PENGANEU' LAWAH 1
1
PENGANEU' LAWAH TUHAN
1 O Tiopilus, lem surat éh pekateu' ké' lepah rai, pu'un ku' bara' tong kekat penyuai ngan tong ha' tebaraa' éh benara' Yésus jin bu'un kereja' Néh, 2pah avéé' dau Néh nalaa' Tuhan tai seruga. La'ah teka Néh nalaa' Tuhan tai seruga, pu'un Éh bara' kuraa'-kuraa' sohoo' neu' penyukat Sahéé' Ni'ai ngan kekat kelunan éh kevéléé' Néh tenéh nah, ke' réh tai lawah Néh. 3Avéé' pat poloo' dau kelebéé' la'o Yésus betéé' jin patai Néh, pinaa' koléé' Néh pepoléng usah Néh ngan réh, ke' réh jam Éh mu'un adang Néh pu'un murip mu'un. La'ah pu'un réh na'at usah Néh mu'un ngan pu'un Éh nebaraa' réh tong Pengihau Allah. 4 La'ah tovoo' Yésus pu'un pemung ngan irah lawah Néh, pu'un Éh bara' ngan réh, ka' ha' Néh, Mai keh piso jin leboo' Yérusalem, bang jian keh mena pengena' Tamen Ké' éh pejajii' Néh ngan keh rai, éh lepah benara' Ké' ngan keh nah. 5 Uban pu'un Yohanes ngebatis kelunan lem baa', bang ka'ah juk benatis lem Sahéé' Ni'ai bé' lebéé' la'ah, ha' Yésus ngan réh.
Tuhan Yésus netéé' tai seruga
6Hun irah lawah Yésus nah pu'un pemung ngan Néh, pu'un réh neteng Éh, ka' ha' réh, Kineu' Tuhan, hun iteu' éh jaka' Ko' juk ngelepu améé' jin lem pengihau Rum ngan metéé' Pohoo' améé' Yahudi kei? Ha' réh.
7La'ah Yésus mipa réh, ka' ha' Néh, Bé' tiken ke' keh juk jam éh, uban Tamen Ké' awah éh pu'un penyukat bara' tong jaka' Néh. 8 Bang hun keh alaa' Sahéé' Ni'ai boh keh pu'un penyukat, boh keh omok bara' Ku' ngan réh, kenat péh tong Yérusalem, kenat péh tutuh tana' Yudea ngan Samaria, pah avéé' tipo tana', ha' Néh. 9 La'o Néh pané kenat, lem réh kepuh Éh, pu'un Tuhan alaa' Éh tai seruga, ngan pu'un avun mekep Éh jin ta'an réh.
10Lem réh to kepuh sinah, tioo pu'un duah usah éh pu'un pakai mebéng nekedéng déhéé' réh. 11Ka' ha' roh ngan réh, O kelunan jin Galilia, uban ineu' keh nekedéng kepuh tong langit kenat? Yésus ri' nalaa' Tuhan tai seruga jin belah keh, adang Néh juk tuai kepéh pekua' keh na'at Éh tai seruga nah, ha' roh.
Liwah Yudas
12La'o inah irah lawah Yésus moléé' jin tokong Saitun tai leboo' Yérusalem nah. Tokong inah pedanii' tong Yérusalem, kejuu' néh, bé' piso maten dau réh lakau belah néh. 13 Hun réh avéé' tong Yérusalem masek réh tong lamin ngan tai tong lamin éh saa' bau nah, sinah réh mokoo'. Ngaran kekat réh, Péterus, Yohanes, Yakub, Anderias, Pilipus, Tomas, Bartolomeus, Matius, Yakub anak Alpeus, Simon éh Selutis, Yudas anak Yakub. 14La'ah kekat irah inah petipun dokoo' réh petem sebayang, pemung ngan irah redo, Meriam éh tinen Yésus, ngan irah padéé' usah Yésus.
15Ngioo' duah teleu' dau la'o inah kepéh, irah éh ngelan petipun kepéh, kekat réh ngioo' jah ato duah poloo' usah, boh Péterus nekedéng ke' néh pané ngan réh, ka' ha' néh, 16O kekat padéé', ha' lem surat Allah éh benara' Sahéé' Ni'ai ngan Daud, adang néh tekep pu'un kenat mu'un. Inah éh, éh benara' néh tong Yudas éh mihin kelunan tai ngamit Yésus. 17Yudas nah pu'un éh kivu lu' lepah rai, ngan pu'un Tuhan ngevéléé' éh ke' néh omok kereja' pekua' uleu' iteu', ha' néh.
18La'ah Yudas melih jah tulat tana' palaa' rigit éh nalaa' néh tong kesa'at néh lepah nah, ngan iah ngelohoo' usah néh tioo letaa' betuken néh ngan musit uwit néh. 19 La'ah kekat irah tong leboo' Yérusalem menéng rengah néh kenat, boh réh maneu' ngaran tana' inah lem ha' irah ke', Akeldama, sin néh, Tana' Dahaa'.
20 La'ah ka' ha' Péterus kepéh, La'ah pu'un jah ha' lem surat Masmur, éh bara' ka',
Kejeraa' lamin néh usan awah,
mai jah usah mokoo' tong néh. Ha' Péterus kepéh,
pu'un jah ha' kepéh éh bara' ka',
Kejeraa' kelunan éh jah
maneu' kereja' néh.
21-22 La'ah ha' Péterus, Uban néh kenat jian jah usah ngeliwah Yudas nah ngan masek ngan uleu' ke' néh bara' tong pengebetéé' Tuhan Yésus. Tekep éh kelunan éh pu'un kivu lu' kelebéé' Tuhan Yésus pu'un ngan lu' rai, inah éh, jin bu'un Yésus benatis Yohanes, pah avéé' dau Tuhan alaa' Éh tai seruga, ha' Péterus nah.
23Pelapah irah ngevéléé' duah usah, inah éh Yusup keruwah ngaran néh Barsabas, pu'un jah ngaran néh kepéh, Yustus, lakei' éh keruwah néh, inah éh Matias. 24Pu'un réh sebayang, ka' ha' réh, O Tuhan, Ka'au' éh jam kenin kekat kelunan, uban néh kenat jian Ke' bara' séé' éh kevéléé' Ko' jin belah rawah iteu', 25ke' néh omok ngeliwah Yudas tong kereja' néh, uban Yudas lepah tai tong retek éh kevéléé' Tuhan tulat néh, ha' sebayang réh. 26La'ah irah nyurat ngaran roh kivu éh seneruh siget usah lem kenin néh tengéé', dokoo' réh ngevéléé' jah usah jin belah roh. Matias éh kevéléé' réh, irah alaa' éh pemung ngan irah éh jah poloo' jah lawah nah.
Currently Selected:
PENGANEU' LAWAH 1: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia