YUDAS 1
1
1 Akeu' Yudas, kelunan éh sohoo' Yésus Kristus, éh padéé' Yakub rai, akeu' maneu' surat iteu' ngan kekat kelunan éh tenebai Allah éh pu'un petem dalem kemurung Allah éh Tamen lu', inah éh ngan kekat kelunan éh pu'un lem nihau Yésus Kristus. 2Jian Allah mena' pengejian, pengepawah ngan pengasi Néh pah avéé' mutaa' ngan keh.
Irah guru éh ngelavo'
3O kekat padéé' éh kemurung ké'! Akeu' lepah maneu' surat ngan keh tong jalan urip lu' dalem Tuhan. Bang akeu' juk ngegahang kenin keh jin surat iteu' ngan nyohoo' keh ngelawan ineu'-ineu' éh juk ngebéé pengelan éh lepah nena' Allah jah koléé' awah ngan irah éh anah Nah avéé' pelinguh-linguh. 4Pu'un kuraa'-kuraa' kelunan éh bé' ngelan tong Tuhan lepah masek belah lu' ngan bé' kenejam lu'. Irah ngepaléu ha' tebaraa' tong penika Allah lu', ke' réh omok maneu' barék réh éh sa'at. Irah bé' ngelan Yésus Kristus, Iah awah éh pu'un penyukat ngan éh Tuhan lu'. Jin sahau tenéh Ha' lem Surat Allah bara' tong ukum éh juk teneng tong kelunan éh maneu' kenat.
5 Na' péh ka'ah lepah jam tong kekat ha' ké' iteu', pu'un akeu' petesen keh kepéh tong jalan Tuhan Allah ngelepu pohoo' Yahudi jin Kamit irah Mesir sahau, ngan la'o inah kepéh iah mematai irah éh bé' ngelan tong Iah. 6Jian keh nesen tong irah meliket éh juk alaa' penyukat pelapah ja'au jin éh nena' Allah ngan réh, pah avéé réh piso jin retek okoo' réh pohoo'. Allah ngejeret irah meliket inah palaa' latai éh reken mu'un, tong retek éh merem saa' ra' tana'. Allah pokoo' réh Sinah pah avéé' pengega' dau hun Tuhan ngukum réh. 7 Irah tong leboo' Sodom, Gemora ngan kekat leboo' éh déhéé' duah leboo' inah, maneu' pekua' penganeu' kekat meliket inah. Kelunan Sinah petuyang ngan maneu' barék éh Segit. Kekat leboo' inah ngan kelunan tong néh kenebéé palaa' luten éh pelinguh. Ukum inah omok jah telana' ngan kekat kelunan.
8Kenat péh kekat kelunan éh bé' ngelan nah irah kivu éh seneruh réh, ngan éh seneruh réh inah mihin, réh maneu' penyala' tong usah réh tengéé'. Irah lebuau tong penyukat Allah ngan ngesa'at kekat éh maren tong seruga. 9 Pengeja'au meliket Mikhael, bé' pu'un maneu' kenat. Tovoo' néh paneu' ngan Sitan tong séé' éh omok alaa' patai Musa, Mikhael bé' makang menoo' Sitan palaa' ha' éh ngeba'at éh! Bang ka' ha' Mikhael, Tuhan maneu' ke'! 10Bang kekat kelunan éh bé' ngelan inah, ngesa'at kekat éh bé' kenejam réh, pu'un réh jam tong Kuraa'-Kuraa' rungen, bang barei' ka'an éh bé' pu'un penyeruh irah jam éh kivu akam éh lem kenin réh ngan kekat inah juk kebéé réh. 11 Tusah mu'un-mu'un irah éh kenat! Irah pu'un kivu jalan kenivu Kain rai. Pu'un réh keloo' kivu jalan éh sala' ke' réh omok kaya' barei' Bileam rai. Irah kenebéé Tuhan uban réh ngelawan Tuhan barei Korah rai. 12Irah pu'un barei' éh segit awah tong ta'an keh tovoo' keh kuman pemung ngan kekat padéé' éh kua' pengelan ngan irah kuman nyahan ngan seruh tong usah réh tengéé' irah barei' baleng éh palit neu' kepu bang bé' pu'un taa'. Irah péh barei' kayeu' buaa' éh bé' ngebuaa' na' péh éh sioo' taun buaa'. Irah barei' kayeu' éh lepah navut avéé' lakat néh éh matai mu'un. 13Irah barei' luyak ja'au tong baa' banget. Kekat kesa'at réh éh pekenyaa' nah pu'un poléng barei' bura'. Barei' kenyuhai éh lepah piso jin jalan néh bu'un éh retek néh lepah petenup Allah dalem merem éh matek padeng mu'un pah avéé' pelinguh linguh.
14 Henokh jin puku' éh ketujuu' la'o Adam rai. Iah lepah bara' tong irah inah, ka' ha' néh, Na'at, Tuhan tuai pemung ngan kuraa'-kuraa' ibu meliket Néh éh ni'ai. 15Adang Iah petuneng kekat kelunan. Iah juk ngukum kelunan éh bé' ngelan uban penganeu' réh éh Sa'at ngan uban kekat ha' ané réh ngesa'at Tuhan!
16Kekat irah inah ngelayau selem-selem pané ngan pesala' kelunan éh jah. Irah kivu pengagat usah réh éh Sa'at, irah ngajung usah réh tengéé' ngan ngajung kelunan éh jah ke' réh omok alaa' utung.
Ha' tepat ngan ha' petesen
17O kekat padéé' ke' jian keh nesen tong kekat ha' benara' irah Lawah Tuhan lu' Yésus Kristus sahau rai. 18 Ka' ha' réh rai de', Sioo' tai ga' dau pu'un kuraa'-kuraa' kelunan tuai ngan mala' peja' keh. Irah inah kelunan éh kivu kekat pengagat penyala'. 19Kelunan inah petengéé' kenin irah éh jah, pu'un réh maneu' kekat éh pengeloo' réh awah, ngan bé' réh pu'un najak Sahéé' Ni'ai. 20Bang ka'ah kekat padéé' ke' jian keh ngereken kenin keh dalem pengelan keh tong Kristus. Pengelan keh éh matek ni'ai. Jian keh sebayang kivu pengajak Sahéé' Ni'ai. 21Jian keh murip ra' nihau penika Allah kelebéé' keh mena pengasi Tuhan lu' Yésus Kristus, éh juk mena' ngan keh urip mu'un ngan pelinguh.
22Jian keh pika irah éh kurang pengelan, 23jian keh nyagem réh jin lem Luten ngan purip réh. Jian keh pepoléng penika keh ngan kelunan éh jah, bang mavaa' keh dai keh metabin neu' barék réh éh segit éh mihin réh maneu' penyala'.
Sebayang Mejing Tuhan
24Allah éh omok mihau keh dokoo' keh petem lem pengelan, ngan éh omok mihin keh tong jumen Néh éh Maren ngan murung kenin ngan bé' pu'un sala' ineu'-ineu'. 25Iah awah éh Allah, éh pepurip lu' jin Yésus Kristus Tuhan lu'. Iah néh Allah éh Maren, pengeja'au kekat Allah, pu'un penyukat ngan éh bau kekat néh béé jin sahau avéé' hun iteu' ngan kelebéé'-lebéé' néh. Amin.
Currently Selected:
YUDAS 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia