Yuhanná 1
1
Gál ensán but
1Cha azalá, Gál#1:1 Gál, bezán habar, kalamah, labz. hastat. Gál gón Hodáyá gón at o Gál, Hodáay jend at. 2Cha azalá, Gál gón Hodáyá at. 3Hodáyá sajjahén chizz cha Gálay wasilahá jórh kortant o cha é jórh butagénán, bé Gálá hecch chizzé jórh nabut. 4Zenday sarchammag Gál at o zend mardománi nur o rozhn at. 5Rozhn tahárókiá drapshit#1:5 Drapshag, bezán shahm janag, jalashkag. o taháróki hechbar rozhnay sará báládast nabutag#1:5 Yá: taháróki hechbar rozhná sarpad nabutag..
6Yahyá námén mardé hastat. Hodáyá ráh dátagat. 7Á átk ke sháhed bebit o pa hamé rozhná gwáhi bedant, tánke sajjahén mardom cha áiay gwáhiá imán byárant. 8Á wat hamá rozhn naat bale átk ke pa rozhná gwáhi bedant. 9Hamá rástén rozhn ke pa sajjahén mardomán rozhnáia kárit, nun jaháná pédák at. 10Á jaháná at o Hodáyá jahán cha hamáiay wasilahá jórh kortagat, bale jaháná á pajjáh nayáwort. 11Á wati mahlukay nyámá#1:11 Nyámá, bezán myáná, darnyámá, tahá, tóká. átk o mahluká á namannet. 12Bale hamá mardomán ke mannet o áiay námay sará imán áwort, áiá á mardom hakk o ehtiár#1:12 Ehtiár, bezán masteri, kodrat, zór. dátant ke Hodáay chokk bebant. 13Á, na cha hóná pédá butant o na cha jesmi wáhag#1:13 Wáhag, bezán lóth, talab, hájat. o ensáni lóthán, á cha Hodáyá pédá butant.
14Gál ensán but o may nyámá jágahi kort. Má áiay shán o shawkat dist, hamá shán o shawkat ke Petay yakkén Chokkayg ent, hamá Chokk ke cha rahmat o rástiá sarréch ent. 15Yahyá áiay bárawá gwáhia dant, kukkára kant o gwashit: “Esh ent hamá kas ke áiay bárawá man gwashtag ke cha man o randa kayt. Á cha man master o démáter ent, chéá ke cha man pésar hast butag.” 16Má sajjahénán cha áiay pormehrén rahmatay sawgátá modám barkat geptag. 17É rást ent ke Sharyat cha Mussáay wasilahá bakshag butag, bale rahmat o rásti cha Issá Masihay wasilahá átk. 18Kassá hechbar Hodá nadistag, bale hamá yakdánagén Chokk ke Petay bagalá ent, hamáiá Hodá pajjáréntag.
Pákshódi dayókén Yahyáay gwáhi
19-20Wahdé Urshalimay shahray Yahudián wati lahtén dini péshwá o Láwi kabilahay mardom Yahyáay kerrá rawán dát ke jost begerant: “Taw kay ay?” Áiá enkár nakort, tachk o pa rásti gwáhi dát o gwashti: “Man Masih naán.” 21Áyán jost kort: “Taw Elyás ay?” Gwashti: “Na.” Gwashtesh: “Gorhá taw hamá wádah dátagén Nabi ay?” Gwashti: “Na.” 22Jostesh kort: “Taw kay ay? Má báyad ent pa wati rawán dayókán passawé#1:22 Passaw, bezán jwáb. bebarén. Wati bárawá ché gwashay?” 23Áiá cha Eshayá nabiay kawlá gwasht: “Man hamáiay tawár án ke gyábáná kukkára kant o gwashit, pa Hodáwandá ráhá tachk o hamwár kanét.”#1:23 Eshayá Nabiay Ketáb 40:3.
24Cha é rawán dátagén kásedán lahtén Parisi atant. 25Jostesh kort: “Agan taw na Masih ay o na Elyás ay o na hamá nabi, gorhá parchá pákshódia#1:25 Pákshódiay labz, Yunáni zobáná “baptismah” gwashaga bit o eshiay máná “ápá bokk dayag” yá “gón ápá shódag” ent. dayay?” 26Yahyáyá áyáni passawá gwasht: “Man gón ápá pákshódia dayán, bale yakké shomay nyámá pád átkag ke shomá áiá nazánét. 27Á cha man o randa kayt o man áiay kawshbandáni#1:27 Kawshband, bezán swásband, swásay band. bójagay láhek ham naán.” 28É kár Ordonay kawray á dastá, Bayt-Anyáyá but, hamá jágahá ke Yahyáyá mardom pákshódia dátant.
Hodáay Gwarándh
29Domi róchá, wahdé Yahyáyá dist ke Issá dém pa man pédák ent, gwashti: “Bechárét! Esh ent Hodáay hamá Gwarándh ke jahánay gonáhána shódit o dura kant. 30Esh ent hamá kas ke eshiay bárawá man gwashtag ke cha man o randa kayt bale cha man master o démáter ent, chéá ke cha man pésará hast butag. 31Man wat pajjáh nayáwort, bale paméshká átkán o gón ápá mardomán pákshódi dayagá án ke é mardom pa Bani Esráiliáni záher kanag bebit.”
32Nun Yahyáyá wati gwáhi é paymá dát: “Man Hodáay Pákén Ruh#1:32 Hodáay Pákén Ruh, bezán Ruholkodos. dist ke kapótéay dróshomá#1:32 Dróshom, bezán shekl, surat. cha ásmáná ér átk o áiay sará nesht. 33Man á nazánt, bale hamá ke maná rawáni dát ke gón ápá pákshódi bedayán, hamáiá maná gwashtagat ke wahdé taw dist ke Pákén Ruh kaséay sará ér átk o nesht, bezán á hamá kas ent ke gón Pákén Ruhá pákshódia dant. 34Man é chizz distag o gwáhia dayán ke á Hodáay Chokk ent.”
Issáay awali morid
35É dega róchá, Yahyá padá gón wati do moridá óshtátagat. 36Wahdé Yahyáyá Issá dist ke cha ódá gwazagá ent, gwashti: “Esh ent Hodáay Gwarándh.” 37Doén moridán é habar eshkot o Issáay randá rawán butant. 38Issáyá chakk tarrént o har doéni distant ke mani randá kaptagant. Josti kort: “Shomá ché lóthét?” Gwashtesh: “Rabbi! (Bezán: Oo ostád!) Taw kojá neshtagay?” 39Gwashti: “Byáét o bechárét.” Gorhá doén gón Issáyá átkant o distesh ke kojá neshtag o á róchesh gón áiá gwázént. Bégáhay wahd at.#1:39 Asligén Yunáni nebeshtánka gwashit: “dahomi sáhat”, bezán bégáhay chárá. Yahudiáni róchay hesáb, sohbay sáhat shashá bongéja but.
40É doén mardom ke Yahyáay habaráni eshkonagá rand Issáay randá kapt o shotant, cha eshán yakké Shamun-Petrosay brát Andriás at. 41Áiá awali káré ke kort, esh at ke wati brát Shamunay kerrá shot o gwashti: “Má Masih dar gétkag.” 42Randá Shamuni Issáay kerrá bort. Issáyá Shamun cháret o gwashti: “Taw Shamun ay, Yuhannáay chokk. Bale nun tai nám Képá bit.” Képáay máná Petros#1:42 “Képá” Aramái zobáná o “petros” Yunáni zobáná dhóká gwashant. ent.
Pilipos o Natnáil
43É dega róchá, wahdé Issáyá erádah kort ke Jalilay damagá#1:43 Damag, bezán hand, elákah, ostán, subah. rawán, Piliposi dar gétk o gwashti: “Bya, mani randgiriá bekan.” 44Pilipos ham, Andriás o Petrosay dhawlá, Bayt-Saydáay shahray mardomé at. 45Pilipos Natnáilay kerrá shot o gwashti: “Má hamá kas dar gétkag ke Mussáyá Tawrátay tahá áiay bárawá nebeshtah kortag o á dega nabián ham áiay bárawá nebeshtah kortag. Á, Issá Náseri ent, Issopay chokk.” 46Natnáilá gwasht: “Cha Náserahay shahrá ham sharrén chizzé dar kapta kant?” Piliposá gwasht: “Byá o bechár!”
47Wahdé Issáyá Natnáil dist ke á dém pa man pédák ent, gwashti: “É tachkén Bani Esráilié o eshiay delá hecch paymén repk o honar mán nést.” 48Natnáilá jost kort: “Taw maná chóna zánay?” Issáyá áiay passawá gwasht: “Cha hamá wahdá pésar ke Piliposá tará tawár kort, man tará hamá wahdá dist ke enjiray drachkay chérá atay.” 49Natnáilá gwasht: “Oo ostád! Taw Hodáay Chokk ay, taw Esráilay bádsháh ay.” 50Issáyá gwasht: “Taw paméshká imán áwort ke man gwasht ke tará enjiray drachkay chérá distagon. Bale cha é chizzán masteréna genday.”
51Issáyá gwasht: “Shomárá rásténa gwashán, démterá shomá gendét ke ásmán pacha bit o Hodáay préshtag cha Ensánay Chokkay#1:51 Dányál nabiá “Ensánay Chokk” pa anchén hastiéá kármarz kortag ke cha ásmáná éra kayt. Issáyá watá “Ensánay Chokk” gwashtag tánke mardom bezánant ke á cha ásmáná átkag o hamá wádah dátagén Masih ent. ráhá sara kapant o éra kapant.”
Currently Selected:
Yuhanná 1: HPKB
Highlight
Share
Copy
Want to have your highlights saved across all your devices? Sign up or sign in
© 2015-2022, Wycliffe Bible Translators, Inc. and the Balochi Bible Translation Team. All rights reserved.