ESERA 1
1
Korese o dumelela Bajuda go boela gae
1Ka ngwaga wa pele wa Korese kgoši ya Peresia gwa na gwa phethega lentšu la Morena le a le boletšego ka molomo wa Jeremia, ge Morena a phafošitše moya wa Korese kgoši ya Peresia, a iša lentšu go bohle ba mmušo wa gagwe, le ka lengwalo, a re:
2Korese kgoši ya Peresia o re: Morena Modimo wa legodimo o nneetše mebušo ka moka ya lefase, gomme o ntaetše gore ke mo agele Ngwako kua Jerusalema nageng ya Juda. 3Bjale mang le mang yo e lego wa setšhaba sa gagwe, a Modimo wa gagwe a be le yena, a rotogele Jerusalema kua nageng ya Juda, a age Ngwako wa Morena Modimo wa Isiraele, yena Modimo wa Jerusalema. 4Bjale mang le mang e lego lešalela, e a diiletšego motseng ofe le ofe, a a thušwe ke banna ba motse woo a lego go wona ka disilifera le ka digauta, le ka dithoto le ka dikgomo, le ka dimpho tša go ithapa; di ntšhetšwe Ngwako wa Modimo wa Jerusalema.
5Ke mo go tsogilego bagolo ba moloko wa Juda le wa Benyamini, le baperisita le Balefi, le bohle ba Modimo a phafošitšego dipelo tša bona, gore ba boele Jerusalema, ba age Ngwako wa Morena wa kua Jerusalema. 6Gomme bohle ba ba agišanego nabo, ba ba thuša ka dibjana tša silifera le tša gauta, le ka dithoto le ka dikgomo, le ka tše ba bego ba di ntšha ka go ithapa.
7Yena kgoši Korese a ntšha dibjana tša Ngwako wa Morena, tše Nebukadinetsara a bego a di rebotše kua Jerusalema a di bea ngwakong wa modimo wa gagwe. 8Korese kgoši ya Peresia a laela Mithiredathe molakamahumo a re a di ntšhe; yena a di bala a di nea Sesebatsara mokgoma wa Bajuda. 9Palo ya tšona še: Meruswi ya gauta e be e le e masome a mararo; ya silifera e be e le e sekete; mefaka e be e le e sekete; mefaka e be e le e masome a mabedi a metšo e senyane; 10dinwelo tša gauta e be e le tše masome a mararo; tša silifera e be e le tše makgolo a mane, le dibjana tše dingwe tše sekete.
11Ka moka ga tšona e be e le dibjana tše dikete tše tlhano le makgolo a mane tša gauta le tša silifera. Ke tšona tše Sesebatsara a tlilego natšo ge a rotoga le ba ba boetšego Jerusalema ba etšwa Babele bothopša.
Currently Selected:
ESERA 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.