YOHANES 11
11
Tong pengematai Laserus
1 Pu'un jah kelunan éh sakit, ngaran néh Laserus, leboo' néh tong Betania, éh leboo' Meriam rawah Marta éh padéé' néh nah. 2 Meriam nah éh mosoo' anyuu' éh jian ba'oo' tong gem Yésus ngan mitit éh kepéh palaa' bok néh rai. Laserus éh sakit nah padéé' néh. 3Rawah redo inah nyohoo' kelunan tai bara' éh ngan Yésus, ka' ha' réh, O Tuhan, sakit lakei' éh bakéh Ko' rai ne', ha' réh.
4Hun Yésus menéng ha' réh bara' lakei' inah sakit, ka' ha' Néh ngan réh, Bé' kesakit néh inah mihin éh keta ngan matai awah, bang pu'un éh kenat dokoo' néh pepoléng penyukat Allah, ngan inah kepéh dokoo' Akeu' éh Anak Néh kenajung réh kepéh ha' Néh.
5Yésus murung mu'un pebakéh ngan Marta rawah Meriam ngan Laserus péh, 6na' péh kenat, hun Néh menéng ha' réh bara' Laserus pu'un sakit, mokoo' de' ke' éh duah dau keto. 7Boh Éh bara' ngan irah bakéh Néh éh kivu Éh, ka' ha' Néh, Jian tam moléé' tai tana' Yudea kepéh, ha' Néh.
8Ka' ha' réh ngan Néh, O Guru, hun Ko' pu'un sitai rai, pu'un irah Yahudi juk memateu' Ke', kineu' Ke' keloo' tai sinah kepéh, ha' réh ngan Néh.
9Ka' ha' Néh mipa réh, Kineu' kelebéé' nawa pu'un lem jah dau kei? Adang néh pu'un nawa kenat jin bu'un juhit miha' pah avéé' dau ngit péh. Kelunan éh lakau sioo' rema, bé' éh tekaleu', uban pu'un nawa ta'an néh neu' ada maten dau. 10Hun néh lakau lem merem, pu'un éh tekaleu' uban bé' pu'un nawa ta'an néh, ha' Néh. 11La'o Yésus bara' kenat, boh Éh bara' ngan réh, ka' ha' Néh, Bakéh tam Laserus pegen éh, bang Akeu' juk tai peto'ot éh, ha' Néh.
12Ka' ha' irah bakéh Néh mipa Éh, O Guru, hun néh pegen kenat, jian éh da', omok éh ma'o jin kesakit néh, ha' réh ngan Néh.
13Tong ha' Yésus bara' kenat, inah Iah bara' Laserus lepah matai, bang irah seruh éh, iah bara' Laserus pegen marut awah. 14Boh Yésus bara' petek ngan réh, Laserus lepah matai. 15Uban Akeu' pika ka'ah, jian kenin Ké' uban Ké' bé' pu'un ngan néh hun néh matai nah, dokoo' keh omok ngelan, bang jian tam tai tavin éh hun iteu', ha' Néh ngan réh.
16Boh Tomas éh keruwah ngaran néh Papin, bara' ngan irah bakéh Yésus, ka' ha' néh, Jian tam kivu Guru tam tai, dokoo' tam omok matai pemung ngan Néh, ha' néh ngan réh.
Yésus éh pebetéé' kelunan matai ngan éh mena' urip
17Hun Yésus avéé' sitai, boh éh jam Laserus pu'un tenanem réh pat dau tenéh. 18Leboo' Betania bé' éh juu' jin Yérusalem, ngioo' kejuu' néh hun kelunan lakau ngioo' jah jam, kenat kejuu' néh. 19Pinaa' kelunan Yahudi tai nepah Marta rawah Meriam ke' réh papung kenin roh tong padéé' roh matai nah.
20Hun Marta menéng ha' irah bara' Yésus pu'un tuai, tioo betéé' éh tai tavin Éh. Mokoo' Meriam nah, bé' éh pu'un tai. 21Ka' ha' Marta ngan Yésus, O Tuhan, hun Ko' pu'un siteu', bé' padéé' mé' nah matai kenat. 22Bang na' péh kenat akeu' jam ineu'-ineu' pengenyat Ko' ngan Allah hun iteu' péh, omok Allah mena' éh ngan Ko' kepéh, ha' Marta.
23Ka' ha' Yésus ngan néh, Padéé' ko' iteu' pu'un éh juk betéé' murip kepéh, ha' Néh.
24Ka' ha' Marta, Akeu' jam éh juk betéé' murip kepéh tong ga' dau vam, ha' néh.
25Ka' ha' Yésus ngan néh kepéh, Akeu' éh pebetéé' ngan purip kelunan, séé'-séé' éh ngelan tong Akeu', na' péh éh matai, omok éh murip kepéh. 26Séé'-séé' éh murip ngan ngelan tong Akeu', bé' éh matai pelinguh. Kineu' éh Marta, pu'un ke' ngelan ha' Ké' kenat kei? Ha' Néh.
27Ka' ha' Marta mipa éh, Akeu' ngelan adang Ka'au éh Kristus Anak Allah éh pejajii' Tuhan juk tuai tong tana' ha' néh.
Yésus mangaa'
28La'o Marta pané kenat, moléé' éh tai padéé' néh Meriam, ke' néh selem-selem bara' ngan néh ka', Pu'un Guru tam lepah avéé', pu'un Éh pitah ke', ha' néh. 29Hun Meriam menéng ha' néh kenat, tioo betéé' éh tavin Yésus. 30Bé' jak Yésus avéé' mu'un tong leboo' inah, mokoo' deke' Éh tong retek Marta pané ngan Néh ri'. 31Hun irah Yahudi éh mokoo' tong lamin Meriam ke' réh papung kenin néh, na'at éh tioo betéé' musit kenat, pu'un réh kivu éh, uban kelem réh iah tai kenat ke' néh mangaa' tong tanem sitai.
32Hun Meriam avéé' tong retek Yésus pu'un mokoo', tioo ngejekuu' lep éh déhéé' gem Néh, ka' ha' néh, O Guru, hun Ko' pu'un siteu' ri' bé' padéé' ké' nah matai, ha' néh.
33Hun Yésus na'at Meriam mangaa' ngan na'at irah Yahudi éh kivu éh mangaa', besau kenin Néh, penika Néh réh. 34Ka' ha' Néh, Semah keh nanem éh, ha' Néh.
Ka' ha' réh, O Tuhan tuai Ke' na'at éh, ha' réh.
35Mangaa' Yésus. 36Ka' ha' irah Yahudi matek, penika Néh ine', ha' réh.
37Ka' ha' jelua' kepéh, Pu'un Éh peka'o maten kelunan peseu' sahau rai, kineu' Éh bé' pu'un penyukat ke' Laserus bé' matai, ha' réh.
Yésus purip Laserus
38Pua kenin Yésus, tai Éh tong jalan réh modoo' patai Laserus. Jalan inah luvang bateu', ngan pu'un jah bateu' éh neu' réh matep ubaa' luvang inah.
39Ka' ha' Yésus ngan réh, Jian keh nyulip bateu' inah, ha' Néh.
Ka' ha' Marta éh padéé' lakei' matai nah, Tuhan, bé' omok maneu' éh kenat, borok ine', iteu' néh kepat dau néh tenéh, ha' néh.
40Ka' ha' Yésus ngan néh, Kineu', bé' Ku' pu'un bara' ngan ko' ri', hun ko' ngelan boh penyukat Allah omok poléng ngan ko', ha' Néh. 41Boh réh nyulip bateu' inah, boh Yésus na'at kebau, ka' ha' Néh, O Amam, Akeu' bara' jian kenin ngan Ko', uban Ko' ngelayau menéng ha' Ké'. 42Akeu' jam Ka'au ngelayau menéng ha' Ké', bang Akeu' bara' kenat dokoo' kelunan pinaa' éh pu'un siteu', omok ngelan Ka'au éh nyohoo' Akeu' tuai, ha' Néh. 43Boh Yésus pané ngan ja'au ha', ka' ha' Néh, O Laserus, musit ke', ha' Néh. 44Boh lakei' éh matai nah tioo musit, petem livah tong ojoo' ngan tong gem néh éh palaa' réh mutup éh nah, kenat péh petem livah éh kejeret réh tong ja'an néh nah. Ka' ha' Yésus ngan réh, Jian keh muka kekat livah inah ke' néh omok lakau, ha' Néh.
Irah ja'au pitah jalan juk mematai Yésus
(Mat. 26:1-5, Mrk. 14:1-2, Luk. 22:1-2)
45La'ah irah Yahudi éh tuai papung Meriam nah, hun réh na'at éh neu' Yésus nah, pinaa' réh ngelan tong Néh. 46Bang jelua' réh moléé' tai tavin irah Parisi ke' réh bara' kekat penganeu' Yésus ngan réh. 47Boh irah Parisi ngan kekat pengeja'au imam, pemung ngan kelunan pengeja'au Komiti sebayang Yahudi, petipun béé-béé. Ka' ha' réh, Kineu' jalan uleu' kepéh uban pinaa' penganeu' lakei' inah éh ngebéé kenin kelunan pinaa'. 48Hun uleu' kejeraa' Éh maneu' kenat, adang kekat kelunan ngelan tong Néh, boh peritah Rum pu'un tuai ngan nasa' umaa' Allah ngan kebéé pohoo' uleu' kepéh, ha' réh.
49Pu'un jah kelunan jin belah réh, ngaran néh Kayapas, kelunan inah éh Imam éh pengeja'au kekat imam taun inah. Ka' ha' Kayapas ngan réh, Bé' keh jam ineu'-ineu'. 50Bé' keh jam seruh, adang éh pelapah jian hun jah usah awah matai ngeliwah kekat pohoo' lu' jin hun kekat pohoo' lu' matai béé, ha' Kayapas nah. 51Éh mu'un néh bé' éh pané kenat neu' pengejam néh tengéé', bang neu' kereja' néh Imam éh pengeja'au kekat imam taun inah, kenat péh Tuhan pepoléng éh dalem kenin néh adang Yésus juk matai ngeliwah kekat pohoo' Yahudi. 52Éh mu'un néh, bé' Yésus matai ngeliwah pohoo' Yahudi awah, bang Iah matai dokoo' Néh pepemung kekat irah éh Anak Allah jin siget arong kelunan pah tipo tana'.
53Jin la'o dau inah, kekat pengeja'au réh pitah jalan ke' réh omok mematai Yésus. 54Uban néh kenat bé' Yésus lakau tong tana' Yudea kepéh, bang tai Éh mokoo' tong leboo' Epraim éh déhéé' tana' payah, sinah éh mokoo' ngan irah bakéh Néh.
55Danii' tong jaka' irah Yahudi juk maneu' Dau Ja'au Paska, kenat péh irah pinaa' lakau jin leboo' réh tai leboo' Yérusalem ke' réh kivu adet réh tong kekat jalan réh peti'ai lamin ngan usah réh dokoo' réh omok maneu' Dau Ja'au inah. 56Pu'un réh pitah Yésus, hun réh pu'un tong umaa' Allah pu'un réh pané belah irah ke', ka' ha' réh, Kineu' éh seneruh tam, pu'un iri' tuai da', kineu', bé' éh tuai da', ha' réh. 57Pengeja'au-pengeja'au imam ngan irah Parisi péh, pu'un réh nyohoo' kelunan hun séé'-séé' jam semah Yésus mokoo', jian réh tuai bara' éh dokoo' réh omok tai ngamit Éh.
Currently Selected:
YOHANES 11: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia