pangka’ mala’bi’ tongan lan kadatuan:
15Apara sipatu dipogau’ unturu’ atoran lako Wasti, datu baine, belanna tae’ naturu’i tu parentana datu Ahasweros, tu naparampoanni to mase’ponna datu?
16Ma’kadami tu Memukan dio olona datu sia iatu mintu’ arung, nakua: Iatu Wasti, datu baine, salamo, tae’ nalako manna datu, sangadinna lako mintu’ arung sia mintu’ bangsa, tu ma’tondok lan mintu’ propinsi, parentana datu Ahasweros.
17Belanna iatu gau’na datu baine iate la kaleleammo lako mintu’ baine, naurungan sayuammo tu mai muanena dio pentirona, ke ma’kadai tu tau nakua: Napa’parentan datu Ahasweros tu Wasti, datu baine, la umpennoloi, apa tae’ nasae.
18Randuk allo iate iatu mintu’ bainena arung to Persia, sia to Media, ke narangii tu gau’na datu baine iato, manassa la ma’kada susite lako mintu’ arungna puangku, naurungan tang dipura tu kadibe’sean sia kasengkean.
19Iamoto iake napasiolai puangku, la tassu’ tu misa’ parenta dio mai olona puangku, anna disura’ tu parenta iato lan atoran to Persia sia to Media, tu tang ma’din diriu’ sule, kumua iatu Wasti tae’mo nama’din umpennoloi datu Ahasweros sia iatu kamala’biranna la napa’kamasean puangku lako to senga’, tu mandu melo na ia.
20Iake kaleleammi tu parenta, tu napatassu’ datu, lan mintu’ kadatuanna puangku, – manassa kalelean tu kamalonaranna parentana puangku – dadi iatu mintu’ baine la umpakala’bi’ muanena, randuk dio mai to kapua sae lako to bitti’.
21Nasangamo datu sola mintu’ arung melomote pa’timbangan iate, napogau’mi datu susitu pa’timbanganna Memukan.
22Napakatumi tu ba’tu pira-pira sura’ lako mintu’ propinsinna datu, lako simisa’-misa’ propinsi unturu’ passura’na sia lako mintu’ bangsa, lako simisa’-misa’ bangsa, pantan basana kalena, kumua sipatu simisa’-misa’ muane iamo puang lan banuanna sia ma’kada unturu’ kadanna bangsana.
Currently Selected:
ESTER 1: SDA
Highlight
Share
Copy
Want to have your highlights saved across all your devices? Sign up or sign in
Sura' Madatu, Toraja Bible 2009® © Indonesian Bible Society – Lembaga Alkitab Indonesia, 2009