हितोपदेश 31
31
जुजुयात ब्यूगु सल्लाह
1थ्व मस्साया जुजु
लमूएलयात कनातःगु
उपदेश वया मामं स्यनातःगु
उपदेश खः –
2हे जिमि काय्!
जि न्हापांम्ह काय्!
जिं भाकल यानाः दुम्ह काय्!
3थःगु तागत मिसातय्गु निंतिं
फुके मते,
सुनां जुजुतय्त पतन याइ।
4हे लमूएल!
जुजुतय्सं दाखमद्य त्वनाः
जुइ मज्यू,
शासकतय्सं अय्लाः
त्वनेत नसु चाये मज्यू।
5मखुसा इमिसं न्याय
कानूनया खँ ल्वःमंकी,
अले क्वत्यय्काः च्वनेमाःपिन्त
न्याय बीगु ल्वःमंकी।
6अय्लाः धयागु ला दुःखं कयाः
सीत्यंपिनिगु निंतिं खः,
अले नुगः मछिंपिनिगु निंतिं खः।
7इमिसं त्वनाः
थःगु दुःख ल्वःमंकी,
अले नुगः मछिंगु तंकी।
8नवाये मफुपिनिगु निंतिं
नवानाब्यु,
हाःनाः मदुपिनिगु निंतिं
न्याय यानाब्यु।
9चीमि व हाःनाः मदुपिनिगु
न्यायया निंतिं सः ल्ह्वँ,
अले इमिगु रक्षा या।
भिंम्ह कलाः
10धात्थें भिंम्ह कलाः सुयात दइ?
व ला हिरा मोती स्वयाः मू वं।
11वया भाःतं वयात दुनुगलं
विश्वास याइ,
अले वयात मगाःमचाः धयागु
छुं दइ मखु।
12जिवंकाछि वं थः भाःतयागु
भिं जक याइ,
गुबलें छुं स्यंकी मखु।
13वं ऊन व सूती कापः मुंकाः
थःम्हं हे थानाः
गुबलें सुम्क च्वनी मखु।
14वं ब्यापारीतय् जहाज थें
तापाकंनिसें थःगु नसा हइ।
15व सुथ न्हापां दनी।
अले थः छेँजःपिनिगु निंतिं
नसात्वँसा दय्की।
अले च्यः भ्वातिंतय्त
ज्या इनाबी।
16वं थःम्हं मुंकूगु धिबां
बांलाःगु बुँ मालाः न्याइ।
अले दाख पी।
17वं तसकं मेहनत यानाः
ज्या याइ,
थःगु ज्या यायेत
वया लप्पा बल्लाः।
18वं थःगु ज्याया मू बांलाक थू,
अले चान्हय् तक नं
वं ज्या यानाच्वनी।
19वं थःम्हं हे कपाय् फ्यनी,
कापः थाइ।
20वं चीमि व हाःनाःमदुपिन्त
नुगः चक्कंकाः
ग्वाहालि याइ।
21च्वापु गाःसां
वयात छुं धन्दा मदु।
छाय्धाःसा वया छेँ च्वंपिं
सकसिगु निंतिं
गाक्क लुमुगु वसः दु।
22थःगु लासाफांगा
वं थःम्हं हे दय्की,
अले भिंगु सुति
कापःयागु वसः पुनी।
23वया भाःतयात
शहरया तःधंपिं मनूत मध्ये
छम्ह धकाः
सकसिनं म्हसीकी।
24वं कापः थानाः
बन्जाःतय्थाय् मीयंकी।
25व गछे दुम्ह
व सकसिनं हनाबना
तय्काच्वंम्ह खः।
कन्हय्या वयात धन्दा मदु।
26वयागु खँ बुद्धिं जाः।
वयागु म्हुतुइ न्ह्याबलें
भिंगु सल्लाह दयाच्वनी।
27वं थः छेँजःपिनिगु
बांलाक सुसाःकुसाः याइ,
भचा हे उसि चाइ मखु।
28वया मस्तय्सं
वयात सुवाः बी,
वया भाःतं नं
वयात च्वछायाः धाइ,
29“यक्व मिसातय्सं
बाबांलाःगु ज्या याःगु दु,
तर छं इपिं सकसितं त्याकूगु दु।”
30हिसिं झंगः लाये यः,
बांलाः ब्वयावनी।
तर परमप्रभुया भय काइम्ह
मिसा तःधंके बहः जू।
31वयागु मेहनतयागु सिरपाः
वयात ब्यु।
वं याःगु ज्याया निंतिं
सकसियां न्ह्यःने
वयात तःधंकि।
Currently Selected:
हितोपदेश 31: NEW
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.