1 JOHANE 1
1
Lentšu la bophelo, la Modimo e lego yena seetša, le nyaka ba ba swerego tsela ya seetša
1Re le anegela se se bego se le gona mathomong, se re se kwelego, se re se bonego ka mahlo ra se bogela, mme diatla tša rena tša se kgwatha, tša lentšu la bophelo. 2Bophelo bjoo bo bonagetše ra bo bona, gomme re hlatsela bjona; re le anegela tša bophelo bjo bo sa felego, bjo bo bego bo le gona go Modimo Tata wešo, bja tla bja bonala mo go rena. 3Le lena re le anegela sona seo re se bonego, se re se kwelego, gore le lena le be batee le rena; mme botee bjo bja rena e be go ba batee le Tata wešo le Morwa wa gagwe Jesu Kriste. 4Gomme ditaba tše re le ngwalela gore thabo ya lena e be ya botlalo.
5Gomme taba ye re e kwelego go yena, ye re le anegelago yona, ke ye e rego: Modimo ke seetša; gomme mo go yena ga go se e ka bago leswiswi. 6Ge re re: Re batee le yena, mme ra tloga ra swara tsela ya leswiswi, gona re a aketša, ga re dire therešo. 7Fela, ge re swere ka tsela ya seetša, boka le yena e le wa seetšeng, gona re batee seng sa rena, mme madi a Jesu Kriste Morwa wa gagwe a re hlatswa dibe tšohle.
8Ge re ka re: Ga re na sebe, re a iphora, mme therešo ga e gona mo go rena. 9Ge re ipolela dibe tša rena, gona ka ge yena e le wa potego le toko, o re lebalela dibe a re hlatswa bokgopo ka moka. 10Ge re ka re: Ga ra dira dibe, -- gona e ka ba go mo dira wa maaka, gomme lentšu la gagwe le tla ba le se gona mo go rena.
Currently Selected:
1 JOHANE 1: NSO51
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1986. Used with permission. All rights reserved.