LUKA 1
1
Tša Tsakaria tatago Johane Mokolobetši, le tša Maria mmago Jesu
1Ba bantši ba šetše ba lekile go hlomaganya taodišo ya tše di diregilego mo go rena. 2Re di neilwe ke ba ba di bonego ka mahlo go tloga mathomong a tšona ya ba bona batseta ba yona taba yeo. 3Bjale ke bona ge go ntshwanetše, ge le nna ke go ngwalela go hlatlamana ga tšona, wena Theofilo morategi, ke thomile go di latiša tšohle go tloga tlhagong ya tšona, 4O tle o bone nnete ya ditaba tše o di rutilwego.
5Mehleng ya Herode kgoši ya naga ya Juda go be go na le moperisita e mongwe e a bitšwago Tsakaria, e le wa sephohla sa Abia; mosadi wa gagwe e be e le wa moloko wa Arone, leina la gagwe e be e le Elisabetha. 6Ba be ba lokile pele ga Modimo ka babedi, ba eya ka ditaelo ka moka tša Morena ba se na bosodi. 7Gomme ba be ba se na ngwana, Elisabetha e le moopa; le gona ba be ba tšofetše bobedi bja bona.
8Ya re mohla Tsakaria a swere modiro wa boperisita pele ga Modimo, e le letšatši la gagwe, 9A tsena Ngwakong wa Modimo, a thuntšha diorelo ka mokgwa wa boperisita. 10Lešaba ka moka la batho le be le eme ntle, ba rapela ka lebaka leo ge go thuntšwa diorelo.
11Tsakaria a bona morongwa wa Morena a eme ka go le letona la aletare ya diorelo. 12A re go mmona a tšhoga, a welwa ke poifo. 13Morongwa a bolela nae a re: Se boife, Tsakaria! Thapelo ya gago e kwilwe. Elisabetha mosadi wa gago o tlo go belegela morwa, wa tlo mo rea leina la Johane. 14Yena eo e tlo ba lethabo la gago le tlhalalo ya gago; gomme ba ba tlo go thabela go tswalwa ga gagwe ke be bantši. 15Gobane e tlo ba e mogolo pele ga Morena; a ka se ke a nwa morara le sedila; o tlo tlala Moyamokgethwa a sa le mmeleng wa mmagwe. 16Ba bantši ba Baisiraele o tlo ba sokollela go Morena Modimo wa bona. 17Mme o tlo ba etapele ka moya wa Eliya le ka matla a gagwe, gore dipelo tša botatagobana a di sokollele go bana ba bona, le baganyetši a ba sokollele bohlaleng bja baloki, e be go lokišetša Morena setšhaba se se itlhamilego.
18Tsakaria a fetola a re: Tšeo ke tlo di tseba kang? Gobane ke tšofetše, le mosadi waka o fetilwe ke mabaka a gagwe.
19Morongwa a bolela a re: Ke nna Gabriele ke emago pele ga Modimo. Ke romilwe go bolela le wene, le go go tsebiša ditaba tše botse tšeo. 20Tseba gee! O tlo ba semuma, gwa tlo ba gwa tla letšatši le di tlo go tšwelela ka lona; O tlo šitwa go bolela ka gobane o sa ka wa dumela tše ke di boletšego tše ditlo go direga ka lebaka la tšona.
21Ge e le setšhaba, sona se be se letetše Tsakaria, se kgotsa ge a diega mo Ngwakong wa Modimo. 22Bjale ge a etšwa, a šitwa go bolela; ke mo ba lemogilego ge a bone pono mo Ntlong ya Modimo. Yena a fo ba kgwathetša ka diatla, a dula a le semuna.
23Ge go fetile matšatši a tirelo ya gagwe, a boela gae. 24Go tloga mehleng yeo Elisabetha mosadi wa gagwe a ba moima, a ikuta dikgwedi tše tlhano a re: 25Ke tše Morena a ntirilego tšona mehleng yeno a ntebeletše, gore a tloše tše batho ba bego ba nnyatša ka tšona.
26Ka kgwedi ya go selela Morongwa Gabriele a rongwa ke Modimo a ya motseng o mongwe wa Galilea wo ba rego ke Natsaretha. 27A tla go mosetsana e mongwe e a bego a beeleditšwe ke monna yo ba rego ke Josefa, wa moloko wa Dafida. Leina la mosetsana eo e be e le Maria. 28Morongwa a tsena mo a bego a le gona, a re: Thaba, wena Mogaugelwa. Morena o na le wena Mošegofatšwa gare ga basadi.
29Maria ge a mmona, a tšhoga ge a realo; pelong ya gagwe a re: Ke go dumedišwa ka mokgwa o bjang? 30Morongwa a bolela a re: Se tšhoge, Maria, o hweditše go gaugelwa ke Modimo. 31Tseba; o tlo ima mmeleng wa gago, wa tlo belega morwa wa tlo mo rea leina la Jesu. 32Yena eo e tlo ba e mogolo, o tlo bitšwa Morwa wa Yogodimodimo; mme Morena o tlo mo nea sedulo sa Dafida tatagwe. 33O tlo buša moloko wa Jakobo go iša mehleng ya neng le neng; mme bogoši bja gagwe bo ka se ke bja ba le bofelo.
34Maria a botšiša a re: Tšeo di ka direga bjang, etšwe ke sa tsebe monna?
35Morongwa a fetola a re: Moyamokgethwa o tlo theogela go wene mme matla a Yogodimodimo a tlo go okamela wa moriti; ke ka baka leo e a tlo go belegwa ke wene a tlo go bitšwa Morwa-Modimo. 36Gomme o tsebe; Elisabetha motswalo wa gago le yena o imile morwa botšofading bja gagwe; mme kgwedi ye go yena e šetše e le ya go selela; ke yena eo ba bego ba re ke moopa. 37Gobane Modimo, ga go se se sa kgonegego go yena.
38Maria a re: Ke nna e, ke molata wa yena Morena; tše O di boletšego a di ntiregele. -- Mme morongwa a mo tlogela.
39Mehleng yeo Maria a tsoga, a akgofa a ya dithabeng motseng wa Juda. 40A fihla ngwakong wa Tsakaria, a dumediša Elisabetha. 41Ya re Elisabetha ge a ekwa a dumedišwa ke Maria, ngwana mmeleng wa gagwe a sela. Elisabetha a tlala Moya o mokgethwa, 42a hlaboša lentšu le legolo a re: O Mošegofatšwa gare ga basadi; le sona seenywa sa mmele wa gago se šegofaditšwe. 43Go ntšwela kae ge ke etelwa ke mmago Morena waka! 44O k'o tsebe; ge lentšu la ge o ntumediša le ntsena ditsebeng ngwana wa mo mmeleng waka a sela ka go thaba. 45O wa lehlogonolo, wena o dumetšego go phethega ga tše Morena a go boditšego tšona.
46Maria a re: Pelo yaka e reta Morena, 47moya waka o hlalala ka Modimo Mophološi waka. 48O bone bobotlana bja nna molata wagwe. Gobane ke nna e, yo ba meloko yohle ba tlo go nthe ke yo lehlogonolo, 49Ka ge Yomatla a ntira tše kgolo; mme ina la gagwe ke le lekgethwa. 50Kgaugelo ya gagwe e ya le meloko le meloko go ba ba mmoifago. 51O dirile matla ka tsogo la gagwe; o gašantše ba kgopolo tša go ipota. 52O tekola ba dioka ditulong, a godiša babotlana. 53Ba ba lapilego o ba hoša ka tše botse; bahumi a gomiša ba timilwe. 54O šeditše ngwana wagwe Isiraele, e le go gopola kgaugelo, 55bjalo ka ge a boletše le botatawešo Aborahama le bana ba gagwe o tlo fela a gopola kgaugelo go ya go ile.
56Maria a dula moo le Elisabetha a nyako fetša dikgwedi tše tharo; a tsebo boela gae.
57Elisabetha a fihlelwa ke lebaka la gagwe, a belega ngwana wa mošemanyana. 58Baagišani le ba gabo ge ba ekwa gore Morena o godišitše kgaugelo ya gagwe mo go yena, ba thaba le yena.
59Ka tšatši la seswai ba tla go bolotša ngwana, ba mo rea leina la Tsakaria tatagwe. 60Mmagwe a gana a re: Aowa; o tlo bitšwa Johane.
61Bona ba re: Hleng molokong wa geno go se motho wa leina leo! 62Ba kgwathetša tatagwe ba re, o rata ge a bitswa ka leina lefe.
63Yena a nyaka lematšana, a ngwala a bolela a re: Leina la gagwe ke Johane! Ba tlabega ka moka. 64Ke ge molomo wa gagwe o mumologa le leleme la gagwe la hunologa, a bolela areta Modimo. 65Ba gabo bohle ba welwa ke poifo; ditaba tše ka moka tša bolelwa dithabeng tša Juda. 66Gomme bohle ba ba di kwilego ba di bea dipelong tša bona, ba re: Bjale ngwana yo e tlo bang ka gobane seatla sa Morena se be se le moo go yena.
67Tsakaria tatagwe a tlala Moya o mokgethwa a porofeta a re: 68A go retwe Morena Modimo wa Isiraele, gobane o tlile a hlola setšhaba sa gagwe, a se direla topololo, 69A re tsošetša naka la phološo, la lešika la Dafida mohlanka wa gagwe, 70A dira tše a bego a di šupa ka melomo ya baporofeta bagwe ba bakgethwa go tloga kgalelele, 71a re o tlo re phološa manabeng a rena, matsogong a ba re hloilego bohle. 72A re, borrawešo a ba dire ka mabobo, a gopole kgwerano e kgethwa ya gagwe. 73Keno yela a e enetšego tatawešo Aborahama, a re: 74Re tlo Mo direla re se na poifo, re golotšwe diatleng tša manaba, 75Re le ba bokgethwa le ba toko pela gagwe, ka mehla ka moka ya phelo bja rena. 76Mme wena ngwanaka! Ba tlo re o Moporofeta wa Yogodimodimo; o tlo ba Moetapele wa fahlogo sa Morena, wa mo lokišetša tsela tšagwe. 77Ya tlo ba go nea tšhaba sagwe tsebo ya phološo ya go tla ka go lebalelwa dibe. 78Ka pelotšhokwa ya Modimo wa rena, ya go re hlabišetša masa matšwagodimo, 79a go tlo bonwa ke ba go dula lefsifsing, moriting wa lehu, a go tlo sokollela maoto a rena tseleng ya molao.
80Gomme ngwana eo a gola, a dula mašokeng, gwa ba gwa tla letšatši la ge a tšweletše a bonwa ke Baisiraele.
Currently Selected:
LUKA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.