YAKUB 1
1
1Surat iteu' jin Yakub, kelunan sohoo' Allah ngan Tuhan Yésus Kristus, akeu' bara' tabi' ngan kekat kelunan éh ngelan tong Allah éh purat pah tipo tana'.
Tong pengelan ngan pengejam seruh
2O kekat padéé' ké', hun keh teneng neu' pinaa' arong penyilam jian keh jian kenin. 3Uban neu' pengelan keh, inah éh maneu' keh omok ngeretep, ngan mihin keh kebit kenin kepéh. 4Tong éh kebit kenin inah, jian éh pepit, pah avéé' ka'ah pu'un sukup mu'un ngan bé' pu'un pengekurang ineu'-ineu' péh. 5Hun pu'un séé'-séé' jin belah ka'ah éh bé' pu'un pengejam, jian iah sebayang ngan Allah dokoo' Allah mena' pengejam seruh ngan néh; uban Allah mena' éh ngan lumang kenin ngan murung kenin ngan siget kelunan. 6Bang hun mah keh sebayang, jian keh ngelan, Mai keh duah kenin uban kelunan éh duah kenin barei' luyak baa' banget éh keteu' ketai neu' kepu. 7Kelunan éh kenat mai iah seruh iah omok alaa' ineu'-ineu' péh jin Tuhan. 8Uban kelunan éh duah kenin bé' éh jam seruh tong kekat jalan néh.
Tong pengekari ngan pengekaya'
9La'ah jian kelunan Kristén éh kari. Murung kenin uban tong jah dau Allah omok metéé' réh tong retek éh jian kepéh. 10 Kenat péh kelunan Kristén éh kaya, jian irah murung kenin hun Allah ngediva' réh, uban irah éh kaya' juk béé barei' busak tong tana'. 11Hun pétéé' musit melayeu' busak nah, peleraa' éh, bé' éh jian kepéh. Kenat péh kelunan kaya' omok kari lem néh to telalau tong kereja' néh.
Penupat ngan éh menat kenin kelunan maneu' sa'at
12Jian kenin kelunan éh omok ngeretep, na' péh penusah éh pinaa' arong teneng tong néh. Uban hun néh omok nyopéé' penusah inah, boh iah omok alaa' urip éh lepah pejajii' Allah ngan kekat kelunan éh pika Iah. 13Hun kelunan inah penat kenin maneu' sa'at tovoo' néh teneng tenupat inah, mai iah bara' Allah éh mihin akeu' maneu' kenat, uban bé' Allah omok penat kenin neu' kesa'at ngan Allah tengéé' péh bé' menat kenin kelunan maneu' sa'at. 14Éh mu'un néh pu'un kelunan sopéé' ngan petat maneu' kesa'at inah, neu' réh kelih tong kemagat dalem kenin réh éh sa'at, kesa'at inah ngejeret irah ke'. 15Boh kekat kemagat néh inah tai pepit-pepit avéé' néh mihin éh maneu' penyala', penyala' inah kepéh pepit-pepit avéé' pengega' néh mihin éh matai.
16O kekat padéé' ké', mai keh lavo' neu' penyala'. 17Kekat ineu'-ineu' éh jian ngan éh sukup mu'un inah éh tuai jin seruga jin Allah éh suai kekat éh rema tong Langit. Iah Allah éh bé' pu'un paléu, ngan bé' pu'un ngelihep ineu'-ineu' péh. 18Kivu pengeloo' Néh tengéé' Iah suai uleu' neu' ha' tebaraa' Néh éh teneng. Inah maneu' uleu' omok barei' buaa' éh tenah jin kekat-kekat éh senuai Néh.
Jian menéng ngan kivu éh kepéh
19O kekat padéé' éh kemurung ké'! Jian siget usah pu'un rigah menéng, bang lieu' éh pané ngan lieu' éh merek. 20Uban kelunan éh merek bé' éh omok maneu' ineu' éh jian, éh omok pesenang kenin Allah. 21Uban néh kenat jian keh bet kekat kemalai ngan barék éh sa'at. Ngerera' kenin tong Allah ngan alaa' ha' tebaraa' éh nulah Néh dalem kenin keh, uban ha' tebaraa' inah omok purip keh.
22Mai keh ngelavo' usah keh tengéé' ngan menéng ha' tebaraa' néh awah. Bang jian keh kivu pekua' ha' tebaraa' Néh. 23Uban kelunan éh menéng éh awah, ngan bé' kivu éh, inah éh barei' kelunan éh kepuh usah néh dalem pengada, 24tioo lakau éh hun inah néh éh ngelepan layan usah néh éh ta'an néh iri'. 25Bang kelunan éh seruh mu'un tong kekat ha' tebaraa' Tuhan éh jian mu'un, tebaraa' inah néh éh ngelepu réh jin kesa'at réh, kelunan éh seruh tong néh mu'un ngan éh mihau éh, bé' éh barei' kelunan éh menéng éh metok awah tioo kelepan néh éh kepéh, bang kelunan éh pu'un kivu éh mu'un, Tuhan éh nolong éh dalem kekat penganeu' néh kepéh.
26Hun pu'un kelunan éh seruh iah kivu Tuhan mu'un bang sa'at ha' ané néh, pengelan néh seleket bé' pu'un ngan iah ngelavo' usah néh awah. 27Kelunan éh ngepayoo' kenin Allah Tamen lu', inah éh kelunan éh kivu Iah mu'un, bé' éh ngelayoo' awah sebayang. Jian réh nolong anak uyau ngan redo baleu' lem kekat penusah réh ngan mihau usah réh jin kekat arong kesa'at tong tana' iteu'.
Currently Selected:
YAKUB 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia