RUM 1
1
1Surat iteu' jin akeu' Paulus éh kelunan sohoo' Kristus Yésus, akeu' pu'un kevéléé' Allah ngan tenebai Néh dokoo' ké' lawah Néh ngan perengah Rengah Jian. 2Rengah Jian inah lepah pejajii' Allah neu' kekat nabi éh bara' ha' Néh ngan kelunan sahau, pu'un éh senurat réh dalem surat Allah. 3La'ah rengah inah bara' tong Anak Néh Tuhan Yésus Kristus. Tong puku' Néh tong tana', inah éh jin Daud, 4bang poléng mu'un Iah Anak Allah, uban neu' penyukat éh ja'au, éh penyukat Sahéé' Ni'ai, Allah pebetéé' Éh jin patai Néh. 5Jin Kristus, Allah lepah mena' penika Néh ngan ké' iah tebai akeu' lawah Néh dokoo' mihin siget arong kelunan ngelan tong Iah ngan kivu Éh kepéh. 6Uban kenat ka'ah éh tong leboo' Rum kepéh, Allah pu'un tebai ka'ah dokoo' ka'ah omok anah Yésus Kristus.
7Kenat péh akeu' nyurat surat iteu' ngan kekat ka'ah éh pu'un tong leboo' Rum éh penika Allah ngan éh tenebai Néh dokoo' ka'ah omok anah nah kepéh. Akeu' sebayang keh dokoo' Allah Tamen uleu' ngan Tuhan Yésus Kristus mena' penika ngan pengepawah ngan keh.
Paulus sebayang bara' jian kenin ngan Allah
8La'ah éh bu'un-bu'un néh akeu' sebayang bara' jian kenin ngan Allah dalem ngaran Yésus Kristus uban kekat ka'ah pu'un petem dalem pengelan keh. Kenat péh uban kekat kelunan pah tipo tana' lepah menéng rengah tong pengelan keh tong Yésus. 9Allah jam akeu' sebayang ka'ah siget koléé', adang Allah jam akeu' sebayang ka'ah mu'un, bé' akeu' kenyo, Iah éh Allah éh kenelan ké' ngan ketem lo'ong kenin ké' avéé' ké' perengah Rengah Jian éh bara' tong Anak Néh. 10Akeu' sebayang menyat Allah hun néh lem pengeloo' Néh ku' angai hun iteu', jian Éh mukap jalan ngan ké' dokoo' ké' omok tuai nepah ka'ah hun iteu'. 11Gahang mu'un-mu'un kenin ké' juk tuai jam ka'ah dokoo' ké' omok tulat kepéh pengena' éh nena' Sahéé' Ni'ai éh pu'un ngan ké' ke' néh omok pepit kegahang keh kepéh. 12Inah éh dokoo' ka'ah ngan akeu' péh, pekua' pu'un reken kenin, ka'ah omok reken neu' pengelan ké' akeu' omok reken neu' pengelan ka'ah.
13 O kekat padéé' ké', mai keh seruh akeu' bé' pu'un pitah jalan tuai nepah ka'ah, pinaa' tenéh koléé' ké' lepah pitah jalan juk tuai tavin ka'ah bang meraran awah ku'. Akeu' juk tuai kenat jalan ké' omok mihin kuraa' usah jin belah ka'ah ngelan tong Tuhan, barei' irah éh lepah pu'un ngelan Tuhan jin belah kuraa' arong kelunan éh tengéé' pohoo' jin irah Yahudi nah rai. 14Bé' ku' omok bé' bara' ha' Tuhan ngan kekat-kekat kelunan, kenat péh ngan kelunan maren ngan irah éh adek ke' awah, ngan irah éh lepah tai sekulah bau péh, kenat péh ngan irah éh bé' pu'un sekulah. 15Gahang mu'un-mu'un kenin ké' juk bara' Rengah Jian ngan ka'ah éh mokoo' tong leboo' Rum siteu' kepéh.
Rengah Jian éh penyukat Allah
16 La'ah bé' akeu' menyaa' bara' Rengah Jian iteu', uban Rengah Jian iteu' inah éh penyukat Allah ke' Néh purip kekat kelunan éh ngelan tong Yésus, kenat péh irah Yahudi, kenat péh irah éh tengéé' pohoo'. 17 Uban dalem Rengah Jian inah, pu'un éh tojoo' jalan tong pengepemung kelunan ngan Allah ke' néh omok jian kepéh. Pu'un Allah maneu' éh jian kepéh neu' pengelan réh tong Iah awah, bé' éh neu' ineu'-ineu' éh neu' réh. Barei' ha' lem Surat Allah, ka' éh, Kelunan éh ngelan tong Allah, pengepemung néh ngan Allah omok jian kepéh, kelunan inah omok éh murip, ha' Néh.
Tong penyala' kekat kelunan
18Jin seruga Allah bara' kemerek Néh tong kekat arong penyala' ngan kesa'at kelunan, uban penyala' réh inah, mapat jalan réh bé' omok jam Allah. 19Pu'un Allah ngukum kelunan, uban ineu' éh omok kenejam réh tong Allah lepah kejam réh lenaa' éh, uban Allah tengéé' lepah pepoléng éh ngan réh. 20Na' péh Allah bé' ta'an kelunan, omok réh jam Iah pu'un penyukat pelinguh, ngan adang réh omok jam tong Tuhan Iah éh Tuhan mu'un. Omok réh jam éh kenat neu' kekat penyuai Néh éh jin bu'un tana' iteu'. Uban réh jam éh kenat, bé' réh omok bara', bé' mé' jam Éh. 21 Na' péh irah jam Allah pu'un penyukat kenat, bé' irah seva' Iah ngan bara' jian kenin ngan Néh, bé' irah kivu Iah, irah suwok kenin awah, bé' réh jam seruh, pah avéé' réh merem awah lem kenin réh. 22Irah bara' réh jam seruh, éh semu'un néh irah palui awah. 23 Inah éh pepoléng réh palui uban bé' réh keloo' seva' Allah éh pu'un pelinguh, irah maneu' butun pekua' layan kelunan, kelunan murip metok awah, pu'un réh maneu' jelua' kepéh pekua' layan juhit ngan layan ka'an ngan layan torok péh, bang butun inah awah éh seneva' réh.
24Uban réh palui kenin bé' keloo' kivu Allah, inah Allah kejeraa' réh kivu kenin réh tengéé' maneu' kekat éh sa'at ngan jelemih, pah avéé' réh maneu' barék réh éh bé' tekep belah irah ke' péh. 25Irah bet ha' tebaraa' Allah ke' réh kivu ha' tebaraa' éh kenyo irah ke' awah. Pu'un irah pakai penyuai Allah barei' juhit ngan ka'an éh senuai Néh inah, bang bé' irah ngajung ngan kivu Allah éh suai kekat inah, Allah inah éh tekep kenajung lu' pelinguh. Amin.
26Uban barék réh pu'un sa'at, Allah kejeraa' réh kivu kenin réh tengéé' ngan maneu' kekat kemagat réh tong kekat kesa'at. Kenat péh irah redo péh, bé' réh pemung ngan lakei' barei' kemalai redo, bang pu'un réh maneu' kuraa' adet éh sa'at éh jelemih mu'un tong usah réh. 27Kenat péh irah lakei', bé' irah tai pemung ngan redo barei' malai, bang bé' réh omok ngeretep, ngelayau réh keloo' tai petuyang ngan irah pata lakei' ke', jelemih mu'un barék réh kenat. Neu' réh maneu' barék éh jelemih kenat, inah irah alaa' ukum dalem usah réh éh oléé' kesa'at réh inah.
28Uban irah bet Allah ngan bé' keloo' seruh tong Iah, inah Iah kejeraa' réh kivu kenin réh tengéé', ngan kekat penyeruh réh pepit dalem kesa'at réh awah, pah avéé' réh maneu' kekat éh bé' tekep réh maneu'. 29Kenin réh penoo' neu' kuraa' arong kesa'at ngan penyala', inah éh sihun ngan juk alaa' mekum, sakit kenin merek, sa'at mu'un-mu'un kenin réh, pu'un réh mematai kelunan ngan paneu' péh, ngan ngelavo' irah éh jah, irah bara' tong penganeu' kelunan tengéé' jin éh pu'un dokoo' ngesa'at kelunan inah ngan irah éh jah. Pu'un réh nekau ha' ngan perengah éh ngan irah éh jah kepéh, 30ngan ngesa'at ngaran kelunan éh jah, bau kenin réh irah ngajung usah réh tengéé', leko mu'un-mu'un réh tong Allah. Irah pitah jalan ke' réh maneu' éh pelapah sa'at kepéh, pu'un réh ngelepah ha' tinen tamen réh. 31Kekat barék réh jelemih mu'un, kekat ha' ané réh bé' éh batuu'-batuu' bé' réh jam nolong ngan pika irah éh jah. 32Kejam irah ke' Allah tekep ngukum réh matai pelinguh, bang na' péh kenat, makang kenin réh maneu' kesa'at de' ke', ngan inah kepéh irah murung kenin hun kelunan éh jah pu'un maneu' éh kenat.
Currently Selected:
RUM 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia