BAFILIPI 1
1
Moapostola o lebogela Bafilipi, a ba rapelela
1Paulo le Timotheo bahlanka ba Jesu Kriste, re ngwalela ba e lego bakgethwa ka Kriste Jesu ba lego motseng wa Filipi, le balebeledi le badiredi.
2Kgaugelo a e le tlele le khutšo e tšwago go Modimo Tata wešo le go Morena Jesu Kriste.
3Ke leboga Modimo wa ka ka mehla ge ke le gopola. 4Dithapelong tša ka ka moka ke le rapelela, ka moka ga lena, ke thabile; 5ke thabela kgopu yeo le e tšeago modirong wa Ebangedi go tloga letšatšing la pele go fihla lehono. 6Gomme se ke se holofetšego ke gore e a thomilego modiro woo o botse go lena, o tlo o phetha, gwa tlo ba gwa fihla letšatši la Jesu Kriste. 7Go ntshwanetše ge ke le gopola ka mokgwa woo ka moka ga lena; ka gobane ke na le lena mo pelong ya ka, ke tlemilwe ke le bjalo, ke le wa go lwela Ebangedi le go e tiiša; mme lena le batee le nna ka go gaugelwa. 8Gobane Modimo ke hlatse ya ka ka mo ke le hlolegetšwego ka moka ga lena ke le ratile boka Jesu Kriste.
9Gomme se ke se kgopelago ke gore lerato la lena le fele le tlala le eya le na le tsebo le temogo ya ruri, 10gore le tsebe go hlaologanya bolo le bobe, gore le be basekegi bailabosodi, go be go tle letsatsi la Kriste. 11Le be ba ba tletšego kenyo tša toko ya Jesu Kriste, tše Modimo a tlogo retwa a tumišwa ka tšona.
12Bana bešo! Ke rata ge le tseba gore tše di ntiregetšego di thušitše gagologolo go tšweletša Ebangedi pele. 13Mo ngwakong ka moka wa kahlolo, le go ba bangwe, gwa ba gwa bonala ge ditlemo tša ka e le tša ga Kriste. 14Ba bantši ba bana ba borena Moreneng ba tšea kholofelo ka ditlemo tša ka, ba napa ba tlema pelo ba tiišetša go bolela lentšu ba sa boife.
15Ba bangwe ge ba dira ka mona le ka kgang, ba bangwe gona ba kwatša tša Kriste ka pelo e bolo. 16Bao ba go bolela Kriste ka lerato, ba tseba ge ke beetšwe go emela Ebangedi. 17Ge e le bao ba dikgang, ge ba bolela Kriste ga ba hloke mamenemene, ba ela go nthatafišetša ditlemo, e tle e be tlaišego.
18Gomme e tlo bang? Tabakgolo ke ge Kriste a bolelwa. Ge a ka bolelwa ka bomenetša, le ge a ka bolelwa ka therešo, nna ke thabela ge a bolelwa; gomme ke tlo fela ke thabela fao. 19Gobane nna ke tseba gore ka dithapelo tša lena, le ka go thekgetšwa ke Moya wa Jesu Kriste, dilo tše di tlo nkiša phologong. 20Ke sona se ke se hlologetšwego, se ke se holofetšego ke se na maseme, ke na le mafolofolo a go re ka mehla le lehono Kriste a godišwe ka tše di diregelago mmele wa ka, e ka ba bophelo, e ka ba lehu. 21Gobane mo go nna go phela ke Kriste, go hwa ke leruo. 22Gomme ge go phela go ka tšweletša seenywa sa modiro wa ka, gona ga ke tsebe se nkago itlhaolela sona. 23Ke sa farafarwa ke tše pedi: Ke na le tlhologelo ya gore ke tloge ke yo ba le Kriste, gobane ke sona se se kago phala tšohle kgole. 24Fela, go dula nameng ke se se tlogo hola bolena. 25Ka go holofela moo ke tseba gore ke tlo dula, ka dula ke le wa go le tšweletša pele ka moka ga lena, gore le thabe tumelong. 26Gore ge ke boetše go lena ke le wa lena, ditumišo tša lena e tle e be tše di tletšego re le ba Kriste Jesu.
27Tabakgolo ke gore le phedišane ka mokgwa o loketšego Ebangedi ya Kriste, gore ge nka tla ke le bone; ge nka se tle, ke kwe tša lena ge le eme le le ba moya o tee, ba pelotee, le tšea kgopu le hlabanela tumelo ya Ebangedi. 28Le se na mo le kago tšhoga baganyetši, bao go ganetša ga bona e lego bohlatse bja gore ba a lahlega, go lena ya ba bohlatse bja phološo, di etšwa go Modimo. 29Gobane ka baka la Kriste le tlo ba le seditšwe ka kgaugelo, e se ya go mo dumela fela, e le kgaugelo ya go tlaišwa ka baka la gagwe. 30Ke mo le tlogo lwa ntwa ye le e bonego ka nna, ye le kwago ba mpolela ka yona mehleng yeno.
Currently Selected:
BAFILIPI 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.