Juan 1
1
Jesús na pꞌekꞌau eujãdee cheda
1Na pꞌekꞌau eujã bai naaweda Jesucristo, Tachi Akꞌõre Pedee apata, bapachi. Mãgɨ́ bapachi Tachi Akꞌõre ome. Iru ichita Tachi Akꞌõre bapari. 2Tachi Akꞌõre ome bapachi. 3Iru kꞌapꞌɨa pari Tachi Akꞌõrepa ne–inaa jõmaweda ooji. Iru wẽe Tachi Akꞌõrepa ne–inaa maarepida oo–e paji. 4Irua chokꞌai bapipachi ne–inaa jõmaweda chokꞌai bɨ. Ɨ̃daa pɨkꞌa bapachi eperãarã tꞌãide, ma kꞌaurepa eperãarãpa Tachi Akꞌõre kꞌawapataadamerã. 5Atꞌãri irua Tachi Akꞌõre kꞌawapimaa bɨ eperãarãmaa. Apidaapa pꞌoyaa jarada–e irua mãga oonaamerã.
6Bapachi eperã, tꞌɨ̃jarapatapꞌedaa Juan Bautista.#1.6 Griego pedeede: Juan, chi eperãarã poro choopari. 7Tachi Akꞌõrepa mãgɨ́ eperã jɨrɨtꞌeraji jaramerã ma ɨ̃daa pɨkꞌa bɨde, jõmaarãpa Akꞌõrede ijãadamerã ma jarateeda kꞌaurepa. 8Juan ɨ̃daa pɨkꞌa ba–e paji. Jĩpꞌa cheji jarateede 9ma wãara ɨ̃daa pɨkꞌa bɨ na pꞌekꞌau eujãdee cheji, Tachi Akꞌõre eperãarãmaa kꞌawapiitꞌee.
10Mãgɨ́ Pedee, Jesucristo ba cheji na pꞌekꞌau eujãde, ichia eujã oodade. Mamĩda na pꞌekꞌau eujãdepemaarãpa kꞌawada–e paji iru Tachi Akꞌõre Warra. 11Cheji mĩda ichi aukꞌaarã tꞌãide, ãchia auteebaida–e paji. 12Mamĩda eperãarã ũkꞌuruurãpa iru auteebaijida mãikꞌaapa wãara irude ijãajida. Irua mãgɨɨrã Tachi Akꞌõre warrarã papiji. 13Tachi Akꞌõre warrarã mãgá padaitꞌee, mãgɨ́ eperãarã tꞌoda–e paji warra jĩpꞌaarã tꞌopatakꞌa, eperãpa warra oo kꞌinia ooparikꞌa. Ma kꞌãyaara Tachi Akꞌõrépata mãgɨɨrã ichi warrarã papiji, irude ijãa pꞌaneedapꞌedaa perã.
14Mãgɨ́ Pedee, Jesucristo Tachi Akꞌõrepa pëida. Tꞌoji eperã kꞌapꞌɨade mãikꞌaapa tachi tꞌãide bapachi. Iru Tachi Akꞌõre Warra pada perã, Tachi Akꞌõre kꞌĩra wãree unupiji tachimaa. Eperãarã kꞌinia iru bapachi mãikꞌaapa Tachi Akꞌõre wãarata ãchimaa kꞌawapipachi.
15Juan Bautistapa kꞌawaji mãgɨ́ Pedee Tachi Akꞌõrepa pëida. Mapa jarapachi:
—Nãgɨde mɨa jara baji jarakꞌãri eperã mɨ tꞌẽepai cheru mɨ kꞌãyaara waibɨara bɨ, mɨ tꞌoi naaweda iru bapachi perã.
16Ma eperã tꞌãri pia bapari tachi jõmaarã ome mãikꞌaapa tachi ichita kꞌaripapari. 17Tachi Akꞌõrepa ichi ũraa kꞌawapiji eperãarãmaa Moisés kꞌapꞌɨa pari. Mamĩda eperãarã kꞌinia iru baji mãikꞌaapa ichi wãarata kꞌawapiji ãramaa Jesucristo kꞌapꞌɨa pari. 18Eperã apidaapa Tachi Akꞌõre unudakꞌaa. Mamĩda Jesucristo, iru Warra apai iru bɨ, iru ome aukꞌa bairã, iru eperãarãmaa kꞌawapiji.
Juan Bautistapa Jesucristode jarada
(Mateo 3.11-12; Marcos 1.7-8; Lucas 3.15-17)
19Judiorã poroorãpa Jerusalendeepa pëijida pꞌaareerã Leví ëreerãdepemaarã ome, mãɨrãpa Juanmaa iididamerã:
—¿Pɨ kꞌaima? ajida.
20Juan Bautistapa wãarata pꞌanauji:
—Mɨ Tachi Akꞌõrepa pëida–epɨ, eperãarã rey pamerã.
21Mãpai iidijida:
—Mãgara, ¿pɨ Tachi Akꞌõre pedee jarapari Eliakꞌã? ajida.
—Mãga–eda aji.
Mamĩda waya iidijida:
—¿Pɨ Tachi Akꞌõre pedee jaraparikꞌã ajida, tachia nɨ pꞌanɨ?
—Mãga–eda aji.
22Mãpai mãgajida:
—Mãgara, ¿pɨ kꞌaima? Jarapáde ajida. Tai pëidapꞌedaarãmaa jaranadaitꞌee. ¿Kꞌãata jara pëiitꞌeema? ajida.
23Juanpa pꞌanauji Tachi Akꞌõre pedee jarapari Isaíapa#1.23 Pꞌãji Jesucristo cheitꞌee bɨ Tachi Akꞌõrede ijãapataarã o kꞌachiadeepa kꞌaripa atade. chonaarãweda pꞌãdade jara bɨkꞌa:
—Mɨ ni eujã pania wẽe bɨde mãikꞌaapa bia bɨ:
‘O pi–ia oopatakꞌa poro waibɨa chei naaweda, mãga pɨkꞌa pꞌekꞌau kꞌachia oo amáatɨ Tachi Waibɨa chei naaweda.’ (Isaías 40.3)
24Ma fariseorãpa pëidapꞌedaarãpa 25Juanmaa iidijida:
—Pɨ Tachi Akꞌõrepa pëida–e pɨrã eperãarã rey pamerã, Elia–e pɨrã wa Tachi Akꞌõre pedee jarapari–e pɨrã, ¿kꞌãare–itꞌee eperãarã poro chooparima? ajida.
26Juanpa mãgaji:
—Mɨa parã poro choopari paniapa. Mamĩda pãchi tꞌãide bɨda aji, awaraa eperã, parãpa kꞌawada–e pꞌanɨ. 27Mãgɨ́ mɨ tꞌẽepai parãmaa jaratee cheru. Iru mɨ kꞌãyaara waibɨara bɨ. Mɨa iru chancla jida ẽraikꞌaraa bɨda aji, mɨ iru kꞌãyaara ekꞌariara bairã.
28Mãga pꞌasaji Betania pꞌuurude Jordán to kꞌĩraikꞌa eere, Juanpa poro choomaa badamãi.
Jesús Tachi Akꞌõrepa pëida eperãarã pari piumerã
29Aɨ norema Juanpa unukꞌãri Jesús ichi kꞌaitꞌa cheru, mãgaji:
—¡Akꞌɨ́tɨ! Nãgɨ́ eperã oveja chakꞌekꞌa bɨ, Tachi Akꞌõrepa pëida perã piumerã eperãarã pari. Nãgɨpa wẽpapiitꞌee eperãarãpa pꞌekꞌau kꞌachia oopata. 30Nãgɨ́ eperãde mɨa pedee baji nãga jarakꞌãri: “Eperã mɨ tꞌẽepai cheru mɨ kꞌãyaara waibɨara bɨ, iru mɨ tꞌoi naaweda bapachi perã.” 31Aɨ naaweda mɨa pida kꞌawa–e baji iru Tachi Akꞌõrepa pëida tachi kꞌaripamerã. Mamĩda ma–itꞌee mɨa eperãarã poro choo cheji; mãgá Israel pidaarãpa iru kꞌawadamerã.
32Mãpai Juanpa jaraji ichia unuda:
—Mɨa Tachi Akꞌõre Jaure unuji iru ɨ̃rɨ palomakꞌa baai chekꞌãri. 33Mɨa kꞌawa–e bakꞌaji iru Tachi Akꞌõre Warra. Mamĩda aɨ naaweda mɨ pëidapa eperãarã paniapa poro choomerã, mɨmaa jaraji: “Pɨa unuitꞌeeda aji, mɨ Jaure baai cheru eperã ɨ̃rɨ, ichita iru ome bapariitꞌee. Mãgɨ́ eperãpa mɨ Jaure ba chepiitꞌeeda aji, eperãarã ome.” 34Tachi Akꞌõrepa jaradakꞌa mɨa mãga unuji. Maperãpɨ mɨa parãmaa jara bɨ: Nãgɨ́ Jesús, Tachi Akꞌõre Warra.
Jesús ome nipapatapꞌedaarã
35Aɨ norema Juan Bautista waya mama baji chi kꞌõpꞌãyoorã omeerã ome. 36Jesús wãyaa wã unukꞌãri, mãgaji:
—¡Akꞌɨ́tɨ! Jãgɨta chi oveja chakꞌekꞌa bɨ, Tachi Akꞌõrepa pëida.
37Chi kꞌõpꞌãyo omeerãpa mãga ũridakꞌãri, Jesús tꞌẽe wãjida. 38Jesús ãpɨtee pꞌɨrrabaikꞌãri, unuji ichi tꞌẽe cheruta mãikꞌaapa mãgaji:
—¿Kꞌãata kꞌinia pꞌanɨma? aji.
Mãgajida:
—Rabuni (jara kꞌinia bɨ Tachi Jarateepari), ¿pɨ, sãma baparima? ajida.
39Jesupa pꞌanauji:
—Chétɨ kꞌawaadamerã.
Mãgá wãjida iru baparimaa mãikꞌaapa ma ewate pꞌaneejida iru ome kꞌewara las cuatro pada perã.
40Kꞌõpꞌãyo abaapa Juan pedee ũrida mãikꞌaapa Jesús tꞌẽe wãda Andrés paji. Iru Simón Pedro ɨ̃pema paji. 41Mãgɨ́ Jesús ome bapꞌeda, ne–inaa awaraa ooi naaweda, isapai wãji chi ɨ̃pema jɨrɨde. Unu atakꞌãri, mãgaji:
—Mesías unujidada aji. (Mãgɨ́ tꞌɨ̃ jara kꞌinia bɨ Cristo, Tachi Akꞌõrepa pëida eperãarã rey pamerã.)
42Mãpai Andrepa chi ɨ̃pema aneeji Jesumaa. Jesupa iru unukꞌãri, mãgaji:
—Pɨ Simón, Juan warra. Mamĩda pɨ tꞌɨ̃jaradaitꞌeeda aji, Cefas.#1.42 Arameo pedeede Cefas jara kꞌinia bɨ mãu. Griego pedeede Pedro ichiaba jara kꞌinia bɨ mãu. (Mãgɨ́ tꞌɨ̃ griego pedeede jara kꞌinia bɨ Pedro.)
Jesupa Felipe Natanael ome jɨrɨtꞌerada
43Aɨ norema Jesús wãji Galilea eujãdee. Mama unuji eperã tꞌɨ̃jarapatapꞌedaa Felipe. Mãpai mãgaji:
—Mɨ ome nipaparíiji.
44Mãgɨ́ Felipe, Andrés mãikꞌaapa Pedro Betsaida pꞌuurudepemaarã paji. 45Felipepa Natanael jɨrɨnaji mãikꞌaapa unu atakꞌãri, mãgaji:
—Unujidada aji, eperã Moisepa jarada Tachi Akꞌõre Ũraa pꞌãdade. Mãgɨ́ ichiaba Tachi Akꞌõre pedee jarapataarãpa chonaarãweda ãchi pꞌãdapꞌedaade jaradapꞌedaa. Mãgɨ́ eperã José warra; tꞌɨ̃jarapata Jesús Nazaretdepema.
46Natanaelpa mãgaji:
—¡Nazaretdepema! ¿Nazaret pꞌuurudeepa eperã pia uchiaikꞌã? aji.
Felipepa mãgaji:
—Wãdáma aji, akꞌɨde.
47Jesupa Natanael ichi kꞌaitꞌa cheru unukꞌãri, mãgaji:
—Na Israel pida wãara tꞌãri pia bapari. Apida kꞌũrakꞌaa.
48Natanaelpa Jesumaa iidiji:
—¿Sãga pɨa mɨ kꞌawa bɨma? aji.
Jesupa pꞌanauji:
—Felipepa pɨ atanai naaweda, mɨa pɨ unuji higuera kꞌarra ekꞌari.
49Mãpai Natanaelpa mãgaji:
—Tachi Jarateepari, pɨ Tachi Akꞌõre Warra. Pɨ Israel pidaarã Rey, chi cheitꞌee bada.
50Jesupa mãgaji:
—¿Ijãa bɨ–ekꞌã aji, mɨa jarada perã pɨ unuji ma pakꞌuru ekꞌari? Pɨa unuitꞌee ne–inaa awara ma kꞌãyaara pi–iara. 51Mɨa wãarata jararu. Parãpa unudaitꞌee Tachi Akꞌõre eujã ewaraa kꞌobɨ mãikꞌaapa angeleerã ɨtꞌaa wãruta mãikꞌaapa edaa cheruta mɨ, chi Eperã Akꞌõre Truadepema,#1.51 Chi Eperã Akꞌõre Truadepema jara kꞌinia bɨ Tachi Akꞌõre mimiapari na pꞌekꞌau eujãdee cheda. Jesucristopa ichi nãga tꞌɨ̃jaraji akꞌɨpiitꞌee ichi Mesías. kꞌaripade.
Currently Selected:
Juan 1: sjaB
Highlight
Share
Copy
Want to have your highlights saved across all your devices? Sign up or sign in
©2005, 2010, 2015 Wycliffe Bible Translators, Inc. All rights reserved.